Уйғур кишилик һоқуқ қурулуши уйғурлар мәсилиси һәққидә баянат елан қилди

Мухбиримиз сада
2019-05-02
Елхәт
Пикир
Share
Принт
Америка пайтәхти вашингтондики уйғур кишилик һоқуқ қурулушиниң тәтқиқатчиси зубәйрә ханим явропа парламентида. 2017-Йили 8-феврал, белгийә.
Америка пайтәхти вашингтондики уйғур кишилик һоқуқ қурулушиниң тәтқиқатчиси зубәйрә ханим явропа парламентида. 2017-Йили 8-феврал, белгийә.
Photo: RFA

Нөвәттә ахбарат әркинлики хитайда қаттиқ чәклимигә учраватқан, ахбаратчилар хитай һөкүмити тәрипидин тәқиб нишаниға айлиниватқан вә ғайиб болуватқан бир пәйттә баш штаби вашингтондики уйғур кишилик һоқуқ қурулуши «хәлқара ахбарат әркинлики күни» мунасивити билән баянат елан қилди.

1-Май елан қилинған мәзкур баянатта уйғур кишилик һоқуқ қурулуши хитай һөкүмитидин уйғур диярида тутқун қилинған вә түрмигә ташланған уйғур ахбаратчилирини қоюп беришни, районни чәтәллик мухбирларға әркин ечиветишни тәләп қилди. Баянатта бирләшкән дөләтләр тәшкилатини, дунядики башқа һөкүмәтләр вә органларни бу һәқтә хитайға чақириқ қилишқа үндиди.

Баянаттин мәлум болушичә, өткән икки йилда уйғур дияридики уйғур вә башқа түркий милләтләр хитай һөкүмитиниң зор көләмлик тутқун нишаниға айланған. Тутқун қилинғанларниң бәзилири җаза лагериға соланған болса, бәзилири из-дерәксиз йоқап кәткән. Буларниң ичидә уйғур ахбаратчилар билән тәһрирләрму көп салмақни игиләйдикән. 

Бүгүн вашингтондики уйғур кишилик һоқуқ қурулушиниң тәтқиқатчиси зубәйрә шәмсидин ханим радийомиз зияритини қобул қилип, мәзкур баянатта тәкитләнгән муһим нуқтилар һәққидә чүшәнчә бәрди. Униң дейишичә, бүгүнкидәк ахбарат әркинлики тәкитлиниватқан күндә өзиниң ахбаратчилиқ хизмити сәвәблик тутқун қилиниватқан вә йоқап кетиватқан ахбаратчиларға хәлқара җәмийәт җиддий муамилә түтиши керәк икән. 

Уйғур кишилик һоқуқ қурулуши бу йил мартта уйғур диярида хитай һөкүмити тәрипидин тутқун қилинған, йоқап кәткән вә җазаға һөкүм қилинған 400 дин артуқ уйғур зиялийлири һәққидә бир доклат елан қилған иди. Зубәйрә ханим радийомизға қилған сөзидә мәзкур доклат һәққидиму қисқичә чүшәнчә бәрди. 

Баянатта уйғур кишилик һоқуқ қурулушиниң директори өмәр қанат әпәндиниң сөзлири нәқил кәлтүрүлүп, мундақ дейилгән: «хитай даирилири уйғур ахбаратчилирини тутамға чиқмайдиған сәвәбләр билән тутқун қилиш вә җазаға һөкүм қилиш арқилиқ уларниң еғизини әтти. Чүнки хитай һөкүмити ахбарат әркинлики сәвәблик уйғур диярида өзлиригә пайдисиз бир нәтиҗиниң көрүлүшини һәргизму халимайду. Һалбуки, хитай һөкүмити учур вә ахбаратқа қанчилик тосқунлуқ қилишидин қәтийнәзәр дунядики демократик һөкүмәтләр вә органлар уйғур дияридики уйғур ахбаратчилириниң тәқдиригә йеқиндин көңүл бөлүши керәк,» дегән.

Баянатта йәнә хитай һөкүмитиниң уйғур ахбаратчилириға болған бесиминиң чәтәлләрдики уйғурларғичә созулғанлиқи тилға елинип, әркин асия радийоси уйғур бөлүмидики алтә мухбирниң хизмити сәвәблик уйғур дияридики ата-ана, уруқ-туғқанлириниң тутқун қилинғанлиқи мисал сүпитидә оттуриға қоюлған. 

Зубәйрә ханим мәзкур баянатниң әһмийити һәққидә тохталди. Униң билдүрүшичә, «хәлқара ахбарат әркинлики күни» дә уйғурлар мәсилисини көтүрүп чиқиш вә оттуриға қоюш дуня җамаәтчиликиниң диққитини қозғашта муһим рол ойнайдикән.

Пикирләр (0)
Share
Толуқ бәт