Qirghizistandiki Uyghurlar hem türklerning qirghizistan weziyiti heqqidiki inkasliri

Nöwette xelq'ara metbu'atlarda, qirghizistanda öktichi küchler hakimiyetni qolgha élip, weziyetni asasi jehettin kontrol qilghanliqini élan qilghan bolsimu, emma qurmanbék baqiyéf wezipisidin istépa bérishni ret qiliwatqanliqi üchün, qirghizistan weziyiti yenila jiddiy halette turmaqta. Bügün qirghizistandiki Uyghurlar hem türkler ziyaritimizni qobul qilip, bishkek shehirining nöwettiki weziyiti heqqide toxtaldi.
Muxbirimiz mihriban
2010-04-09
Élxet
Pikir
Share
Print
Süret, qirghiz paytexti bishkekte 7 - aprél küni yüz bergen namayish we toqunush jeryanida köydürüwétilgen chong bazar binasidin bir körünüsh.
Süret, qirghiz paytexti bishkekte 7 - aprél küni yüz bergen namayish we toqunush jeryanida köydürüwétilgen chong bazar binasidin bir körünüsh.
AFP Photo

Nöwette gerche qirghizistan waqitliq hökümet mes'uli roza otanbayiwa  qirghizistan waqitliq hökümitining saqchi hem eskerler arqiliq weziyetni kontrol qilip, paytext bishkek qatarliq jaylarda tinchliq eslige kelgenlikini jakarlighan, weziyet sel tinchlan'ghan bolsimu, emma chet'el sodigerlirining qirghizistandiki soda sarayliri bulang- talanggha uchrighanliqi hetta bezi dukanlargha ot qoyulup köydürüwétilgenliki melum bolmaqta.

Biz qirghizistandiki Uyghur tijaretchilirining ehwali hem qirghizistanning nöwettiki weziyiti heqqide téximu éniq melumat élish üchün, qirghizistanda turushluq Uyghurlar hem qirghizistanda tijaret qiliwatqan türk qérindashlardin téléfon ziyariti arqiliq ehwal igiliduq.

Ziyaritimizni qobul qilghan emma, hazirche ismini ashkarilashni xalimaydighan bir Uyghur ziyaliysi nöwette qirghizistanda weziyetning asasen tinchlan'ghanliqini, qirghizistandiki xitay sodigerlirining soda sarayliri köydürüwétilgenlikini, emma qirghizistanda tijaret qiliwatqan Uyghur sodigerlirining bu qétimliq weqede bek chong ziyan'gha uchrimighanliqini bayan qildi.

Qirghizistanda tijaret qiliwatqan türk sodigiri hüseyin ependi bizge, bu qétimliq weqede pütkül dukanlarning taqalghanliqini, hazir bishkektiki türk sodigerlirining dukanlirini téxi achmighanliqini, bezi türklerning dukanliri bulang- talanggha uchrighanliqi üchün özlirining weziyetning bundin kéyinki tereqqiyatini közitip jiddiy halette turuwatqanliqini bayan qildi.

Ziyaritimizni qobul qilghan bu Uyghur ziyaliysi qirghizstannning nöwettiki weziyiti hem özlirining hökümettin kütidighan ümidini bayan qilip, hazir weziyet asasen tinchlan'ghan bolsimu, emma özlirining yenila weziyetning bundin kéyinki tereqqiyatigha yéqindin diqqet qilip kéliwatqanliqini, hazirqi mesile yéngidin qurulghan waqitliq hökümetning bundin kéyinki weziyetni qandaq kontrol qilishi hem xelqqe bergen wedisini orunlishigha baghliq bolup qalghanliqini bildürdi.

Nöwette rusiye, xitay, amérika qatarliq döletlermu qirghizistan weziyitige diqqet qilip kéliwatqan bolup, tünügün aqsaray bayanat bérip, prézidént barak obamaning qirghizistan weziyitige diqqet qilip kéliwatqanliqini bildürdi.

Rusiye bash ministiri putinningmu tünügün waqitliq hökümet bashliqi roza otanbayiwa bilen téléfonda sözleshkenliki metbu'atlarda melum bolmaqta. Xitayning qoshnisi bolghan qirghizistanning weziyitige téximu diqqet qilip kéliwatqanliqi xelq'ara metbu'atlarda bérilmekte. Birleshken döletler teshkilati bash katipimu tünügün bayanat bérip, qirghizistan weziyitining tézlikte tinchlinishini ümid qilidighanliqini bildürdi.

Yuqiridiki awaz ulinishidin, bu heqtiki söhbitimizning tepsilatini anglaysiler.

Toluq bet