Eziz nurumof "Jyu-jitsu", yeni braziliyeche erkin chélishish türi boyiche chémpiyon boldi

Ixtiyariy muxbirimiz oyghan
2019-04-24
Élxet
Pikir
Share
Print
Nur-sultan shehiride otken biraziliyede jyu-jitsu boyiche musabiqe chémpiyoni eziz nurumof(ongda) armanjan rozakunof bilen. 2019-Yil 4-aprél
Nur-sultan shehiride otken biraziliyede jyu-jitsu boyiche musabiqe chémpiyoni eziz nurumof(ongda) armanjan rozakunof bilen. 2019-Yil 4-aprél
RFA/Oyghan

Qazaqistanliq Uyghur yash mahir eziz nurumof yéqinda qazaqistan paytexti astanada ötküzülgen "Jyu-jitsu", yeni braziliyeche erkin chélishish musabiqiside 94 kilogramliqlar boyiche chémpiyon boldi.

Igilishimizche, qazaqistandiki Uyghur yashlirining tenheriketning her xil türlirige bolghan qiziqishi barghanséri kücheymekte. Uyghur qiz-yigit mahirlarning her xil derijide we da'iride ötküzülüwatqan dunyawi musabiqilerge qatniship, chong utuqlargha érishiwatqanliqi melum bolmaqta.

Yéqinda qazaqistan paytexti nur-sultan (ilgiriki astana) shehiride ötküzülgen "Jyu-jitsu", yeni braziliyeche erkin chélishish we mushtlishishning néwaza sistémisigha, yeni bu sahediki kespiy chélishchilarning musabiqisige Uyghur mahirlirimu qatnashqan. Bu qétimliq musabiqide 94 kilogramliqlar boyiche Uyghur mahir eziz nurumof birinchilikke ériship, chémpiyon boldi. U mushu netijisi bilen "Jyu-jitsu" türi boyiche "Qazaqistan jumhuriyitining tenheriket mahiri" dégen namgha érishken hemde jumhuriyetlik musabiqige yollanma alghan.

1984-Yili almuta shehiride tughulup, hazir nur-sultan shehiride yashawatqan eziz nurumof radiyomiz ziyaritini qobul qilip, mundaq dédi: "Birinchi musabiqem astanada boldi. Tunji qétim shu yerde ötküzülgen musabiqide ikkinchi boldum. Ikkinchi qétim bu yil aprél éyida astana shehiri nur-sultan namini alghanda birinchi boldum. Bizning armanjan rozaxunofning 'alyans' dégen namdiki braziliyeche jyu-jitsu akadémiyesi bar. U yarkendlik Uyghur balisi. Hazir bizning Uyghur baliliri ebu-zebide chong musabiqide boluwatidu."

Igilishimizche, "Alyans" namidiki braziliyeche jyu-jitsu akadémiyesi armanjan rozaxunofning teshebbusi bilen 2010-yili qurulghan bolup 40 tin oshuq dunya chémpiyonlirini teyyarlap chiqqan. Akadémiye shagirtliri arisida yawropa hem asiya chémpiyonlirimu yétiship chiqqan. Hazir jumhuriyetning her qaysiy jayliridiki akadémiye kulublirida 1000 din oshuq yash ösmürler meshqlenmekte.

Eziz nurumof sözini yene mundaq dep dawam qildi: "Braziliyeche jyu-jitsu arilash bolup, uning ichige élishish, chélishish, erkin chélishish we bashqilar kiridu. Omumen braziliyeche jyu-jitsu qazaqistan'gha 2008-yili keldi. Uni biraziliyedin armanjan rozaxunof özi birinchi bolup élip keldi. Armanjan shuning tunji qara belwagh igisi. Hazir qazaqistandiki Uyghur yashliri braziliyeche jyu-jitsugha zor diqqette boluwatidu. Aldimizda olimpik musabiqilirige kiridighan niyetlirimiz bar. Hazir asiya musabiqilirige kirdi. Armanjan özining qolida galina dégen yétim qizni béqiwatidu. U türkmenistanda ötken asiya musabiqiside birinchi orunni aldi. Emdi awghust-séntebirde qazaqistan boyiche musabiqe bolidu. Hazir shuninggha teyyarliq qiliwatimiz."

Eziz nurumofning éytishiche, braziliyeche jyu-jitsu türh boyiche dunya musabiqisi her yili ereb birleshme xelipilikining paytexti ebu-zebide ötküzülüp turidiken. U öziningmu qattiq meshiqlinip, kéler yili shuninggha qatnishish pilani bar ikenlikini bildürdi.

Igilishimizche, ötken yili girétsiye paytexti afinada ötküzülgen braziliyeche "Jyu-jitsu", yeni erkin chélishish we mushtlishish boyiche dunya musabiqiside 12 yashliq Uyghur qizi adilem hoshurowa chémpiyon bolghan idi.

Uyghur baliliri buningdin tashqiri yene boks, kikboksing, yeni erkin mushtlishish, karaté, yeni qa'idisiz chélishish, ushu-sanda, yeni chambashchiliq, kungfu, yeni gumpa körsitish we tenheriketning bashqimu türliri boyiche musabiqilerge qatniship kelmekte.

Qazaqistanning "Fré sparring" tenheriket birleshmisining trénéri, ushu-sanda boyiche dunya chémpiyoni xemit toxtaxunof Uyghur qiz-yigitliridin boks boyiche bir qatar chémpiyonlarning yétilip chiqqanliqini otturigha qoyup, mundaq dédi: "Bizning birleshmidin muxpul zulyarof her tereplimilik mushtlishish boyiche chémpiyon boldi. Boks boyiche dunyaning kümüsh médali chémpiyoni rénat qurbanof boldi. U kélerki musabiqige teyyarliniwatidu. Uningdin bashqa éghir derijilikler boyiche bizning hézim hézbaqiyéf hazir amérikada. U emdiki musabiqeni mushu küzde ötküzidu. Uninggha ümidimiz zor. Uningdin bashqa boks boyiche qazaqistan komandisida dilmurat mijitof we rena perhatowalarmu bar."

Xemit toxtaxunofning éytishiche, hazir boks boyiche yash ösmürler arisidinmu yétilip chiqiwatqan talantliq Uyghur baliliri köp iken.

Toluq bet