Уйғур районидики хели бир қисим йеза-базарларда бу йил қурбан һейт намизиниң оқулмиғанлиқи ашкариланди

Мухбиримиз шөһрәт һошур
2019-08-14
Елхәт
Пикир
Share
Принт
Уйғур дияридики мунарлири билән һилал айлири чеқиветилгән бир мәсчитниң әсли вә һазирқи һалити.
Уйғур дияридики мунарлири билән һилал айлири чеқиветилгән бир мәсчитниң әсли вә һазирқи һалити.
Social Media

Вәзийәттин хәвәрдар кишиләрниң баян қилишичә, бу йил уйғур райониниң көп сандики йеза-базарлирида қурбан һейт намизи оқулмиған, буниңға бир тәрәптин кишиләрдики мәсчиткә бериштин қорқуш сәвәб болған болса, йәнә бир тәрәптин мәсчитләрдә имамлиқ қилғудәк диний затларниң болмаслиқи сәвәб болғаникән. Мухбиримизниң йеза-базарларға қарита елип барған телефон зиярәтлири давамида юқириқи учурларниң тоғрилиқи қисмән дәриҗидә дәлилләнди. Төвәндә мухбиримиз шөһрәт һоқуқниң бу һәқтә тәйярлиған программиси диққитиңларда болиду

Түркийәдә яшаватқан вә өз кимликини ашкарилашни халимиған бирәйлән, уруқ-туғқан вә дост-бурадәрлиридин аңлиғанлириға асасән, уйғур райониниң көп сандики йеза-базарлирида бу йил қурбан һейт намизиниң оқулмиғанлиқини мәлум қилди. Ақсу, қәшқәр вә хотәнләрдин телефонимизни қобул қилған сақчи хадимлириму, юқириқи учурниң тоғрилиқини рәт қилмиди. Мәзкур вәзийәттин хәвәрдар кишиниң баян қилишичә, йеқинқи үч йилда лагерға әкетилгәнләрниң мутләқ көпинчиси мәсчиткә барған вә яки мәсчит сиртида намаз оқуғанлиқи үчүн тутқун қилинғачқа, аһалиләр бу һейт намизида мәсчиткә бериштин қорққан. Асасий қатламдики көпинчә кадир вә сақчиларму һейт намизиға беришкә рухсәт бар яки йоқлуқи һәққидә ениқ бир гәп қилмиған. Ақсу гүллүк йеза сақчи хадимиму, бу йил һейт намизиниң оқулған-оқулмиғанлиқи һәққидики соалимизға җаваб берәлмиди.

Вәзийәттә хәвәрдар кишиниң баян қилишичә даириләр пәқәт хәлқара җамаәтниң көзини бояш үчүнла шәһәр мәркәзлиридики бир қисим мәсчитләрдә һейт намизи оқулушқа рухсәт қилған, әмма җәмийәттә бу мәсчитләрни толдурғудәк дәриҗидә киши болмиғачқа бир қисим йеза кадирлири, лагер сиртида қалған аз сандики кишиләрни һейт намизиға беришқа вә мәсчит алдида сама ойнашқа риғбәтләндүргән һәм тәшкиллигән. Лоп базарлиқ сақчи хадими бу һәқтики соалимизға җаваб бәрмиди. Сақчи хадимлири һейтлиқ бихәтәрлик тәдбирлири һәққидә мәлумат бәргән болсиму, бу мәсчиткә алақидар тәдбирләрни тилға алмиди. 

Вәзийәттин хәвәрдар кишиниң баян қилишичә, бу қетим һейт намизиға адәм бармаслиқта, даириләрниң вақтида вә ениқ бир уқтуруш чиқармиғанлиқи шундақла аһалиләрниң хаталишип қелиштин қорқуш вә лагерға әкетилиш әндишисидин башқа, көпинчә мәһәллиләрдә диний затларниң қалмиғанлиқи вә уларниң мутләқ көпинчисиниң түрмә яки лагерға солақлиқ икәнлики сәвәб болған. 

Телефонимизни қобул қилған или чапчалдики бир кәнт кадири, өз тәвәликидә диний затларниң қалмиғанлиқини дәлиллиди. Илгири зияритимизни қобул қилған қариқашниң ява йеза сақчи хадими бу йезидики диний затларниң 60% тиниң лагерда икәнликини ашкарилиғаниди. 

Шаяр наһийәсидики аһалиләрдин бири бу йил һейт намизиға қатнашмиғанлиқини ейтти; әма немә үчүн қатнашмиғанлиқи һәққидә гәп қилалмиди. 
Ақсудики йәнә бир сақчи хадими, әгәр аһалиләрдин бирәри өзидин мәсчиткә бериш-бармаслиқ һәққидә мәслиһәт сорап қалса, бармаслиқни тәшәббус қилидиғанлиқини баян қилиш арқилиқ бу йилқи сиясий һавада, һейт намизиға беришниң хаталиқ санилидиғанлиқини дәлиллиди.

Пикирләр (0)
Share
Толуқ бәт