Кастамону университетида «шәрқий түркистан хатирә ормини» бәрпа қилинған

Ихтиярий мухбиримиз әркин тарим
2019-04-12
Елхәт
Пикир
Share
Принт

Түркийәдә оқуватқан уйғур оқуғучиларниң көпийишигә әгишип уйғурлар тоғрисидики паалийәтләрму хилму-хиллашмақта. Түркийәниң кастамону шәһиригә җайлашқан кастамону университетидики уйғур оқуғучилар 6-апрел күни университет бағчисида «шәрқий түркистан хатирә ормини» бәрпа қилиш үчүн мәктәп рәһбәрлики тәстиқлап бәргән җайға көчәт тиккән.

Паалийәткә мәзкур университетта оқуватқан 100 дин артуқ уйғур оқуғучи қатнашқан болуп, улар 200 түп әтрапида көчәт тиккән.

Көчәт тикиш паалийитигә йетәкчилик қилған кастамону университети түрк тили вә әдәбияти кәспиниң оқуғучиси сәрдар бу һәқтә радийомиз зияритини қобул қилип, мәлумат бәрди.

Кастамону университети түркийәдики уйғур оқуғучилар әң көп оқуватқан университет һесаблиниду. Мәзкур университетта оқуватқан түркий тиллиқ милләтләрдин болған оқуғучиларниң көплүкигә қарап кишиләр бу университетни «түрк дуняси университети» дәпму атайдикән.

Икки йилдин бери уйғур оқуғучиларниң тиришчанлиқи нәтиҗисидә, кастамону шәһиридә, болупму мәзкур университетта уйғурлар вә уйғурларниң һазирқи вәзийити наһайити яхши тонуштурулмақта. Буниң нәтиҗисидә кастамону университетниң һәр дәриҗилик рәһбәрлириму уйғур оқуғучиларға алаһидә ғәмхорлуқ қилишқа башлиған. Уйғур оқуғучиларниң йетәкчилиридин сәрдар мәзкур университетниң дәрвазисидин киргәндә көз челиқидиған җайға «шәрқий түркистан хатирә ормини» бәрпа қилинғанлиқи, буниң үчүн дәсләпки қәдәмдә 200 түп көчәт тикилгәнликини баян қилди.

Сәрдарниң билдүрүшичә, кастамону университетида оқуватқан уйғур оқуғучиларниң көпи икки йил бурун оқушқа киргәнләр болуп, улар мәктәптә өткүзүлгән һәр хил паалийәтләргә актип қатнишиш арқилиқ уйғурларниң миллий мәдәнийитини вә уйғур дәвасини яхши тонуштуруп кәлмәктә икән

Кастамону университети 2006-йили қурулған болуп, бу университетта 30 дөләттин кәлгән оқуғучилар бар икән. Буларниң ичидә оттура асия түркий җумһурийәтлиридин кәлгән оқуғучиларниң саниму көп салмақни игиләйдикән. Шуңа бу университетта уйғурларни, болупму уйғур миллий дәвасини аңлитиш зор әһмийәткә игә икән.

Кастамону университетида оқуватқан уйғур қиз оқуғучиларниң вәкили, түрк тили вә әдәбияти кәспиниң оқуғучиси сүбһинур өмәр көчәт тикиш паалийити барин инқилабиниң 29-йиллиқини хатириләш күнигә тоғра кәлгән болғачқа, паалийәтни барин шеһитлириға атап өткүзгәнликини баян қилди.

Кастамону университетидин қалса түркийәдә уйғур оқуғучилар әң көп оқуватқан алий мәктәпләрдин бири бурса шәһиридики улудағ университетидур. Бу университеттики уйғур оқуғучилар бурса шәһириниң фәтиһ қилинғанлиқиниң 691 йиллиқи мунасивити билән елип берилған чоң паалийәттә барин вәқәсини хатирилигән. Бу паалийәткә бурса шәһириниң башлиқи алинур ақташ әпәндиму иштирак қилған. Паалийәттә қоллирида ал-юлтузлуқ көк байрақ билән түркийә байриқини көтүрүвалған көп сандики уйғур оқуғучилар барин шеһитлириға атап қуран тилавәт қилған вә шәһәр мәйданидики йиғилишқа қатнашқан. Улудағ университетида оқуватқан 100 дәк уйғур оқуғучиниң вәкили абдуқадир абдукерим билән бу һәқтә бизгә мәлумат бәрди.

Түркийә маарип министирлиқи бәргән мәлуматқа асасланғанда, һазир түркийәдики 80 дәк алий мәктәптә 2080 нәпәр әтрапида уйғур оқуғучи оқумақтикән.

Пикирләр (0)
Share
Толуқ бәт