Хитайниң олимпик бихәтәрликидә хизмәт көрсәткән сиясий комиссар абликим ғопурму қамақта

Мухбиримиз шөһрәт һошур
2019-08-20
Елхәт
Пикир
Share
Принт
2018-Йили 6‏-айда тутқун қилинған, 2008-йилидики олимпик мәзгилидә кучада йүз бәргән қаршилиқ һәрикәтлирини бастурушта актип рол алған абликим ғопур.
2018-Йили 6‏-айда тутқун қилинған, 2008-йилидики олимпик мәзгилидә кучада йүз бәргән қаршилиқ һәрикәтлирини бастурушта актип рол алған абликим ғопур.
baike.com

Мәлум болушичә, хитайниң 2008-йилидики олимпик мәзгилидә кучада йүз бәргән қаршилиқ һәрикәтлирини бастурушта актип рол алған вә мукапатланған куча наһийәлик җ х идарисиниң сиясий комиссари абликим ғопур, өткән йили 6‏-айда тутқун қилинған. Аңлиғучилиримиздин бири йәткүзгән бу учур, мухбиримизниң куча наһийәсидики сақчи хадимлирини зиярәт қилиши давамида дәлилләнди.

Чәтәлдики, исмини ашкарилашни халимиған кучалиқ муһаҗирлардин бири, хитайниң бейҗиң олимпики мәзгилидә кучада йүз бәргән қаршилиқ һәрикәтлирини бастурушта актип рол ойниған вә мукапатланған куча наһийәлик җамаәт хәвпсизлик идарисиниң сиясий комиссари абликим ғопурниң нөвәттә қамақта икәнликини мәлум қилди. Тәләфонимизни қобул қилған куча наһийәлик җ х идарисиниң бир хадими өзлири сиясий өгиниш вақтида көрүватқан сақчи ибрәт филимида абликим ғопурниңму барлиқини тилға елиш арқилиқ униң тутқунда икәнликини дәлиллиди.

Аңлиғучимиздин кәлгән инкаста, абликим ғопурниң илгири кучада йүз бәргән қаршилиқ һәрикәтлирини бастурушта актип рол ойниғанлиқи вә бу сәвәблик һөкүмәт тәрәптин мукапатланғанлиқи әскәртилгән. Мәзкур сақчи хадими сабиқ сиясий комиссар абликим ғопурниң иккийүзлимичилик билән әйиблинип тутулғанлиқини ашкарилиди. Әмма у конкрет қайси вәқә яки қайси шәхсләргә қарита аталмиш иккийүзлимичилик қилғанлиқи һәққидә мәлумат берәлмиди.

«Бәйду» учур амбиридики абликим ғопур һәққидә қисқа бир тонуштурушта абликим ғопурниң олимпик мәзгилидики муқимлиқ үчүн әмәлий һәрикити арқилиқ һәссә қошқанлиқи вә бу сәвәбтин «олимпик илғарлири» қатарида мукапатланғанлиқи қәйт қилинған. Әмма олимпик мәзгилидә қайси вәқә яки қайси мәйданда хизмәт көрсәткәнлики тилға елинмиған. Радийомизниң хәвәр архиплирида қәйт қилинишичә, 2008-йили 8-айниң 10-күни йәни олимпик башлинип иккинчи күни кучада зәнҗирсиман партлитиш вәқәси йүз бәргән; вәқәдә куча наһийәлик җ х идариси, баҗ идариси вә сода санаәт идариси қатарлиқ бир түркүм һөкүмәт органлири һуҗумға учриған.

Шинхуа агентлиқиниң шу чағдики хәвиридә баян қилинишичә, мәзкур вәқәдә һуҗумчилар вә сақчилар болуп икки тәрәптин 11 киши өлгән вә 13 киши яриланған. Радийомизға учур йоллиған мәзкур аңлиғучимизниң пәрәз қилишичә, абликим ғопур мана мушу вәқәдә һуҗумчиларни бастуруш вә уларниң аилә-тавабиатлирини җазалашта актип рол алғанлиқи үчүн әйни чағда дағдуғилиқ һалда мукапатланған.

Алақидар сақчи хадиминиң ашкарилишичә, бу йил 54 яшқа киргән абликим ғопур 2018-йилиниң оттурилири тутқун қилинған. Әмма униң нөвәттә кесилгән яки кесилмигән; кесилмигән болса лагер яки қамақта икәнлики мәлум әмәс.

Һөрмәтлик радио аңлиғучилар, юқирида, хитайниң олимпик бихәтәрликидә хизмәт көрсәткән сиясий комиссар абликим ғопурниңму тутқунда икәнлики һәққидә аңлитиш бәрдуқ.

Пикирләр (0)
Share
Толуқ бәт