Myunxéndiki "Boghda Uyghur mektipi" ning kölimi zoraymaqta

Ixtiyariy muxbirimiz ekrem
2020-03-09
Élxet
Pikir
Share
Print
"Méhriban anilar" dep atilidighan "Gérmaniye Uyghur anilar birliki" ning qarmiqida qurulghan "Boghda Uyghur mektipi" ning échilish murasimidin körünüsh. 2020-Yili 7-mart, myunxén.
"Méhriban anilar" dep atilidighan "Gérmaniye Uyghur anilar birliki" ning qarmiqida qurulghan "Boghda Uyghur mektipi" ning échilish murasimidin körünüsh. 2020-Yili 7-mart, myunxén.
RFA/Ekrem

7-Mart küni gérmaniyening myunxén shehiridiki "Méhriban anilar" dep atilidighan "Gérmaniye Uyghur anilar birliki" ning qarmiqida qurulghan "Boghda Uyghur mektipi" ning échilish murasimi ötküzüldi.

Myunxén shehiride yashaydighan Uyghur ziyaliysi peride xanimning échilish murasimida qilghan sözlirige asaslan'ghanda, bu mektep yéngidin 4 sinipqa érishken bolup, bu siniplarda Uyghur perzentlirige Uyghur ana tili asas qilin'ghan halda türlük penniy, diniy bilimler hemde Uyghur medeniyet-sen'iti, örp-adetliri ögitilidiken.

Myunxén shehiridiki jama'et erbabi ablimit tursun ependining tilgha élishiche, 7-mart künidiki bu mektepning échilish murasimi daghdughiliq ötküzülgen. Uning bildürüshiche, "Boghda Uyghur mektipi" ning deslepki asasi Uyghur diyaridiki jaza lagérlirining zulumi ewjige chiqqan 2018-yili xitayning Uyghur milliy kimlikige qiliwatqan tajawuzigha qarshi qurulghan. "Boghda Uyghur mektipi" 2 yildin buyan tereqqiy qilip, uning hazirqi oqughuchilirining sani yüzdin halqip ketken.

"Gérmaniye Uyghur anilar birliki" ning ezaliridin helime xanim "Boghda Uyghur mektipi" ning échilish murasimida qilghan sözide "Méhriban anilar" ning hazirgha qeder myunxénda élip barghan pa'aliyet da'irisi toghrisida qisqiche chüshenche bérip, "Méhriban anilar" ning gérmaniyediki Uyghur jama'itining qizghin qollishi, yar-yölekte bolushigha muyesser bolup kéliwatqanliqini eskertken.

Uyghur ziyaliysi ablimit tursun ependi bu heqte toxtalghanda Uyghur millitining béshigha tolimu qabahetlik bir zaman kelgen bügünkidek bir weziyette muhajirettiki Uyghur perzentlirini wetinige, bayriqigha, milliy kimlikige ige qilip terbiyelep yétishtürüshning tolimu zörürlükini tekitlidi. U bu xildiki ishtin sirtqi mekteplerni Uyghurlar topliship olturaqlashqan dunyaning herqaysi döletliride tesis qilishni teshebbus qildi.

"Boghda Uyghur mektipi" ikki yildin buyan myunxén shehiride köp qétim türlük sen'et pa'aliyetlirini ötküzüp kelgen idi. Mezkur mektepning mes'ulliridin peride xanimning bayan qilishiche, 1-mart ötküzülgen qoyuq milliy puraqqa ige bolghan "Uyghur ana til pa'aliyiti" murasimi gérmaniyediki Uyghurlarning qizghin alqishlirigha sazawer bolupla qalmay, dunyaning herqaysi jayliridiki Uyghur jama'itining yaxshi bahasigha érishken. Bu mektep derslerdin sirt, yaz mezgilliridiki tetillerde yene Uyghur oqughuchilarni dala seylilirige élip chiqishni dawamlashturidiken.

Toluq bet