«Тилсиз қушлар» намлиқ коллектип шеирлар топлими нәшр қилинди

Ихтиярий мухбиримиз азиғ
2020-05-14
Елхәт
Пикир
Share
Принт
Муһаҗирәттики 26 нәпәр шаирниң 169 парчә шеири киргүзүлгән коллектип шеирлар топлими «тилсиз қушлар» ниң алди вә кәйни муқависи. 2020-Йили май, истанбул.
Муһаҗирәттики 26 нәпәр шаирниң 169 парчә шеири киргүзүлгән коллектип шеирлар топлими «тилсиз қушлар» ниң алди вә кәйни муқависи. 2020-Йили май, истанбул.
RFA/Azigh

Муһаҗирәттики уйғур шаирлириниң коллектип шеирлар топлими «тилсиз қушлар» истанбулда уйғур язғучилар уюшмиси тәрипидин түзүлүп, нәшр қилинди.

Мәзкур топламға муһаҗирәттики 26 нәпәр шаирниң 169 парчә шеири киргүзүлгән болуп, көзәткүчләрниң ейтишичә, хитай һөкүмитиниң уйғур тили вә мәдәнийитигә қарита елип бериватқан йоқитиш вә ассимилятсийә сиясити күндин-күнгә қаттиқлишиватқан вәзийәттә муһаҗирәттики уйғурларниң уйғур әдәбияти вә мәдәнийитини җанландуруш паалийәтлири уйғурларниң нөвәттики вәзийитини хәлқараға аңлитиш вә уйғур әдәбиятини сақлап қилишта муһим рол ойнайдикән.

Бу һәқтә зияритимизни қобул қилған дуня уйғур язғучилар уюшмисиниң муавин рәиси, шаир мутәллип сәйдулла әпәндим мундақ деди: «вәтинимиздә йеқинқи бир нәччә йил җәрянида уйғур тилиниң маариптин, нәшриятчилиқтин, һәтта күндилик һаяттин сиқип чиқирилиши дуняниң һәрқайси җайлиридики уйғурниң көңлини йерим қилидиған вә қайғуға салидиған вәқә болуп қалди. Бу вәҗидин дуня уйғур язғучилар уюшмисидики һәйәтләр пикирлишиш арқилиқ ана тилимизниң чәтәлдики мәвҗутлуқини сақлап қилишта түрткиси боламдикин дегән мәқсәттә ‹тилсиз қушлар' намлиқ топламни нәшр қилдуқ.»

Хитай һөкүмитиниң уйғур районидики бесим вә мәдәнийәт қирғинчилиқ сиясәтлириниң күндин күнгә еғирлишиши муһаҗирәттики уйғурларниң қаттиқ әндишисини қозғимақта. Муһаҗирәттики уйғурлар һәр хил мәдәнийәт-сәнәт вә әдәбий иҗадийәт паалийәтлири арқилиқ хитай һөкүмитиниң сиясәтлиригә қаттиқ инкас билдүрмәктә. Көзәткүчләрниң қаришичә муһаҗирәттики уйғур язғучи шаирлириниң иҗадийәтлири муһаҗирәттики уйғурларниң әдәбий иҗадийәтлирини тәтқиқ қилишта муһим тәтқиқат материяли һесаблинидикән.

Дуня язғучилар уюшмисиниң баш катипи, язғучи абдушүкүр муһәммәт әпәндим бу һәқтә зияритимизни қобул қилип, мәзкур коллектип топламниң нәшр қилинишиниң әһмийити вә роли һәққидики соаллиримизға җаваб берип, мундақ деди: «‹тилсиз қушлар' намлиқ шеирлар топлими муһаҗирәттики уйғур шаирлириниң шеирийәт әһвалини тәтқиқ қилишта һәм тәтқиқатчилар һәм иҗадийәт һәвәскарлири үчүн муһим муһим материял болуп қалсун дегән мәқсәттә топламни нәшр қилған болдуқ. ‹Тилсиз қушлар' намлиқ шеирлар топлимидики шеирларниң тематик вә шәкли қурулмилири көп хил.»

Муһаҗирәттики уйғур әдәбияти вә мәдәнийәт-сәнәт паалийәтлири асаслиқ вәтән темисини чөридигән асаста елип бериливатқан болуп, «тилсиз қушлар» намлиқ коллектип шеирлар топлимиму асаслиқ вәтән темисини чөридигән иҗадий әсәрләрдин тәркиб тапқан икән. Зияритимиз җәрянида абдушүкүр әпәндим «тилсиз қушлар» намлиқ топламни чөридигән асаста муһаҗирәттики уйғур әдәбиятида муһим салмақни игилигән вәтән темисиниң арқа көрүнүши вә сәвәби һәққидә тәпсилий тохтилип мундақ деди: «топламдики шеирларниң көпинчиси чәтәлдә яшаватқан, вәтән ишқида йүрәклири пучилиниватқан, вәтән сеғиниши деңиздәк мәвҗ уруватқан шаирларниң шеирлири. Шеирларда башқа темиларму көзгә челиқсиму, йәнила омумий гәвдидә шаирларниң вәтәнгә болған интилиши вә вәтәнгә болған сөйгүсини тапқини болиду.»

Мәзкур топламниң нәшр қилиниши муһаҗирәттики уйғур яшлириниң иҗадийәт қизғинлиқиға илһам бериш вә нәшр ишлириға ярдәм беришни мәқсәт қилған болуп, дуня уйғур язғучилар уюшмисиниң муавин рәиси мутәллип сәйдулла вә «тилсиз қушлар» намлиқ коллектип шеир топлиминиң тәһрири, шаир әркан қадир бу һәқтә тәпсилий тохталди.

Пикирләр (0)
Share
Толуқ бәт