Чақилиқта мәһкум нәби ғоҗаәхмәтниң тәблиғини аңлиған 82 кишиниң кесилип кәткәнлики ашкариланди

Мухбиримиз шөһрәт һошур
2019-12-16
Елхәт
Пикир
Share
Принт

Хитайниң лагерлар һәққидики мәхпий һөҗҗәтлири қатарида ашкариланған чақилиқ наһийәсигә аит бир сот һөкүми һәққидә елип барған ениқлашлиримиз давамида мәһкум нәби ғоҗаәхмәткә четилип, җәмий 82 кишиниң кесилип кәткәнлики ашкариланди. Мәлум болушичә, нәби ғоҗаәхмәтниң «шәһваний филим» ләрни көрмәслик тоғрисидики әхлақ тәрбийәсини аңлиғанлиқи үчүн «топлишип җәмийәт тәртипини бузуш» вә «дөләтни парчилашқа урунуш» җинайити билән әйибләнгән бу мәһкумлар алди 10 йил, арқиси 5 йил 6 айлиқтин кесилгән.

Мәхпий һөҗҗәтләр қатарида ашкариланған мәзкур сот һөкүмнамисидә мәһкумниң «топлишип җәмийәт тәртипини бузуш» биләнму әйибләнгәнлики баян қилинған. Шуңа биз чақилиқ наһийәлик сот мәһкимисиниң мәлум бир бөлүм башлиқи билән өткүзгән сөһбитимиз давамида мәһкум нәби ғоҗаәхмәтниң делосиға кимләрниң четилғанлиқи вә уларниң ақивити һәққидә мәлумат соридуқ. Мәзкур хадим делониң сот һөкүмидә дейилгәндәк, 315-дөләт ташйоли бойидики бир шеғил завутида йүз бәргәнлики, йәни мәһкум нәби ғоҗаәхмәтниң шу шеғил завутида чедирда йетип-қопуп ишләватқан ишчиларға аталмиш қанунсиз тәблиғ қилғанлиқини дәлилләш билән бирликтә униң делосиға четилип 100 гә йеқин кишиниң тутқун қилинғанлиқини баян қилди.

Сот һөкүмидә мәһкумниң әслидә қарақаш наһийә базар ичигә нопуслуқ икәнлики қәйт қилинған. Қарақаш базар ичидики бир кәнт сақчиси чақилиқта нәби ғоҗаәхмәт делосиға четилип кесилгәнләрниң мутләқ көпинчисиниң өз кәнтидин икәнлики вә саниниң 82 нәпәр икәнликини ашкарилиди. Арилирида икки нәпәр аялму бар болған, 18 яш билән 60 яш арисидики 82 кишиниң «қанунсиз тәблиғ аңлаш» вә «дөләтни парчилашқа урунуш» билән әйиблинип алдиниң 10 йил, арқисиниң 5 йил 6 айлиқ кесилгәнликини тилға алди.

Биз чақилиқтики сот хадимидин мәзкур һөкүмнамә хәлқараға ашкариланғандин кейин мәзкур сот мәһкимиси ичидә мәсулийәт сүрүштә қилиш әһвалиниң йүз бәргән яки бәрмигәнлики һәққидиму мәлумат соридуқ. У бу җәһәттә пикир баян қилишни халимайдиғанлиқини билдүрди.

Илгирики ениқлашлиримиздин мәлум болушичә, аталмиш «қанунсиз тәблиғ» ни аңлиғанлиқи үчүн тутулуш вә кесилиш қисмитигә дуч кәлгәнләр ялғуз чақилиқ наһийәси биләнла чәкләнмәйдикән. Ғулҗа наһийәсидики бир тәрбийәләш мәркизигә қарита елип барған телефон зияритимиз давамида мәзкур лагерда йетиватқан бир тутқун өзиниң 10 йил бурун мәһәллисидики бир тойда тәблиғ аңлап қалғанлиқи үчүн лагерға соланғанлиқини паш қилған иди.

Биз чақилиқтики сот хадимидин қурулушта ишләветип тәблиғ аңлиғанлиқи үчүн кесиветилгән бу 82 кишиниң нөвәттә нәдә икәнлики вә уларниң аилисигә кимләр қараватқанлиқи һәққидә соал сорунимизда у соалимизниң чәктин ашқанлиқини билдүрүп, бу һәқтиму җаваб беришни рәт қилди.

Пикирләр (0)
Share
Толуқ бәт