Шөһрәт мутәллипоф америкида тунҗи қетим инсан төрәлмә ғол һүҗәйрисигә түзитиш киргүзүп нәтиҗә қазанди

Мухбиримиз үмидвар
2017-07-30
Елхәт
Пикир
Share
Принт
Америкидики уйғур алими шөһрәт мутәллипоф.
Америкидики уйғур алими шөһрәт мутәллипоф.
Social Media

Америкидики уйғур алими шөһрәт мутәллипоф башчилиқидики гуруппа америкида тунҗи қетим инсан төрәлмә ғол һүҗәйрисиниң д н а (DNA), йәни генлириға қарита түзитиш киргүзүп  нәтиҗә қазанған.

«MIT Technology Review» Журнилидики мәлуматларға қариғанда, америкиниң оригин штатидики сағламлиқ вә пән университетиниң тәтқиқатчиси шөһрәт мутәллипоф башчилиқидики тәтқиқат гурупписи CRISPR дәп аталған йеңи тәтқиқат усулидин пайдилинип, америка қошма штатлирида тунҗи қетим инсан төрәлмә ғол һүҗәйрисиниң д н а (DNA), йәни генлирини түзитип чиққан.

Мәзкур мақалидә илгири сүрүлүшичә, шөһрәт мутәллипоф башчилиқида қолға кәлтүрүлгән бу йеңи тәҗрибә генетикилиқ (ирсийәт характерлик) кесәлликләрниң алдини елиш үчүн генларни мувәппәқийәтлик һалда өзгәртиш мумкинликини көрсәткән. Лекин, шөһрәт мутәллипоф һазирчә өз тәтқиқат нәтиҗиси һәққидә изаһат беришни рәт қилған болуп, униң қаришичә, нөвәттә бу тәтқиқат нәтиҗиси һәққидә мәхсус илмий мақалә тәйярлап елан қилиниши керәк икән.

CRISPR Йеңичә ген өзгәртиш методи болуп, бу кәлгүсидә генетикилиқ, йәни ирсийәт кесәлликлиригә тақабил туруш вә давалашта муһим рол ойниши мумкин. Мәтбуатларниң йезишичә, 2015-йили, хитай ирсийәтшунаслири тунҗи қетим инсан төрәлмә ғол һүҗәйрисиниң генлирини өзгәртиш тәҗрибиси елип барған болсиму, әмма бу тәҗрибидә мувәппәқийәт вә бәзи йетәрсизликләр болған. 

Шөһрәт мутәллипоф гурупписиниң америка қошма штатлирида тунҗи қетим инсан төрәлмә ғол һүҗәйрисиниң д н а (DNA) лириға, йәни генлириға қарита өзгәртиш киргүзүп нәтиҗә қазанғанлиқидин ибарәт инсанийәт илим-пән тарихидики зор вәқә һесаблинидиған бу хәвәр америка мәтбуатлири, җүмлидин пүтүн дуня мәтбуатлиридики әң актип учурға айланди.

Бу, русийә мәтбуатлиридиму қизиқ нуқтиға айлиниш билән биргә шөһрәт мутәллипофниң әслидә русийәдә маарип тәрбийиси вә тәтқиқат тәҗрибисигә игә болуп, 1995-йили америкиға кәткәнлики әскәртилсә, қазақистан мәтбуатлирида униң келип чиқиш җәһәттин «әсли қазақистанлиқ алим» икәнлики әскәртилди.

Доктор шөһрәт мутәллипоф қазақистанниң алмата шәһиридә уйғур зиялийси аилисидә дуняға кәлгән вә маарип тәрбийисини алмата, москва қатарлиқ шәһәрләрдә алғандин кейин 1995-йили америкиға келип өзиниң ирсийәтшунаслиқ тәтқиқатлирини давамлаштурған иди.

Пикирләр (0)
Share
Толуқ бәт