Xitay amérika axbarat organlirida ishlewatqan puqralirini xizmitini tashlashqa buyrughan

Muxbirimiz jüme
2020-03-22
Élxet
Pikir
Share
Print
"Muxbirlarni qoghdash komitéti" ning xitay tashiqi ishlar ministirliqining amérika axbarat organlirida ishlewatqan puqralirini xizmitini tashlashqa buyrughanliqi heqqide bergen bayanati. 2020-Yili 20-mart.
"Muxbirlarni qoghdash komitéti" ning xitay tashiqi ishlar ministirliqining amérika axbarat organlirida ishlewatqan puqralirini xizmitini tashlashqa buyrughanliqi heqqide bergen bayanati. 2020-Yili 20-mart.
cpj.org

Béyjing da'iriliri amérikaning xitayda turushluq axbarat organlirida ishlewatqan 7 neper xitay puqrasini xizmitini tashlap chiqip kétishke buyrughan.

"Muxbirlarni qoghdash komitéti" ning jüme kündiki bayanatigha qarighanda, xitay tashiqi ishlar ministirliqi qarmiqidiki shexsiy mulazimet orgini jüme we peyshenbe künliri uqturush chiqirip, "Nyu-york waqit" géziti we "Amérika awazi" qatarliq axbarat organlirining béyjingda turushluq idariliride xizmet qiliwatqan xewer yardemchilirini xizmitini tashlashqa buyrughan. 

"Muxbirlarni qoghdash komitéti" bayanatida xitayning amérika axbarat organlirining béyjingdiki xewer toplash xizmitini pütünley bitchit qilishqa bel baghlighan bolushi mumkinlikni éytqan. 

‍Ularning éytishiche, mezkur axbarat organliridiki xitay tilliq yardemchiler xewer toplash, izdesh we tetqiq qilishta intayin muhim rollarni oynap kelgen iken. 

"Amérika awazi radiyosi" xitayning bu qattiq qol wasitisining mezkur radiyoning xitaydiki xewer toplash xizmitige ongushsizliqlarni élip kélidighanliqini bildürgen. 

Melum bolushiche, xitay qanunida chet'el axbarat organlirining xitaydin biwasite xizmetchi qobul qilishi cheklen'gen bolup, ular xizmetchi qobul qilishta peqet xitay tashqi ishlar ministirliqigha qarashliq shexsiy mulazimet orginigha tayinishqa mejbur iken. 

Xitay hökümiti 17-mart "Wal strét zhurnili", "Washin'gton pochtisi" we "Nyu-york waqit géziti" qatarliq axbarat organlirining 13 neper muxbirini xitaydin qoghlap chiqarghan idi. 

Bu, xitayning amérikiliq we chet'ellik muxbirlarni tunji qétim xitaydin qoghlap chiqirishi emes. 

Xitay hökümiti 2015-yili dékabirda "Bay kömürkan weqesi" ning térrorluq weqesi emeslikide ching turghan fransiyelik muxbir ursula guytér xanimni xitaydin qoghlap chiqarghan. 

Xitay 2018-yili yene "Buzfid" tor gézitining muxbiri maga rajagopalanning xitayda ishlesh wizisini yéngilap bermey, uni xitaydin chiqip kétishke mejburlighan idi. 

Maga xanim xitayning Uyghurlargha qaratqan basturush we teqiblesh siyasiti mupessel bayan qilin'ghan "21-Esirdiki saqchi döliti" namliq maqalisi arqiliq tonulghan muxbir idi.

Toluq bet