Уйғур йигити дилмурат миҗитоф хитайда өткән бокс дуня мусабиқисидә күмүш медалға еришти

Ихтиярий мухбиримиз ойған
2019-10-30
Елхәт
Пикир
Share
Принт
Дилмурат миҗитоф(оңда) рәқиби билән елишмақта. 2019-Йил, өктәбир.
Дилмурат миҗитоф(оңда) рәқиби билән елишмақта. 2019-Йил, өктәбир.
RFA/Oyghan

Аммиви ахбарат васитилиридин мәлум болушичә, 18 вә 27-өктәбир арилиқида хитайниң вухән шәһиридә 7-нөвәтлик һәрбий тәнһәрикәт мусабиқиләр болуп өтти. Униңға қазақистанлиқ тәнһәрикәтчиләрму қатнашти.

Мәзкур һәрбий тәнһәрикәт мусабиқиләр 1948-йили хәлқара һәрбий тәнһәрикәт кеңиши тәрипидин тәшкилләнгән болуп, униңға тәнһәрикәтниң һәр хил түрлири бойичә мусабиқиләр өтмәктикән. Бу қетимқи мусабиқигә қазақистанниң бокс командисиму иштирак қилип, 7 медал, шу җүмлидин 2 алтун, 2 күмүш вә 3 мис медал йеңивелип, омумий һесабта қазақистан командиси 12-орунға көтүрүлгән. Игилишимизчә, қазақистанлиқ боксчилар қатарида уйғур йигити дилмурат миҗитоф 64 килограм салмақта күмүш медалға еришкән.

Бир қатар шәһәрлик, җумһурийәтлик, хәлқара мусабиқиләрниң ғалиби дилмурат миҗитоф радийомиз зияритини қобул қилип, мундақ деди: «биринчи қетим 2017-йили ‹астана арланс' кулуби чемпийон бөлүм. Ахирқи йәкму-йәктә кубалиқларни йеңивалдуқ. Шу вақитта мән биринчи қетим дуня чемпийони болдум. Әмди бу қетимда мусабиқигә бокс бойичә 50 милләт қатнашти. Мән биринчи йәкму-йәктә өзбекистанлиқ, иккинчисидә венезуела, кейинкисидә әзәрбәйҗан, андин алҗирийәликни йеңивалдим. Ахирқисида белорус боксчисидин йеңилип қалдим.»

Дилмурат миҗитоф 1995-йили алмута вилайити уйғур наһийәсиниң чонҗа йезисида дуняға кәлгән. Кейин аилиси билән алмута шәһириниң ақбулақ мәһәллисигә келип орунлашқан. 2013-Йили шәһәрниң достлуқ мәһәллисидики абдулла розибақийеф намидики 153-мәктәп-гимназийәни, андин 2017-йили тәнһәрикәт академийәсини тамамлиған. Дилмурат бокс билән 12 йешидин тартип бокс бойичә тәнһәрикәт маһири долқун камекофниң рәһбәрлики астида шуғуллинип кәлмәктә.

Дилмурат миҗитоф вәхән шәһиридә болуп өткән мусабиқидин қаттиқ тәсирләнгәнликини оттуриға қоюп, йәнә мундақ деди: «әлвәттә, хушал болдум. Өмрүмдики әң чоң мусабиқиләрниң бири болди. Бир тәрәптин, өзүмниң етини, бизниң уйғуримизниң намини дуняға тонуттум дәп ойлаймән. Келәчәктә олимпик оюнлириға қатнишиш мәқситим бар. Тренерим долқун камекофқа рәһмәт ейтимән. Мән боксчилардин биринчи нөвәттә уйғурларниң даңқини көтүргән мәрһум абдурешит абдрахманофни үлгә тутимән. Мушу киши охшаш болғум келиду.»

Биз дилмурат миҗитофниң тренери долқун камекоф билән алақиләштуқ. У мундақ деди: «дилмурат миҗитоф 15 йил бурун мәшиқлинишкә кәлгән. Бу йили у қазақистан бойичә өткән мусабиқидә чемпийон болди. Әмди мана вухәнда иккинчи орун елип кәлди. Келәчәктә мушу декабир ейида қариғанда шәһиридә олимпик оюниға қатнишишқа йолланма елиш үчүн мусабиқә болиду. Дилмураттин башқа йәнә розийеф наил, тохтасун рәсул охшаш яш боксчилиримиз чиқиватиду. Бултур дилмуратқа хәлқара тәнһәрикәт маһири дегән атақ берилди.»

Долқун камекофниң бокс кулуби 2008-йилдин ишләватқан болуп, көплигән бокс маһирлирини тәйярлап чиққан. Бүгүнки күндә униңда 40 қа йеқин яш боксчи мәшиқлиниватмақта. Долқун камекоф буниңдин ташқири тәнһәрикәт бойичә алий мәктәптә чоң тренер вәзиписини атқурмақтикән. Униң дейишичә, яш боксчилар асасий җәһәттин һөкүмәт тәрипидин хираҗәт билән тәминлинидикән. Бәзи вақитларда дуня мусабиқилиригә қатнишиш үчүн һамийларму җәлп қилинидикән.

Әйни вақитларда қазақистанлиқ тәнһәрикәтчиләр ичидин даңлиқ боксчиларниң йетилип чиққанлиқи мәлум. Шуларниң бири совет иттипақи бойичә икки мәртәм чемпийон аталған, америка, явропа, африқада өткән хәлқара мусабиқиләрниң ғалиби, даңлиқ боксчи вә тонулған кино артиси абдурешит абдрахманофтур. Униң исми һазир пәқәт қазақистандила әмәс, бәлки дуняға тонулған. У хәлқара тәнһәрикәт маһири дегән атаққа игә болған тунҗи қазақистанлиқтур. Абдурешит абдрахманоф мушу йили май ейида 73 йешида аләмдин өтти.

Йеқинда алмута вилайитиниң қарасай наһийәсидә абдурешит абдрахманоф хатирисигә беғишланған яш өсмүрләр арисида бокс бойичә мусабиқә болуп өтти. Җумһурийәтлик уйғур етно-мәдәнийәт мәркизиниң алмута шәһәрлик шөбиси уюштурған мәзкур мусабиқигә қатнашқан мәрһумниң сәпдашлири вә достлири абдурешит абдрахманофниң қазақистан тәнһәрикитиниң тәрәққиятиға қошқан төһписини юқири баһалиди.

Зияритимизни қобул қилған қазақистанниң бокс бойичә хизмәт көрсәткән тренери рәһим сидиқоф әпәнди мәзкур хатирә мурасими һәққидә тохтилип, мундақ деди: «өзбекистандин, қирғизистандин болуп 160 боксчи кәлди. Кәлгән меһманлар арисида дәсләптә америкаға биллә барған җандос кукумоф болди. Йәнә көплигән академиклар, профессорлар болди. Алмута һакимийитидинму кәлди. Улар чоң рәхмитини ейтти. Һазир хәт йезип қойдуқ. Алмутада кочиға вә мәктәпкә намини қоюш тоғрилиқ. 17 Адәм имзасини қойди. Хәтни президент қасим-җомарт тоқайефқа яздуқ.»

Рәһим сидиқофниң ейтишичә, абдурешит абдрахманоф әйни вақитларда қазақистанниң даңқини пәқәт совет иттипақидила әмәс, бәлки дуняға чиқарған икән. Һазир униң ишини шагиртлири давам қиливатқан болуп, уларму чоң утуқларға еришмәктикән.

Пикирләр (0)
Share
Толуқ бәт