Uyghur urush qehrimanlirining süretliri qirghizistan we rusiyede ötküzülgen "Ölmes polk" namayishidin orun aldi

Ixtiyariy muxbirimiz féruze
2019-05-09
Élxet
Pikir
Share
Print
Qirghizistandiki Uyghurlar ikkinchi dunya urushida qurban bolghan Uyghur jengchilerni xatirilep namayish ötküzmekte. 2019-Yili 9-may. Bishkek, qirghizistan.
Qirghizistandiki Uyghurlar ikkinchi dunya urushida qurban bolghan Uyghur jengchilerni xatirilep namayish ötküzmekte. 2019-Yili 9-may. Bishkek, qirghizistan.
RFA/Feruze

Bügün, yeni 9-may amérika, sowétlar ittipaqi we en'gliye qatarliq ittipaqdash döletler armiyisi 1945-yili 5-ayning 9-küni natsistlar gérmaniyesini meghlup qilghan, ikkinchi dunya urushi yawropada axirlashqan ghalibiyet künidur. Sabiq sowétlar ittipaqi dewride her yilining 9-may küni "Ulugh weten urushining ghalibiyet küni" süpitide xatirilinip kélin'gen idi. Sowétlar ittipaqi yiqilghandin kéyin uning terkibidin parchilinip musteqil bolghan memliketlerde bügün'ge qeder bu kün bayram süpitide xatirilinip kélinmekte.

Rusiyede we sabiq sowétlar ittipaqidin parchilinip musteqil bolghan memliketlerde bu kün munasiwiti bilen "Ulugh weten urushi" ning ghalibiyet simwoli bolghan "Ölmes polk" namayishi ötküzülüp kélinmekte. Mezkur namayishning meqsiti ikkinchi dunya urushida jasaret körsetken urush qehrimanlirining namlirini untumasliq, tinchliqni saqlap, xelq'ara birlikini terghib qilishtin ibarettur.

9-May küni qirghizistanda we rusiye fédératsiyesining bezi sheherliride "Ölmes polk" namayishi ötküzüldi. Namayishchilar özlirining "Ulugh weten urushi" gha qatnashqan we urushta qurban bolghan ejdadlirining resimlirini kötürüp chiqishti. Namayishqa qatnashqan oqughuchilar, yashlar we her xil teshkilatlarning wekilliri ikkinchi dunya urushida wetini üchün xizmet körsetken, eyni waqitta "Sowét ittipaqining qehrimani" dégen namlargha érishken urush qehrimanlirining süretlirini kötürüp namayishqa qatnashti. 

Urush qehrimanlirining qatarida Uyghur jengchilerdin sülhi lutpullayéf, dadash babajanof, mesim yaqupof we shundaqla eyni waqitta ordén-médallargha érishken ataqliq kishilerdin akadémik eziz narinbayéf we bashqa qehrimanlarning süretliri orun aldi.

Mezkur namayishqa qirghizistan Uyghurliri "Ittipaq" jem'iyiting re'isi artiq hajiyéfning bashchiliqida yashlar komitétining ezaliri pa'al qatnashti. Ular fashizmgha qarshi urushta Uyghur xelqining bashqa xelqler bilen birlikte mürini mürige tirep jeng qilghanliqini, Uyghur eskerlerning bu urushta xizmet körsitip yuqiri ordén we médallargha érishkenlikini namayish qildi.

Namayishqa qatnashqan küresh eysa ziyaritimizni qobul qilip, öz tesirati we pikirlirini bayan qilip ötti. 

Namayishchilar urush qehrimanlarning süretlirini kötürüshüp, bishkek shehirining asasliq kochilirini aylinip, töt sa'ettek yol yürüshti. Ular namayish jeryanida özlirining milliy kimlikini gewdilendürüsh üchün Uyghur doppilirini bashlirigha kiyiwaldi.

Igilishimizche, bügün yene rusiyening nowosibirsk shehiridimu namayish bolghan. Bu namayishqa xemit toxtiyéf bashchiliqidiki Uyghurlarning "Weten" jem'iyiti we uning ezalirimu qatnashqan. Ular namayish jeryanida üch neper Uyghur urush qehrimanining süritini kötürüp chiqqan shundaqla ikkinchi dunya urushigha qatniship qurban bolghanlarning süretlirinimu élip chiqishqan. Ular namayish jeryanida fashizmgha qarshi urushta Uyghurlarningmu tégishlik töhpisi barliqini, köpligen Uyghur jengchilerning sabiq sowétlar ittipaqi teripidin "Urush qehrimani" ordénlirigha érishkenlikini körsitip ötken.

Radiyomiz ziyaritini qobul qilghan siyasiy penlerning magistir namzati rehimjan hapizi fashizmgha qarshi urushta Uyghur xelqining körsetken tirishchanliqliri hemde Uyghurlarning bügünki éghir weziyiti weziyiti heqqide pikir bayan qildi.

Bügünki xatirilesh künide yene qirghizistan Uyghurliri "Ittipaq" jem'iyiti bilen qirghizistan jumhuriyiti "Sambo" fédératsiyesining hemkarliqida "Ghalibiyet küni" ge béghishlan'ghan "Sowét ittipaqining qehrimani" dégen unwanigha érishken Uyghur jengchilerge atap tenheriket musabiqisi ötküzdi.

Toluq bet