Әзиз нурумоф «җю-җитсу», йәни бразилийәчә әркин челишиш түри бойичә чемпийон болди

Ихтиярий мухбиримиз ойған
2019-04-24
Елхәт
Пикир
Share
Принт
Нур-султан шәһиридә откән биразилийәдә җю-җитсу бойичә мусабиқә чемпийони әзиз нурумоф(оңда) арманҗан розакуноф билән. 2019-Йил 4-апрел
Нур-султан шәһиридә откән биразилийәдә җю-җитсу бойичә мусабиқә чемпийони әзиз нурумоф(оңда) арманҗан розакуноф билән. 2019-Йил 4-апрел
RFA/Oyghan

Қазақистанлиқ уйғур яш маһир әзиз нурумоф йеқинда қазақистан пайтәхти астанада өткүзүлгән «җю-җитсу», йәни бразилийәчә әркин челишиш мусабиқисидә 94 килограмлиқлар бойичә чемпийон болди.

Игилишимизчә, қазақистандики уйғур яшлириниң тәнһәрикәтниң һәр хил түрлиригә болған қизиқиши барғансери күчәймәктә. Уйғур қиз-йигит маһирларниң һәр хил дәриҗидә вә даиридә өткүзүлүватқан дуняви мусабиқиләргә қатнишип, чоң утуқларға еришиватқанлиқи мәлум болмақта.

Йеқинда қазақистан пайтәхти нур-султан (илгирики астана) шәһиридә өткүзүлгән «җю-җитсу», йәни бразилийәчә әркин челишиш вә муштлишишниң неваза системисиға, йәни бу саһәдики кәспий челишчиларниң мусабиқисигә уйғур маһирлириму қатнашқан. Бу қетимлиқ мусабиқидә 94 килограмлиқлар бойичә уйғур маһир әзиз нурумоф биринчиликкә еришип, чемпийон болди. У мушу нәтиҗиси билән «җю-җитсу» түри бойичә «қазақистан җумһурийитиниң тәнһәрикәт маһири» дегән намға еришкән һәмдә җумһурийәтлик мусабиқигә йолланма алған.

1984-Йили алмута шәһиридә туғулуп, һазир нур-султан шәһиридә яшаватқан әзиз нурумоф радийомиз зияритини қобул қилип, мундақ деди: «биринчи мусабиқәм астанада болди. Тунҗи қетим шу йәрдә өткүзүлгән мусабиқидә иккинчи болдум. Иккинчи қетим бу йил апрел ейида астана шәһири нур-султан намини алғанда биринчи болдум. Бизниң арманҗан розахунофниң ‹алянс' дегән намдики бразилийәчә җю-җитсу академийәси бар. У яркәндлик уйғур балиси. Һазир бизниң уйғур балилири әбу-зәбидә чоң мусабиқидә болуватиду.»

Игилишимизчә, «алянс» намидики бразилийәчә җю-җитсу академийәси арманҗан розахунофниң тәшәббуси билән 2010-йили қурулған болуп 40 тин ошуқ дуня чемпийонлирини тәйярлап чиққан. Академийә шагиртлири арисида явропа һәм асия чемпийонлириму йетишип чиққан. Һазир җумһурийәтниң һәр қайсий җайлиридики академийә кулублирида 1000 дин ошуқ яш өсмүрләр мәшқләнмәктә.

Әзиз нурумоф сөзини йәнә мундақ дәп давам қилди: «бразилийәчә җю-җитсу арилаш болуп, униң ичигә елишиш, челишиш, әркин челишиш вә башқилар кириду. Омумән бразилийәчә җю-җитсу қазақистанға 2008-йили кәлди. Уни биразилийәдин арманҗан розахуноф өзи биринчи болуп елип кәлди. Арманҗан шуниң тунҗи қара бәлвағ игиси. Һазир қазақистандики уйғур яшлири бразилийәчә җю-җитсуға зор диққәттә болуватиду. Алдимизда олимпик мусабиқилиригә киридиған нийәтлиримиз бар. Һазир асия мусабиқилиригә кирди. Арманҗан өзиниң қолида галина дегән йетим қизни беқиватиду. У түркмәнистанда өткән асия мусабиқисидә биринчи орунни алди. Әмди авғуст-сентәбирдә қазақистан бойичә мусабиқә болиду. Һазир шуниңға тәйярлиқ қиливатимиз.»

Әзиз нурумофниң ейтишичә, бразилийәчә җю-җитсу түрһ бойичә дуня мусабиқиси һәр йили әрәб бирләшмә хәлипиликиниң пайтәхти әбу-зәбидә өткүзүлүп туридикән. У өзиниңму қаттиқ мәшиқлинип, келәр йили шуниңға қатнишиш пилани бар икәнликини билдүрди.

Игилишимизчә, өткән йили гиретсийә пайтәхти афинада өткүзүлгән бразилийәчә «җю-җитсу», йәни әркин челишиш вә муштлишиш бойичә дуня мусабиқисидә 12 яшлиқ уйғур қизи адиләм һошурова чемпийон болған иди.

Уйғур балилири буниңдин ташқири йәнә бокс, кикбоксиң, йәни әркин муштлишиш, карате, йәни қаидисиз челишиш, ушу-санда, йәни чамбашчилиқ, куңфу, йәни гумпа көрситиш вә тәнһәрикәтниң башқиму түрлири бойичә мусабиқиләргә қатнишип кәлмәктә.

Қазақистанниң «фре спарриң» тәнһәрикәт бирләшмисиниң тренери, ушу-санда бойичә дуня чемпийони хәмит тохтахуноф уйғур қиз-йигитлиридин бокс бойичә бир қатар чемпийонларниң йетилип чиққанлиқини оттуриға қоюп, мундақ деди: «бизниң бирләшмидин мухпул зуляроф һәр тәрәплимилик муштлишиш бойичә чемпийон болди. Бокс бойичә дуняниң күмүш медали чемпийони ренат қурбаноф болди. У келәрки мусабиқигә тәйярлиниватиду. Униңдин башқа еғир дәриҗиликләр бойичә бизниң һезим һезбақийеф һазир америкада. У әмдики мусабиқәни мушу күздә өткүзиду. Униңға үмидимиз зор. Униңдин башқа бокс бойичә қазақистан командисида дилмурат миҗитоф вә рәна пәрһатоваларму бар.»

Хәмит тохтахунофниң ейтишичә, һазир бокс бойичә яш өсмүрләр арисидинму йетилип чиқиватқан талантлиқ уйғур балилири көп икән.

Пикирләр (0)
Share
Толуқ бәт