Түркийә дөләт рәиси рәҗәп таййип әрдоғанниң иптар зияпитигә уйғурларму тәклип бойичә қатнашти

Ихтиярий мухбиримиз әркин тарим
2017-06-22
Елхәт
Пикир
Share
Принт
Түркийә рәислик ордисида аммиви тәшкилатларниң мәсуллириға берилгән иптар зияпитидә, һидайәтулла оғузхан әпәнди рәис рәҗәп таййип әрдоған билән көрүшти. 2017-Йили 21-июн, әнқәрә.
Түркийә рәислик ордисида аммиви тәшкилатларниң мәсуллириға берилгән иптар зияпитидә, һидайәтулла оғузхан әпәнди рәис рәҗәп таййип әрдоған билән көрүшти. 2017-Йили 21-июн, әнқәрә.
RFA/Erkin Tarim

Рамизан ейи мусулманлар үчүн муқәддәс бир ай болуп, бу айда кишиләр арисидики һәмкарлиқ күчийиду. Бу ай мунасивити билән 21-июн күни түркийә җумһур рәиси рәҗәп таййип әрдоған түркийәдики әң чоң аммиви тәшкилатларниң мәсуллирини тәклип қилип, рәислик ордисида иптар зияпити бәрди.

Зияпәткә истанбулда паалийәт елип бериватқан шәрқий түркистан маарип вә һәмкарлиқ җәмийити рәиси һидайәтулла оғузхан билән билги университети оқутқучиси уйғур зиялийси мурат орхун әпәнди тәклип бойичә қатнашти. Зияпәт ахирида һидайәтулла оғузхан әпәнди уйғур дияриниң әң йеңи вәзийити билән түркийәдики уйғурларниң қийинчилиқлирини өз ичигә алған доклатни дөләт рәиси рәҗәп таййип әрдоғанға бәргән.

Һидайәтулла оғузхан әпәнди алаһидә тәклип бойичә түркийә дөләт рәиси рәҗәп таййип әрдоғанниң аммиви тәшкилат мәсуллириға бәргән иптар зияпитигә қатнашқанлиқини, мәзкур зияпәттә түркийәдики аммиви тәшкилат мәсуллиридин сирт, министирлар, парламент әзалири вә һәр дәриҗилик рәһбәрләрдин болуп көп санда кишиниң иштирак қилғанлиқини баян қилди.

Һидайәтулла оғузхан әпәнди, түркийә дөләт рәиси рәҗәп таййип әрдоған иптар зияпитидә қилған нутқида, түркийә җумһурийити дөлитиниң бесимдин қечип түркийәгә панаһлиқ тилигән мусапирларға игә чиқишни давам қилидиғанлиқини тәкитлигәнликини баян қилди.

Рамизан ейи мунасивити билән берилгән бу хил иптар зияпәтлири аммиви тәшкилатлириниң дөләт рәһбәрлиригә мәсилилирини йәткүзидиған әң яхши пурсити һесаблиниду. 21-Июн күни ақшам дөләт рәиси рәҗәп таййип әрдоған бәргән зияпәт ахирлашқандин кейин, һидайәтулла оғузхан әпәнди уйғур дияриниң әң йеңи вәзийити вә уйғур мусапирларниң мәсилилирини өз ичигә алған бир доклатни рәис җумһуриға сунғанлиқини тәкитлиди.

Йеқинқи йиллардин бери түркийә билән хитай дөлити оттурисидики мунасивәтниң күчийиши түркийәдики уйғурларни әндишигә салмақта. Хитай һөкүмити түркийәдә паалийәт елип бериватқан аммиви тәшкилатларни террорлуқ тәшкилат дәп қарилимақта. Түрк һөкүмити бир тәрәптин хитай билән йеқинлишиш сиясити елип барса, йәнә бир тәрәптин уйғурларниң көңлини елиш сиясити елип бармақта. Һидайәттуллаһ оғузхан әпәнди өзиниң зияпәткә тәклип қилинишиниң түркийә һөкүмитиниң хитайниң уйғурларни қарилаш тәшвиқатиға ишәнмигәнликиниң бешарити икәнликини илгири сүрди.

Измирдики әгә университети түрк дуняси тәтқиқат мәркизи оқутқучиси профессор доктор алимҗан әпәнди бу һәқтики көз қаришини баян қилип мунуларни тәкитлиди.

Түркийәдә паалийәт елип бериватқан шәрқий түркистан аммиви тәшкилат мәсуллири икки һәптә бурун түркийә баш министири бинали йилдирим бәргән иптар зияпитигиму тәклип қилинған иди.

Пикирләр (0)
Share
Толуқ бәт