Қарақурум бүркүти: низамидин һүсәйинниң һаяти (5)

Мухбиримиз қутлан
2018-09-25
Елхәт
Пикир
Share
Принт
Мәрһум әдиб, инқилабчи низамидин һүсәйин әпәнди 3-түрминиң дохтурханисида йетиватқан чағдики һаятиниң ахирқи күнлиридә тартилған сүрәт. Үрүмчи.
Мәрһум әдиб, инқилабчи низамидин һүсәйин әпәнди 3-түрминиң дохтурханисида йетиватқан чағдики һаятиниң ахирқи күнлиридә тартилған сүрәт. Үрүмчи.
RFA/Qutluq

Бәшинчи қисим: әрваһқа айланған мәһбус

Низамидин һүсәйин әпәндиниң үрүмчи 3-түрмисидин сиртқа йошурунчә чиқарған хети униң қамақтики әһвалиниң интайин еғир икәнликидин далаләт бериду.

72 яшлиқ дадисиниң һәпсидә қан-яш билән язған хети җүрәт низамидинниң йүрикини ләхтә-ләхтә қиливетиду. У шу күндин башлап тәрәп-тәрәпкә чепип, дадисини түрмә сиртида давалитишниң йолини маңиду. Аридики нурғунлиған җапалиқ җәрянлардин кейин үрүмчи 3-түрмә дохтурханисиниң ма фамилилик туңган башлиқиниң мәһбус низамидин һүсәйинниң еғир дәриҗидә кесәл икәнлики, уни түрмә сиртида давалатмиса болмайдиғанлиқи һәққидики имзалиқ хетини алиду.

Һалбуки, 3-түрмә дохтурханисиниң туңган башлиқи йезип бәргән бу кесәллик испати уйғур аптоном районлуқ сиясий-қанун комитети яки тәптиш мәһкимисиниң тәстиқидин өткәндила андин күчкә игә болалайдиғанлиқи мәлум болиду. Буниң билән җүрәт низамидин аптоном районлуқ сиясий-қанун комитети яки тәптиш мәһкимисиниң биринчи қол башлиқи билән биваситә көрүшүш йолини издәйду. Дәл шу күнләрдә уйғур аптоном районлуқ сиясий-қанун саһәсидикиләрниң йиллиқ йиғини үрүмчи шамалбағдики бир меһманханида ечилиду. Җүрәт низамидин өзиниң мухбирлиқ салаһийити билән йиғин ечиливатқан меһманханиға бариду һәмдә бир амал қилип әйни вақиттики уйғур аптоном районлуқ сиясий-қанун комитетиниң секретари ли пеңзи билән биваситә көрүшүшниң имканийитини издәйду.

У ахири сиясий-қанун комитетиниң йиғини ечиливатқан меһманханиниң 8-қәвитидин ли пеңзиниң хас ишханисини издәп тапиду вә еһтият билән ишикни чекиду.

Ли пеңзи җүрәт низамидин елип кәлгән түрмә дохтуриниң испат хети вә униң дадисини түрмә сиртида давалитиш һәққидики илтимасиға бир қур көз йүгүртүпла, уни 11-номурлуқ ятақтики уйғур аптоном районлуқ тәптиш мәһкимисиниң башлиқи шяв җйән билән көрүшүшкә буйруйду. Җүрәт низамидин 11-номурлуқ ятақтин тәптиш мәһкимисиниң башлиқи шяв җйәнни издәп тапиду. Уйғур аптоном райониниң тәптиш хизмити саһәсидики бу әң юқири дәриҗилик хитай әмәлдар сиясий мәһбус низамидин һүсәйинниң делоси билән өз алдиға кәлгән җүрәт низамидинни көрүп турупла қалиду. У җүрәт низамидинниң илтимасиға бир қур көз йүгүртүп чиққандин кейин тәстиқ сөзи йезип имзасини қойиду вә мәһбус низамидин әпәндини түрмидин вақитлиқ чиқирип сиртта давалитишқа буйруйду.

Тәптиш мәһкимисиниң башлиқи шяв җйәннниң тәстиқини алғандин кейин җүрәт низамидин удулла тәптиш мәһкимисиниң хизмәт бинасиға бариду. Тәптиш мәһкимиси мәхсус хизмәтчи хадимдин бирни қошуп җүрәт низамидинни үрүмчи шәһәрлик 3-түрмигә әвәтиду. Улар түрминиң нәччә метир егизликтики қоршав тамлирини бойлап, сүрлүк бир дәрвазидин машина билән ичигә кириду. Узун өтмәй ич тәрәптики бир кичик дәрвазидин оруқлап бир терә бир устихан болуп қалған, аҗизлап нәпәс елишиму қийинлашқан, гоя бир әрваһқа айланған нимҗан гәвдә икки гундипайниң қолтуқидин йөлиши билән уларниң алдида пәйда болиду.

Бу 1998-йили 3-айниң 3-күни болуп, низамидин әпәнди тутқун қилинғиниға топ-тоғра бир йил болған күн иди. У 1997-йили 3-айниң 3-күни кечидә үрүмчи қизил тағ қешидики «шинҗаң гезити» идарисиниң аилиликләр қорусидин сақ һаләттә тутуп кетилип, бир йилдин кейин нимҗан һаләттә давалинишқа қоюп берилгән иди. Шу дәқиқидә низамидин әпәнди зәиплишип кәткән вуҗудидики ахирқи күчини йиғип оғлиға: «мени дәрһал дохтурханиға елип бериңлар!» дәйду. Җүрәт низамидин дәрһал уйғур аптоном районлуқ хәлқ дохтурханиси билән алақилишип, дадисини шу дохтурханиниң җиддий қутқузуш бөлүмигә елип бариду.

Шу кечиси мәзкур дохтурханиниң җиддий қутқузуш бөлүми низамидин әпәндигә қарита җиддий давалаш елип бариду. Бир кечә ичи сүрүп һеч һали қалмиған низамидин әпәнди нәччә қетимлап һошидин кетиду, һошиға келиши билән бәдини ғалилдап титрәп, чишлири киришип нәпәс алалмай қалиду. Дохтурлар җүрәт низамидинға дадисиниң әһвалиниң ахирқи басқучқа берип қалғанлиқини әскәртиду.

Низамидин әпәнди 20 күндәк үрүмчидики 2-дохтурхана, йәни уйғур аптоном районлуқ хәлқ дохтурханисида даваланған болсиму әмма әһвалида яхшилиниш болмайду. Гәрчә низамидин әпәнди сақийип кетимән дәп пүтүн әс-яди билән тиришчанлиқ көрсәткән, аилисидикиләр пүтүн имканийәтлири билән давалатқан болсиму, әмма аҗизлап кәткән йүрики бир күн, бир күндин зәиплишип маңиду.

Дохтурлар гәрчә әйни вақитта җүрәт низамидинға очуқ-ашкара демигән болсиму, әмма дадисиға түрмидә мәлум бир хил окулниң урулған болуши еһтималлиқини, шуниң үчүн униң бир амал қилип дадисиниң түрмә дохтурханисидики кесәллик архипидин копийә еливелиши керәкликини ишарә қилиду. 20 Нәччә күнлүк давалитиштин кейин җүрәт низамидин дохтурларниң тәвсийәси билән дадисини өйигә қайтуруп чиқиду. Бу 1998-йили қурбан һейтниң һарпа күни иди.

(Давами бар)

Толуқ бәт