Тоққузақниң бир кәнтидин мәмәтясин урайим қатарлиқ 57 кишиниң 10 йиллиқтин юқири кесиветилгәнлики ашкариланди

Мухбиримиз шөһрәт һошур
2020-05-27
Елхәт
Пикир
Share
Принт
2017‏-Йилиниң бешида тутулуп кетилип, 10 йиллиқ кесиветилгән мәмәтясин урайимниң қолға елиништин илгирики вә кейинки сүрити.
2017‏-Йилиниң бешида тутулуп кетилип, 10 йиллиқ кесиветилгән мәмәтясин урайимниң қолға елиништин илгирики вә кейинки сүрити.
Oqurmen teminligen

Түркийәдики тоққузақлиқ муһаҗирлардин бири тоққузақниң оғусақ йеза ғоҗила кәнтидики дости мәмәтясин урайимниң 2017‏-йилиниң бешида тутулуп кәткәнликидин хәвәр тапқанлиқи, әмма ақивитидин һечқандақ учур алалмайватқанлиқини мәлум қилған иди. Мухбиримизниң алақидар орунларға қарита елип барған телефон зиярәтлири давамида оғусақниң бир кәнтидинла мәмәтясин урайим қатарлиқ 57 кишиниң 10 йиллиқтин юқири кесиветилгәнлики ашкариланди.

Тоққузақлиқ муһаҗирниң баян қилишичә, бу йил 38 яшларға киргән мәмәтясин урайим күнбойи етиз-ериқ ишлири билән мәшғул болсиму, давамлиқ пакиз кийинип йүрүши, қолум-қошна вә мәһәллә-көй билән мунасивәттә артуқчә гәп-сөз вә талаш-тартишлардин узақ туруши, аилисидин башқа ишларға бәк көңүл бөлүп кәтмәслики қатарлиқ тәрәплири билән мәһәллә җамаитигә тонулған. Шуңа 2017-йилиниң бешида мәмәтясин урайим «тәрбийәләш» кә елип кетилгәндә бу әһвал мәһәллә җамаитигә тасадипий вә һәйран қаларлиқ бир вәқә болуп туюлған.

Инкас қилинишичә, мәмәтясин урайим тутулушниң алдида деһқанчилиқтин ешинған күнлири тоққузақ тәвәликидики завут яки мулазимәт орунлирида ишләмчилик билән шуғулланған. Шуңа биз мәмәтясин һәққидә учур елиш үчүн тоққузақниң оғусақ базиридики бир түркүм иш орунлириға телефон қилдуқ. Вәзийәттин хәвәрдар кишиләрдин бири оғусақта һечқандақ бир ишқа арилашмиған әһвал астидиму сәвәбсиз тутуп кетилгән вә кесиветилгәнләрниң ялғуз мәмәтясин урайим әмәслики, оғусақниң һәр бир кәнтидин йүзләрчә кишиниң кесиветилгәнлики йәнә йүзләрчә кишиниң «тәрбийәләш» тә икәнликини мәлум қилди. Биз бу учурниң тоғра-хаталиқини айдиңлаштуруш үчүн тоққузақ наһийәлик җ. Х. Қоманданлиқ мәркизигә телефон қилдуқ вә улардин оғусақниң ғоҗила кәнти йәни 9‏-кәнттинла җәмий қанчә киши кесилип кәткәнликини соридуқ. Алақидар хадим архиптики тизимликкә қарап туруп мушу бир кәнттинла 57 кишиниң кесилип кәткәнликини тилға алди. Бу хадимниң баянлиридин бу 57 кишиниң көпинчисиниң 25-40 яш арисида икәнлики, аз бир қисминиң 40-55 яш арисида икәнлики мәлум болди.

Мәлум болушичә, бу 57 киши ичидики мәмәтясин урайим қол телефонида аталмиш «зиянлиқ учур» тарқатқанлиқи үчүн тутулған.

Ениқлашлиримиз давамида мәмәтясин урайим тәвә болған 9-кәнт 1-мәһәллидә бир кочидинла 10 кишиниң кесиветилгәнлики ашкариланди. Бу мәһәллә башлиқиниң ашкарилишичә, мәмәтясин урайим әң дәсләптә тоққузақ опалдики лагерға әкетилгән. Мәһәллә кадирлиридин бириниң ашкарилишичә, мәмәтясин урайим тутуп әкетилип бир йилдин кейин аилиси билән екранда көрүштүрүлгән. Мәмәтясин урайимниң екрандики аҗиз қияпити уруқ-туғқанлирини чөчүткән.

Йәнә ашкарилинишичә, 5‏-кәнттин кесиветилгән 57 киши арисида аялларму бар болуп, буларму пәқәт қол телефонида тапшуруп алған яки йоллиған учурлирида «мәсилә» көрүлгәнлики үчүн кесиветилгән.

Мәзкур 57 мәһбусниң төвини 10 йиллиқ, юқириси 25 йиллиқ кесиветилгән. Буларниң көпинчиси тоққузақ опалдики лагерда 1-2 йилчә тутуп турулғандин кейин бәзилири үрүмчидики, бәзилири қәшқәрдики түрмиләргә йөткәлгән. Мәмәтясин урайим нөвәттә қәшқәрдики муш түрмидә җаза муддитини өтимәктикән.

Материялларда көрситилишичә, оғусақ базириниң 2017-йилидики омуми нопуси 20500 болуп, 57 әзаси 10 йиллиқтин юқири кесиветилгән, униң 5‏-кәнти 400 чә аилә 2000 чә нопустин тәшкилләнгән. Әмма бу кәнттин қанчә кишиниң 10 йиллиқтин төвән кесилгәнлики вә қанчә кишиниң техи лагерда икәнлики һазирчә мәлум әмәс.

Пикирләр (0)
Share
Толуқ бәт