Қирғизистанлиқ уйғур қизи шәһризат хәлилова төт қетим дуня чемпийони болған

Ихтиярий мухбиримиз ойған
2018-10-12
Елхәт
Пикир
Share
Принт
Әркин муштлишиш дуня чемпийони шәһризат хәлилова. 2018-Йили. Тайланд.
Әркин муштлишиш дуня чемпийони шәһризат хәлилова. 2018-Йили. Тайланд.
RFA/Oyghan

Һазир қирғизистанниң бишкәк шәһиридә яшаватқан уйғур қизи шәһризат хәлилова дуня тәнһәрикәт түрлири ичидики тайландчә әркин муштлишиш түри бойичә өткүзүлгән дуня мусабиқилиридә төт қетим чемпийон болған.

У йәнә тәнһәрикәтниң «карате», йәни қаидисиз челишиш, «кик-боксиң», йәни пут-қолни тәң ишқа селип әркин муштлишиш вә башқиму түрләр бойичә мусабиқиләргә қатнишип, көрүнәрлик нәтиҗиләрни намайиш қилған.

Шәһризат хәлилова радийомиз зияритини қобул қилип, өзиниң 1992-йили бишкәк шәһиридә туғулуп, йүсүп баласағун намидики қирғиз дөләтлик университетиниң әдлийә техникомини тамамлиғанлиқини, һазир болса яш тәнһәрикәтчиләргә тренерлиқ қилип келиватқанлиқини билдүрди. 

У мундақ деди: «кәспий тәнһәрикәт билән мән төт йешимдин тартип шуғуллинишқа башлидим, йәни тәнһәрикәт уссулидин десәм болиду. Буму тәнһәрикәт түрлириниң бири болуп һесаблиниду. Әркин муштлишиш вә башқиму челишиш түрлири бойичә мән 12 йешимдин тартип шуғулландим. Дәсләптә қирғизистанда өткән тайеквандо, йәни аяқ билән муштлишиш бойичә җумһурийәтлик мусабиқидә йеңилип қелип, үчинчи орунға игә болған идим. Мән шу вақитта буниң мениң тәнһәрикәт түрүм әмәсликини чүшәндим. Дәсләпки мусабиқиләрдә чемпийон болғанлардин һәқиқий чемпийонлар туғулмайдикән, чүнки һәқиқий чемпийон бәлгилик бир мусапини бесип өтүши керәк икән. Мән тунҗи қетим дуня чемпийони атиқиға 2012-йили русийәниң анапа шәһиридә өткән кикбоксиң бойичә мусабиқидә муйәссәр болдум. Әмди 2016-йили тайланд пайтәхти баңкокта өткән тайландчә муштлишиш бойичә дуня мусабиқисидә мән икки қетим бирақла чемпийон болдум. Мундақ дегиним, мәсилән, бүгүн тәнтәрбийә һәвәскарлири арисида дуня чемпийони болған болсам, әтиси кәспий маһирлар арисида чемпийон болдум. Үчинчи қетим 2017-йили, йәнә шу баңкок шәһиридә өткән мусабиқидә чемпийон болдум». 

Шәһризат хәлилованиң сөзлиригә қариғанда, 2018-йили апрел ейида баңкок шәһиридә өткән тайландчә муштлишиш бойичә дуня мусабиқисигә 80 дин ошуқ мәмликәттин тәнһәрикәтчиләр қатнашқан икән. У өз салмиқида дәсләптә русийә вә гиретсийә тәнһәрикәтчилирини, ахирида болса, португалийә тәнһәрикәтчисини йеңип чиқип, төт қетим дуня чемпийони дегән атаққа еришкән.

Шәһризат хәлилова йәнә өзиниң тәнһәрикәтниң башқиму түрлири бойичә мусабиқиләргә қатнашқанлиқини оттуриға қойди: «корейәниң чинду вә сеул шәһәрлиридә өткән кикбоксиң бойичә асия мусабиқисидә, қазақистанниң астана шәһиридә өткән бокс бойичә асия мусабиқисидә, шундақла русийәниң москва шәһиридә өткән нәйзилишип-җәң қилиш бойичә дуня мусабиқисидә, иранниң керманшаһ шәһиридә өткән карате бойичә дуня мусабиқисидә вә башқиму һәр дәриҗилик мусабиқиләрдә мән мукапатлиқ орунларға ериштим.»

Шәһризат хәлилова өзиниң келәчәктә тәнһәрикәтниң һәр хил түрлири бойичә олимпик мусабиқилиригә қатнишиш арзусиниң бар икәнликини билдүрди. 

Қирғизистанда нәшр қилинидиған «иттипақ» гезити баш муһәрририниң орунбасари абдурәһим һапизофниң ейтишичә, ахирқи йиллири қирғизистанда бир қатар яш уйғур тәнһәрикәтчилири тәрбийәлинип чиққан болуп, улар асия вә дуня мусабиқилиригә қатнашмақта һәм яхши нәтиҗиләрни көрсәтмәктикән. У мундақ деди: «мәсилән, 18 яшлиқ камил сабитоф ат миниш тәнһәрикити бойичә қирғизистанниң бир нәччә қетимлиқ чемпийони. У хәлқара мусабиқиләрдә 1-вә 2-орунларни игилигән. яш болғиниға қаримай, тәҗрибилик тәнһәрикәтчи. 17 яшлиқ һәсән бавудуноф қиличвазлиқ бойичә асия чемпийони. Бу иккиси қирғизистан талланма командисиниң әзалири. Әкбәр һейтахуноф болса тайеквандо бойичә дуня чемпийони. У башқа әлләрдики мусабиқиләргиму актип қатнишиватиду. 21 яшлиқ халмурат ибраһимоф гирек-римчә елишиш бойичә қирғизистан чемпийони. Дәвран садиқоф русийәниң йекатеринбург шәһиридә болуп өткән гирек-римчә елишишниң чемпийони болди.»

Абдурәһим һапизоф яш тәнһәрикәтчиләрниң йетилип чиқишида тәнһәрикәт кулублириниң һәм тиренерларниң төһписиниң алаһидә икәнликини тәкитләп, йәнә мундақ деди: «узун йиллардин буян бишкәк шәһиридә ‹бүркүт' тәнһәрикәт кулуби ишлимәктә. Бу кулуб гирек-римчә елишиш бойичә яш тәнһәрикәтчиләрни тәйярлимақта. Кулубта пәрһат һошуроф дегән тренерниң әмгики зор. У тәнһәрикәт маһири. Униң қол астида һәр милләт вәкиллири тәрбийәлиниватиду. Пәрһат һошуроф өткән йили президент қолидин пәхрий ярлиқ алди.» 
Игилишимизчә, өткән әсирниң 60-йиллиридин башлап қирғизистан уйғурлиридин даңлиқ путболчи йүсүп мусайеф, япончә елишиш маһирлири савур әмәтоф вә абдувәли исмайилоф, гирек-римчә елишиш ниң маһирлиридин пәрһат вә шөһрәт һошурофлар, «бүркүт» гирек-римчә елишиш кулубиниң мудири, тәнһәрикәт маһири садиқҗан йүсүпхоҗайеф қатарлиқ уйғур тәнһәрикәтчилири йетишип чиққан. Улар пәқәт уйғурларнила әмәс, бәлки қирғизистанни дуняға тонутқан тәнһәрикәтчиләрдур.

Пикирләр (0)
Share
Толуқ бәт