Xitayning korlada "Xelq'araliq herbiy ishlar musabiqisi" ötküzmekchi bolushi némidin dérek béridu?

Muxbirimiz sada
2019-08-02
Élxet
Pikir
Share
Print
"Wéybo" torida tarqitilghan xitay quruqluq armiyisining korla shehiride yéqinda ötküzmekchi bolghan "Xelq'araliq herbiy ishlar musabiqisi" heqqidiki sin körünüshi.
"Wéybo" torida tarqitilghan xitay quruqluq armiyisining korla shehiride yéqinda ötküzmekchi bolghan "Xelq'araliq herbiy ishlar musabiqisi" heqqidiki sin körünüshi.
Social Media

Birnechche kün awwal xitayning "Wéybo" torida xongkongdiki xitay azadliq armiyisining her xil ilghar tipliq qorallar, tik uchar we bashqa herbiy esliheler arqiliq tuyuqsiz weqelerni, namayishlarni bir terep qiliwatqan körünüshliri körsitilgen sin körünüshliri tarqitilghan idi. 2-Awghustqa kelgende xitay quruqluq armiyisining korla shehiride yéqinda ötküzülmekchi bolghan "Xelq'araliq herbiy ishlar musabiqisi" heqqidimu bir sin körünüshi tarqaldi.

Xitay quruqluq armiyisi bash bolup körsitilidighan mezkur musabiqe 3-awghusttin 15-awghustqiche ötküzülüshke pilanlan'ghan. "Tengritagh" torining 2-awghusttiki sanida élan qilin'ghan munasiwetlik sin körünüshtin melum bolushiche, bu qétimliq musabiqe 32 tarmaqni öz ichige alidighan bolup, ular "Suwarow hujumi", "Süzük asman", "Bixeter muhit" we "Qoral yasash mahiri" qatarliq jehetlerde élip bérilidighan musabiqiler iken.

"Suwarow hujumi" da asasliq jeng aptomobilliri we tankilarning herqandaq yer shara'itida meshghulat élip baralaydighanliqi we yiraq ariliqni chenlep atidighan miltiqlarning "Iqtidarliri" körsitilidiken. 

Musabiqining "Süzük asman" namidiki türide pilimotlarni hawa boshluqida yüz bergen tuyuqsiz hujumlargha qandaq taqabil turush körsitilidiken. 

"Bixeter muhit" déginide jeng aptomobillirigha qarita élip bérilidighan "Inchike" tekshürüshler, jeng rayonidiki tosalghulardin qandaq qutulup chiqish qatarliqlar körsitilidiken. 

"Herbiy qoral mahiri" dégen türde yéqin we yiraq ariliqqa étilidighan bombardimanchi zembirekler we pilimotlarni jeng meydanida qisqa waqit ichide qurashturulush we uni melum nuqtigha muqimlashturup étishqa teyyarlinish qatarliqlar körsitilidiken. 

Melum bolushiche, xitay azadliq armiyisi buningdin ilgirimu korla shehiride ikki qétim herbiy manéwir ötküzgen iken. Bügünki künde yene korla shehiride we xongkongda bu xil herbiy musabiqilerni élip bérish chet'ellerdiki kishilik hoquq pa'aliyetchilirining qattiq diqqitini qozghimaqtiken. Qazaqistanda turushluq Uyghur siyasiy pa'aliyetchi qehriman ghojamberdi ependi 2-iyul radiyomiz ziyaritini qobul qilip, hakimmutleq tüzümdiki xitay dölitining ichki turaqsizliqi sewebidin özige qarshi pikirde bolghan xelqni basturushta her da'im qoralliq küchlerge tayinidighanliqini hem bu arqiliq dunyagha heywe qiliwatqanliqini bildürdi. 

Xitay hökümitining azadliq armiyisi yaki xitay quruqluq armiyelirini ishqa sélip, Uyghur diyarida jeng manéwiri namidiki heriketler bilen shughullan'ghanliqi heqqidiki uchurlar buningdin ilgirimu xitay axbarat wastilirida keng tarqalghan idi. Buning misalliridin biri xitay azadliq armiyisining tibet aptonom rayonidiki bir herbiy qismining zembirekchiler etriti atalmish heqiqiy "Jeng manéwiri" ötküzüsh namida iyul aylirida Uyghur aptonom rayonining xoten shehirige yötkelgen idi. 

Xitay taratqulirining bu heqte tarqatqan munasiwetlik uchurida bu zembirekchiler etritining ikki etretke bölünüp, bir-birige qarshi atalmish "Jeng manéwiri" élip baridighanliqi, manéwirning asasliq meshiqliri bolsa axbarat razwédkisi, jeng pilani we yiraq ariliqtin zembirek arqiliq zerbe bérish qatarliqlar ikenlikini qeyt qilish bilen birge yene bu "Manéwir" ning axirqi nishani herbiy qoshunning heqiqiy jeng qilish iqtidarini yétildürüsh, xitay azadliq armiyisining döletning zémin pütünlükini qoghdash iqtidarini östürüsh ikenliki heqqide jar salghan idi. 

Közetküchiler bu heqte analiz yürgüzüp, xitay hökümitining Uyghur diyaridiki her qétimliq herbiy yaki jeng manéwirlirini ötküzüshtin burun buni rayonning muqimliqi we bixeterlikini qoghdash nami astida élip baridighanliqini ilgiri sürmekte. 

Undaqta, Uyghur diyari we xongkong heqiqeten xitay hökümitining éytqinidek bixeter rayon emesmu? qehriman ghojamberdi bu heqte söz qilip, xitay hökümiti Uyghur diyari we xongkongni idare qilalishigha ishenchi bolmighanliqtin, mushundaq "Bixeterlik" namida herbiy küchlerni ishqa salidighanliqini éytip ötti.

Qehriman ghojamberdi ependi sözining axirida xitay azadliq armiyisi quruqluq armiye qisimlirining Uyghur diyarida, jümlidin korlada élip bériwatqan bu heriketlirining Uyghurlarning kelgüsi weziyitige körsitidighan tesiri heqqide söz qilip, buning bir pilanliq élip bériliwatqan heriket ikenliki shundaqla bu béyjing da'irilirining Uyghurlarni mutleq kontrolluq astigha élishtiki axiri koziri ikenlikini eskertip ötti.

Toluq bet