Қирғизистан уйғурлири өмлүктә роза һейти өткүзди

Ихтиярий мухбиримиз ферузә
2018-06-15
Елхәт
Пикир
Share
Принт
Қирғизистандики һейт намизидин бир көрүнүш. 2018-Йили 15-июн. Қирғизистан.
Қирғизистандики һейт намизидин бир көрүнүш. 2018-Йили 15-июн. Қирғизистан.
RFA/Feruze

Қирғизистан оттура асиядики уйғурлар бир қәдәр коп вә зич олтурақлашқан мәмликәт, улар өз миллий вә диний әнәнилирини яхши сақлап кәлмәктә. Қирғизистан һөкүмити тәрипидин 60 миңға йеқин дәп санилип келиватқан уйғурлар қирғиз вә башқа мусулманлар билән бирликтә 15-июн күни роза һейти намизи оқуди вә өз адәтлири бойичә өзара һейтлишип, бир-бирини тәбриклиди.

Қирғизистандики уйғурларму бир ай роза тутуштин ибарәт муқәддәс пәрзини ада қилип, йетим-мискинләргә сәдиқә берип, шундақла қурани кәрим нәзил қилинған қәдир кечисини қуран тилавәт билән түнәп, 15-июн күни һейт намизини оқушти. 

Роза һейти ислам дунясиниң әң чоң байрамлиридин биридур. Роза һейти дастиханлар селинған, инсанлар оттурисидики адавәтләрни түгитип, өз-ара һәмкарлишишни күчәйтидиған, қериндашлардәк бир-бирини бағриға бесип һейтлишидиған күндур. Әмма уйғур елидики еғир вәзийәт, қирғизистан уйғурлириниң йүрәклирини қайғу вә ғәмгә салғанлиқи үчүн улар муқәддәс байрамда көңүллири йерим һалда һейтлашти. 

Радио зияритимизни қобул қилған дуня уйғур қурултийиниң қирғизистандики вакаләтчиси розимуһәммәт абдулбақийеф бу һәқтә өз һес туйғулирини изһар қилди. 

Уйғурлар әң көп олтурақлашқан новопокровка, лебединовка, восток вә кәң булуң қатарлиқ йезилардики уйғурлар мәһәллиләрниң мәсчитлиригә җәм болуп һейт намизини өтәп, андин уйғурларниң адити бойичә, қирғизистанда аләмдин өткән уйғурларниң қәбрисини зиярәт қилип, дуа тилавәт қилғандин кейин, чоңлардин башлап өйму-өй айлинип һейт пәтиси оқушти.

Биз бу һәқтә мәлумат игиләш үчүн новопокровка йезисиниң мәсчитидә намаз өтәп чиққанлар билән сөһбәт елип бардуқ.

Радио зияритимизни қобул қилған новопокровка мәһәллисиниң йигит беши ғәйрәт җаһаноф бу йили рамзан ейиниң һәр күни новопокровка мәсчитидә 300 ға йеқин мусулман ибадәт қилғанлиқи ейтип вә бу йили аләмдин өткән сәпдиши ясинҗан махмудини, шундақла абдуләһәд мәхсум вә муһәммәд салих қатарлиқ дини затларни әсләп өтти.

Ғәйрәт әпәнди йәнә қирғизистандики уйғур яшлириниң көпи намаз оқушни өгинип, диний билимлирини ашуруватқанлиқини билдүрди.

«Иттипақ» җәмийитиниң аяллар кеңишиниң рәиси рәшидәм әмәтханованиң ейтишичә, у ислам динини ата-анилиридин өгәнгән, униң аилисидә намаз оқуш, роза тутуп қәдир кечиси өткүзүш қатарлиқ диний мурасимлар әзәлдин сақлинип кәлмәктә. Әмма у бүгүнки күнләрдә уйғур диярида уйғурлар учраватқан еғир тәһдитләрдин пәришан болуватқанлиқини ейтти. 

Қирғизистан пайтәхти бишкәк шәһириниң шәрқий райониға җайлашқан «восток» йезиси уйғурлар әң көп олтурақлашқан җайлардин бири болуп, бу йәрдә сахавәтлик уйғур йигитләр йеңи мәсчит селип, ислам динини чиң тутуп кәлмәктә. Бу йезидики аяллар бирлишип, бир бири билән һәмкарлишип, өрп-адәтлирини сақлап қелиши үчүн йиғин ечип, буларни өгитип кәлмәктә. Мәзкур йезидики аяллар кеңишиниң рәиси зулпийә ғлаҗидин бу һәқтә баян қилди.

Қирғизистанниң чуй, ош, җалал-абад вилайәтлиридә шундақла иссиқ көл вилайитиниң қара-көл шәһиридә яшаватқан уйғурлар һәр һейтни уйғурларниң өрп-адәтлири бойичә өткүзүп кәлмәктә. «Иттипақ» җәмийитиниң рәиси артиқ һаҗийеф уйғурларни, дуня мусулманлирини һейт билән тәбриклиди.

Пикирләр (0)
Share
Толуқ бәт