Истанбулдики 4-нөвәтлик етноспор тәнтәрбийә вә мәдәнийәт фестивалида уйғур мәдәнийити тонуштурулди

2019-10-04
Елхәт
Пикир
Share
Принт
Истанбулниң ататүрк айродроми мәйданида ечилған «4 - қетимлиқ етносипор тәнтәрбийә вә мәдәнийәт фестивали»да шәрқий түркистан тәшкилатлар бирлики уйғурларға вакаләтән көргәзмә ачти.
Истанбулниң ататүрк айродроми мәйданида ечилған «4 - қетимлиқ етносипор тәнтәрбийә вә мәдәнийәт фестивали»да шәрқий түркистан тәшкилатлар бирлики уйғурларға вакаләтән көргәзмә ачти.
RFA/Arslan

Истанбулниң ататүрк айродроми мәйданида «4 - қетимлиқ етносипор тәнтәрбийә вә мәдәнийәт фестивали» башланди.  Мәзкур паалийәттә шәрқий түркистан тәшкилатлар бирлики уйғурларға вакаләтән уйғур мәдәнийити тонуштурулған көргәзмә ачти.

Паалийәтниң ечилиш мурасимиға түркийә маарип министири зия сәлчуқ, дуня еноспор федератсийисиниң рәиси билал әрдоған, яшлар вә тәнтәрбийә миниситерлиқиниң муавин миниситири һәмза йәрликая,  түркийә сиртидики түркләр вә қериндаш түркий хәлқләр оргининиң рәиси абдуллаһ әрән, әсәнләр вә бәйоғли шәһәр башлиқлири, адаләт вә тәрәққият партийисиниң истанбул шөбә рәиси байрам  шәноқ, т р т баш мудири ибраһим әрән, түркийәниң потбол чолпанлири, арда туран, әмри балйизоғли қатарлиқ муһим шәхсләрму қатнашти.

Ечилиш мурасимида сөз қилған дуня етник спор тәнтәрбийә федератсийисиниң рәиси билал әрдоған яшларға хитап қилип мундақ деди: «өз кимликимиз вә мәдәнийитимиз һәққидә сөзлишәйли, биз алди билән өзимизниң ким икәнликини биләйли, бизгә аит болғанға игә чиқайли. Балилар вә яшлар алди билән өзимизгә аит болғанларға игә чиқиңлар. Миллий тәнтәрбийәлиримизни, музиклиримизни аңлаңлар, әнәнивий тәнтәрбийәлиримизни унутмаңлар, өз йемәклиримизни, қол - һөнәр сәнәтлиримизни унутмаңлар, өтмүшимизгә таянмисақ мәдәнийәт, өрүп - адәтлиримизни қоғдап қалмисақ, нәсилимиз йоқап кетиду».

Түркийә әнәнивий тәнтәрбийә түрлири федератсийиси рәиси хақан казанҗи әпәнди ташлинип қалған әнәнвий тәнтәрбийләрни җанландуруш керәкликини билдүрүп мундақ деди: «етносипор тәнтәрбийә  мәдәнийәт фестивали арқилиқ хәлқимизниң әнәнивй артуқчилиқини, әнәнивий қиммәт қарашлиримизни, тәнтәрбийәлиримизни, музиклиримизни  тонуштуруш үчүн бу паалийәт оюштурулди. Бу паалийәт арқилиқ ташлинип қалған әнәнивей тәнтәрбийәлиримизни җанландурушқа тиришиватимиз».

Паалийәт мәйданиға 16 түрк хәлқлириниң чедири қурулған болуп, охшимиған саһәләрдә 60 түрлүк қол - һөнәр сәнити зиярәтчиләргә көрситилди.

Бу паалийәттә уйғурларниң мәдәнийәт-сәнәтлирини намайән қилидиған аилә турмуш боюмлири, доппа, чапан, әтләс көйнәк дегәндәк миллий кийимләр, чалғу әсваблар вә полу, самса, саңза, нан, нават қатарлиқ йемәкликләрму көргәзмигә қоюлди.

3-Өктәбирдики паалийәттә «оттура асия меһман ресторани» 3000 кишилик полу етип һәқсиз тарқатти.

Бу паалийәт 2019- йили 10-айниң 3- күнидин 6- күнигичә 4 күн давам қилиду.

Биз бу паалийәт тоғрисида явроасия түрк җәмийәтләр федератсийәсиниң рәиси исмайил җингиз, шәрқий түркистан нузугум һәмкарлиқ җәмйитиниң рәиси мунәвәр өзуйғур ханим, қирим түрклири җәмийитиниң мәсули  вә бир қисим түркләр билән сөһбәт елип бардуқ

Бу фестивалниң түрк дунясиға алақидар бөлүми билән һәмкарлишиш вәзиписини өтигән явроасия түрк җәмийәт федератсийәсиниң рәиси исмаил җенгиз әпәнди бу һәқтә пикир баян қилип, «бу фестивалда түрк дунясидики 16  түрк хәлқлири қатарида уйғур мәдәнийитиниң тонуштурулғанлиқиниң өзи биз үчүн әң әһмийәтлик,» деди.

Шәрқий түркситан нузугум һәмкарлиқ җәмийитиниң рәиси мунәввәр өз уйғур ханим мәдәнийәт тонуштуруш көргәзмиси ечиш арқилиқ бир тәрәптин уйғурларниң мәдәнийәт вә өрп-адәтлирини тонуштуруш билән биргә уйғурлар һазир дуч келиватқан бесим вә қийинчилиқ мәсилиләрниму тонуштуруп өтиватқанлиқини билдүрди. У  бу арқилиқ көплигән түрк хәлқлириниң қоллишиға еришиш керәкликини тәкитлди.

Мунәввәр өзуйғур ханим 4 күн давам қилидиған бу паалийәткә истанбулдики барлиқ уйғурларниң қатнишип униңдин пайдилинишини тәвсийә қилди.

Биз уйғур мәдәнийәт көргәзмисини зиярәт қилған бир қисим түркләр билән сөһбәт елип бардуқ. Бурақ әнгән исимлик тарих оқутқучиси уйғурлар тоғрисида сориған соаллиримизға җавап берип мундақ деди: «уйғурлар нәччә әсирдин буян яшап келиватқан ана вәтинидә зулумға учраватиду. Хитай коммунист һакимийити у йәрниң өзигә аит икәнликини дава қиливатиду. Әмәлийәттә болса хитайларниң у йәрни қанунсиз һалда ишғал қиливалғанлиқини һәммә киши билиду. Тарих буни һәргиз унутмайду. Йеқинқи йиллардин буян хитай у йәрдики уйғурларға қарши бесимни чекидин ашуруп иҗра қиливатиду. Әмма хитай қанчилиқ чекидин ашуруштин қәтийнәзәр, қирим вә башқа түрк җуғрапийәлиридикигә охшаш һеч қачан түркләрниң изини өчүрәлмәйду.»

У бизниң «уйғурларға демәкчи болған башқа сөзиңиз барму?» дегән соалимизға җавап берип, мундақ деди: «түркийә бир аз күчлинип бу мәсилигә қол селиши керәк, чүнки  бизниң тарихимиз әң дәсләп у райондин башланған. Биз қирим түрклири болуш сүпитимиз билән уйғур қериндашлиримизни қоллап – қуввәтләймиз, чүнки биз җуғрапийә җәһәттә узақ болсақму, тил вә тәләппузимизда пәрқләр болсиму, әмма қан томуримиз охшаштур. Һәр икки тәрәп түрктур һәм түрк пети қалиду.»

Пикирләр (0)
Share
Толуқ бәт