Қирғизистанда йәрлик хәлқ билән хитайлар арисида тоқунуш йүз бәрди

8-январ қирғизистанниң ош областиға қарашлиқ үзгән шәһириниң қоршап йезисидики йәрлик аһалә билән хитайлар арисида җаңҗал йүз берип 28 адәм яриланған.
Ихтиярий мухбиримиз азад қасим
2013-01-09
Елхәт
Пикир
Share
Принт
Сүрәттә, қирғизистанда йәрлик хәлқ билән хитайлар арисида тоқунуш йүз бәргән орун болуп сериқ кийимликләр хитай пуқралири, күлрәң кийимликләр йәрлик аманлиқ қоғдаш хадимлири. 2013-Йили 10-январ.
Сүрәттә, қирғизистанда йәрлик хәлқ билән хитайлар арисида тоқунуш йүз бәргән орун болуп сериқ кийимликләр хитай пуқралири, күлрәң кийимликләр йәрлик аманлиқ қоғдаш хадимлири. 2013-Йили 10-январ.
http://rus.azattyk.org

«Азадлиқ» радиосиниң хәвиригә қариғанда, 8-январ күни кәч саәт 19.30 Әтрапида қоршап йезисиниң қамчибекув кочисиға җайлашқан «астан-ата» кафеханисиниң алдида, бу йәрдики «дадха-кемин» електр линийиси қурулушини илип бериватқан хитайлар мәст болувелип кочида кетиватқан муратәли исимлик йигит билән шаиргүл исимлик аялни тутувелип савашқан һәмдә кафеханиға соливалған.

Вәқәдин хәвәр тепип кәлгән муратәлиниң атиси билән йезилиқ сақчиханиниң икки нәпәр хадиминиму хитайлар уруп, кафеханиға соливелишқан. Ахирида ғәзәпләнгән йәрлик аһалә билән хитайлар арисида җаңҗал башлинип 18 нәпәр хитайни өз ичигә алған 28 адәм яриланған. Еғир яриланған икки хитай җиддий қутқузуш бөлүмигә йәткүзүлгән.

Вәқәниң техиму кеңийип кетишидин әнсиригән сақчи даирилири бу йәрдә ишләватқан йүздин артуқ хитайниң хәвпсизликини нәзәрдә тутуп кечиләп ош шәһиригә йөткәп кәткән.

Мәлуматларға қариғанда, ош областлиқ ички ишлар башқармиси қанунсизлиқ билән башқиларни тутқун қилиш, топлишип җедәл чиқириш һәмдә қанун иҗра қилғучиларға күч көрситиш пакитлири бойичә җаңҗал пәйда қилған 21 нәпәр хитай үстидин җинайи ишлар делоси турғузған. Сорақ давамида бу хитайларниң мәст әһвалда икәнлики ениқланған.

Хитайниң қирғизистандики баш әлчиси ваң кәйвин бүгүн «24. К г» агентлиқиға бәргән баянатида, 2-3 айдин буян «дадха-кемин» електр қурулуши иш мәйданида оғрилиқ һадисилириниң копүйүп кәткәнликини тилға илип, йәрлик аһалини әйиблигән һәмдә қирғизистан әдлийә органлириниң бу вәқәни бир тәрәп қилишта адил болушини тәләп қилған.

Бу вәқәгә қатнашқан хитайлар қирғизистан билән хитай арисида түзүлгән тохтамға асасән қирғизистанниң җәнубидики електр енергийисини ширкитиниң хадимлири болуп, хитай тәрәп бу қурулушқа 500 милйон америка доллири мәбләғ салған.

Йеқинқи йиллардин буян хитайниң қирғизистанға болған мәбләғ селинмисини көпәйтип иқтисадий вә сиясий җәһәтләрдә бу дөләткә сиңип киришигә әгишип, йәрлик аһалә билән ишләмчи хитайлар арисидики тоқунушларму барғансери көпәймәктә.

Буниңдин 3-4 ай илгири қирғизистанниң чү областиға қарашлиқ мәлум алтун канида йәрлик аһалә билән хитайлар арисида җаңҗал болуп, ахирида һөкүмәтниң қарари билән бу алтун кани тақалған һәмдә икки йүздин артуқ хитайлиқ алтун қазғучи қирғизистандин қоғливетилгән иди.

Пикирләр (0)
Share
Толуқ бәт