Qirghizistanliq Uyghur qizi shehrizat xelilowa töt qétim dunya chémpiyoni bolghan

Ixtiyariy muxbirimiz oyghan
2018-10-12
Élxet
Pikir
Share
Print
Erkin mushtlishish dunya chémpiyoni shehrizat xelilowa. 2018-Yili. Tayland.
Erkin mushtlishish dunya chémpiyoni shehrizat xelilowa. 2018-Yili. Tayland.
RFA/Oyghan

Hazir qirghizistanning bishkek shehiride yashawatqan Uyghur qizi shehrizat xelilowa dunya tenheriket türliri ichidiki taylandche erkin mushtlishish türi boyiche ötküzülgen dunya musabiqiliride töt qétim chémpiyon bolghan.

U yene tenheriketning "Karaté", yeni qa'idisiz chélishish, "Kik-boksing", yeni put-qolni teng ishqa sélip erkin mushtlishish we bashqimu türler boyiche musabiqilerge qatniship, körünerlik netijilerni namayish qilghan.

Shehrizat xelilowa radiyomiz ziyaritini qobul qilip, özining 1992-yili bishkek shehiride tughulup, yüsüp balasaghun namidiki qirghiz döletlik uniwérsitétining edliye téxnikomini tamamlighanliqini, hazir bolsa yash tenheriketchilerge trénérliq qilip kéliwatqanliqini bildürdi. 

U mundaq dédi: "Kespiy tenheriket bilen men töt yéshimdin tartip shughullinishqa bashlidim, yeni tenheriket ussulidin désem bolidu. Bumu tenheriket türlirining biri bolup hésablinidu. Erkin mushtlishish we bashqimu chélishish türliri boyiche men 12 yéshimdin tartip shughullandim. Deslepte qirghizistanda ötken tayékwando, yeni ayaq bilen mushtlishish boyiche jumhuriyetlik musabiqide yéngilip qélip, üchinchi orun'gha ige bolghan idim. Men shu waqitta buning méning tenheriket türüm emeslikini chüshendim. Deslepki musabiqilerde chémpiyon bolghanlardin heqiqiy chémpiyonlar tughulmaydiken, chünki heqiqiy chémpiyon belgilik bir musapini bésip ötüshi kérek iken. Men tunji qétim dunya chémpiyoni atiqigha 2012-yili rusiyening anapa shehiride ötken kikboksing boyiche musabiqide muyesser boldum. Emdi 2016-yili tayland paytexti bangkokta ötken taylandche mushtlishish boyiche dunya musabiqiside men ikki qétim biraqla chémpiyon boldum. Mundaq déginim, mesilen, bügün tenterbiye heweskarliri arisida dunya chémpiyoni bolghan bolsam, etisi kespiy mahirlar arisida chémpiyon boldum. Üchinchi qétim 2017-yili, yene shu bangkok shehiride ötken musabiqide chémpiyon boldum". 

Shehrizat xelilowaning sözlirige qarighanda, 2018-yili aprél éyida bangkok shehiride ötken taylandche mushtlishish boyiche dunya musabiqisige 80 din oshuq memlikettin tenheriketchiler qatnashqan iken. U öz salmiqida deslepte rusiye we girétsiye tenheriketchilirini, axirida bolsa, portugaliye tenheriketchisini yéngip chiqip, töt qétim dunya chémpiyoni dégen ataqqa érishken.

Shehrizat xelilowa yene özining tenheriketning bashqimu türliri boyiche musabiqilerge qatnashqanliqini otturigha qoydi: "Koréyening chindu we sé'ul sheherliride ötken kikboksing boyiche asiya musabiqiside, qazaqistanning astana shehiride ötken boks boyiche asiya musabiqiside, shundaqla rusiyening moskwa shehiride ötken neyziliship-jeng qilish boyiche dunya musabiqiside, iranning kérmanshah shehiride ötken karaté boyiche dunya musabiqiside we bashqimu her derijilik musabiqilerde men mukapatliq orunlargha érishtim."

Shehrizat xelilowa özining kélechekte tenheriketning her xil türliri boyiche olimpik musabiqilirige qatnishish arzusining bar ikenlikini bildürdi. 

Qirghizistanda neshr qilinidighan "Ittipaq" géziti bash muherririning orunbasari abdurehim hapizofning éytishiche, axirqi yilliri qirghizistanda bir qatar yash Uyghur tenheriketchiliri terbiyelinip chiqqan bolup, ular asiya we dunya musabiqilirige qatnashmaqta hem yaxshi netijilerni körsetmektiken. U mundaq dédi: "Mesilen, 18 yashliq kamil sabitof at minish tenherikiti boyiche qirghizistanning bir nechche qétimliq chémpiyoni. U xelq'ara musabiqilerde 1-we 2-orunlarni igiligen. Yash bolghinigha qarimay, tejribilik tenheriketchi. 17 Yashliq hesen bawudunof qilichwazliq boyiche asiya chémpiyoni. Bu ikkisi qirghizistan tallanma komandisining ezaliri. Ekber héyt'axunof bolsa tayékwando boyiche dunya chémpiyoni. U bashqa ellerdiki musabiqilergimu aktip qatnishiwatidu. 21 Yashliq xalmurat ibrahimof girék-rimche élishish boyiche qirghizistan chémpiyoni. Dewran sadiqof rusiyening yékatérinburg shehiride bolup ötken girék-rimche élishishning chémpiyoni boldi."

Abdurehim hapizof yash tenheriketchilerning yétilip chiqishida tenheriket kulublirining hem tirénérlarning töhpisining alahide ikenlikini tekitlep, yene mundaq dédi: "Uzun yillardin buyan bishkek shehiride 'bürküt' tenheriket kulubi ishlimekte. Bu kulub girék-rimche élishish boyiche yash tenheriketchilerni teyyarlimaqta. Kulubta perhat hoshurof dégen trénérning emgiki zor. U tenheriket mahiri. Uning qol astida her millet wekilliri terbiyeliniwatidu. Perhat hoshurof ötken yili prézidént qolidin pexriy yarliq aldi." 
Igilishimizche, ötken esirning 60-yilliridin bashlap qirghizistan Uyghurliridin dangliq putbolchi yüsüp musayéf, yaponche élishish mahirliri sawur emetof we abduweli ismayilof, girék-rimche élishish ning mahirliridin perhat we shöhret hoshuroflar, "Bürküt" girék-rimche élishish kulubining mudiri, tenheriket mahiri sadiqjan yüsüpxojayéf qatarliq Uyghur tenheriketchiliri yétiship chiqqan. Ular peqet Uyghurlarnila emes, belki qirghizistanni dunyagha tonutqan tenheriketchilerdur.

Toluq bet