Вашингтон шәһридә «5-феврал ғулҗа вәқәси» ни хатириләш намайиши болди

Мухбиримиз әзиз
2020-02-05
Елхәт
Пикир
Share
Принт
Вашингтон шәһридики хитай әлчиханиси алдида өткүзүлгән «5-феврал паҗиәси»ниң 23 йиллиқини хатириләш намайиши, 2020-йили 5-феврал, вашингтон шәһри
Вашингтон шәһридики хитай әлчиханиси алдида өткүзүлгән «5-феврал паҗиәси»ниң 23 йиллиқини хатириләш намайиши, 2020-йили 5-феврал, вашингтон шәһри
RFA/Aziz

Муһаҗирәттики уйғурлар үчүн қайғу вә ғәзәптин дерәк беридиған күнләрдин  бирнәччиси болуп, шуниң бири «5-феврал паҗиәси»ниң аччиқ хатирисидур.

Хитай һөкүмитиниң адалитигә ишәнгән һәмдә шуни үмид қилған бир топ уйғур яшлири 1997-йили 5-феврал күни ғулҗа шәһридики җандин өткүдәк соғуққа қаримастин тинчлиқ шәклидә намайиш тәшкилләп, өзлириниң әқәллий әркинлик вә баравәрлик һәққидики тәләплирини оттуриға қойған иди. Әмма уйғур яшлириниң бу тинчлиқ намайишини хитай һөкүмити һәрбий қисимлар арқилиқ қанлиқ бастуруп ташлиди. Шу қетимлиқ бастурушта қанчилик уйғур яшлириниң тутқун қилинғанлиқи, қанчилик кишиниң етиветилгәнлики һәққидә көп хил мәлуматлар оттуриға чиқиватқан болуп, намайишниң һәқиқи әһвалиму йилларниң өтүшигә әгишип шаһидларниң баянлиридиму барғансери айдиңлишип маңмақта.

Әнә шуниңдин буянқи 23 йил мабәйнидә дуняниң һәрқайси җайлиридики уйғур муһаҗирлири һәр йили 5-феврал күни хилму-хил паалийәтләр арқилиқ бу паҗиәдә һаятидин айрилған шеһидләрни яд етип кәлмәктә.

2020-Йили 5-январ күниму америкиниң шәрқий қирғиқидики бир қисим уйғур җамаити «уйғур кишилик һоқуқ қурулуши» вә «америка уйғур бирләшмиси» ниң тәшкиллиши билән ай-юлтузлуқ көк байрақларни ләпилдәткән һалда пайтәхт вашингтон шәһригә җайлашқан хитайниң баш әлчиханиси алдиға топланди.

Намайишчилар сепидики «хәлқара уйғур кишилик һоқуқ вә демократийә фонди җәмийити» ниң рәси рабийә қадир ханим намайиштин илгири зияритимизни қобул қилип, бу қетимқи намайишниң аддийла бир қетимлиқ намайиш әмәсликини билдүрди.

Намайиш алдида  америкадики уйғур паалийәтчиләрдин зубәйрә шәмсидин сөз елип өзлириниң һечқачан шеһидләрни унтумайдиғанлиқини алаһидә баян қилди.

Шуниңдин кейин  намайишчилар «уйғурларға әркинлик!», «хитай, шәрқий түркистандин йоқал!» дегәндәк шоарларни үнлүк товлап уйғурларниң йүрәк сөзлирини һәмдә уларниң янмас ирадисини намайән қилди.

Намайиш мәйдандики ай-юлтузлуқ көк байрақлар хитай әлчиханисиниң чоққисиға қадалған қизил байрақ билән рошән селиштурма һасил қилған һалда шамалда тохтимай ләпилдимәктә иди. Намайиш арилиқида уйғур кишилик һоқуқ қурулушиниң мудири өмәр қанат бу намайиш арқилиқ хитай һөкүмитигә уйғурларниң қайтмас ирадисини билдүрүшкә  болидиғанлиқини алаһидә әскәртти.

5-Феврал күни дуня уйғур қурултийи, уйғур кишилик һоқуқ қурулуши қатарлиқ тәшкилатларму җиддий баянатларни елан қилди. Бу баянатларда хитай һөкүмитиниң әң аз дегәндиму өткән 23 йил җәрянида уйғурларни бастуруш һәркитини барғансери ашуруп меңиватқанлиқини, нөвәттә милйонлиған уйғурниң лагерға қамилиши билән бу хил бастуруш вә тәқибниң әң юқури пәллиси яритилғанлиқи алаһидә әскәртилди.

Пикирләр (0)
Share
Толуқ бәт