Уйғур елидики миллий карханичилар бир мәқсәттә топланди

Уйғур елиниң учур мәнбәлиригә қариғанда, 12-июн үрүмчидики коинлун меһманханисида «шинҗаң уйғур аптоном районлуқ миллий сода уюшмисиниң қурулуш мурасими» өткүзүлгән.
Мухбиримиз гүлчеһрә
2012-06-18
Елхәт
Пикир
Share
Принт
Хотән базиридики уйғур тиҗарәтчи вә мал алғучилар. 2006-Йили 13-өктәбир.
Хотән базиридики уйғур тиҗарәтчи вә мал алғучилар. 2006-Йили 13-өктәбир.
AFP

Демәк, уйғур елидә миллий карханичилириниң һөкүмәт тәрипидин әнгә елинған миллий сода уюшмиси рояпқа чиққан.

Гәрчә уйғур елидә миллий карханичиларниң сани аз болмисиму өз ара уюшуп, бирикмә күч һасил қилип, сан вә сүпәттә тәң һалқиш шараити яритилмиған, йәни түрлүк сиясий иқтисадий вә иҗтимаий тосалғулар, шараит чәклимилири сәвәблик пәқәтла миллий содигәрлик карханичилар әзалиқидики, уларниң күчини бир җайға топлайдиған уюшма болуп шәкиллинәлмигән иди.

Бу рабийә қадир ханим икки йүздин артуқ аял содигәр-карханичиларниң бирлишишидә қурған «миң ана сода бирләшмиси» хитай һөкүмити тәрипидин 1998-йили бир милйон йүән мәблиғи тоңлитип йиқитилғандин кейин, қурулған уйғур миллий карханичиларниң тунҗи қетимлиқ уюшмиси һесаблиниду.

Мунасивәтлик хәвәрләргә қариғанда, миллий карханичиларниң сода уюшмисини қуруш қуруш һәққидә тунҗи тәклип 2010-йили 3-июл хитайниң уйғур елигә қойған партком секретари җаң чүншйәнниң уйғур елидики бир қисим миллий карханичилар билән өткүзгән сөһбәт йиғинида, миллий карханичилар вәкиллири тәрипидин оттуриға қоюлған вә бу арқилиқ миллий карханиларни күчләндүрүп, уюшуп бирикмә күч һасил қилип, иҗтимаий мәсулийәт туйғусини урғутуп уйғур елиниң һәр саһәдики тәрәққиятиға һәссә қошуш арзусини аңлатқан икән.

Бу уюшминиң 1-нөвәтлик әзалар қурултийиниң сайлимида, арман мусулманчә йемәкликләр санаити гуруһи кәспий чәклик ширкитиниң баш ледири радил абла миллий сода уюшмисиниң рәисликигә, бортала области «шөке» мәсулийәт ширкитиниң қануний вәкили баш ледири шәвкәт абләт уюшминиң баш назарәтчиликигә сайланған.

Радил абла илгири тәңритағ ториниң сөһбәт программисида уйғур карханичиларниң күчини бир йәргә топлашниң әһмийити һәққидә тохталған иди:

Уюшминиң дәсләпки пиланлириға қариғанда, әзалар бирликидә, миллий сода сарай қуруш, уюшма тәшкилати қуруш, миллий сода институти қуруш вә шундақла уйғурлар күтүватқандәк миллий сода уюшмиси путбол кулуби вә миллий путбол командиси қуруштәк нурғун әмәлий ишларни елип бериш алдида икән.

Нөвәттә бундақ бир уюшминиң қурулушиниң уйғур җәмийитигә болған әһмийити тоғрисида уйғур тор бәтлиридә иҗабий инкаслар давам әтмәктә. Нурғун кишиләр «бу бир тарихий бөсүш бопту, нурғунлиған карханичилар чиққан болсиму үзүп чиққанлири бәк аз шундақла йоқ дейәрлик. Әмди һәммәйлән бир нийәт бир мәқсәттә уюшидиғанла болса нурғунлиған яхши нәтиҗиләрни қолға кәлтүрүштә гәп йоқ...» Дегәндәк пикирдә ортақлашмақта.

Миллий сода уюшмисиниң рәһбәрлик аппарати вә әзалири асаслиқ уйғур карханичилар күзгә көрүнгән содигәрләрдин тәшкилләнгән болсиму, сода уюшмисиниң низамнамиси бойичә мәзкур уюшма уйғур аптоном район хәлқ һөкүмитиниң башқуруши вә аптоном районлуқ сода -санаәт бирләшмисиниң йетәкчиликидә иш елип баридиған болғачқа, чәтәлләрдики уйғурлар гәрчә уйғур карханичилириниңму бир уюшмисиниң бәрпа болғанлиқидин сөйүнгән, улардин зор үмид күтүватқан болсиму әмма йәнила хитай һөкүмитиниң уйғур карханичиларниң уюшушиға пурсәт беришидики һәқиқий мәқсити һәққидә әндишилик қарашларму мәвҗут, бу һәқтә дуня уйғур қурултийи яшлар комитети рәиси ғәюр қурбан әпәнди, уйғур карханичиларниң бундин кейинки мусаписигә ақ йол тиләш билән тәң әндишисиниму оттуриға қойди:

Уйғур содигәр һәм карханичиларниң түрлүк сәвәбләр түпәйли чәтәлләргә чиқип кәткәнлириму аз әмәс, илгири йәни 1996-йили «буғрахан» миллий кийим-кечәк сода ширкитиниң қурған ғәйрәт әпәндиму ширкити мәлум сәвәбләр түпәйли вәйран болғандин кейин голландийидә яшимақта.

Ғәйрәт әпәнди мәйли қәйәрдила болмисун уйғур содигәр карханичиларниң мушундақ бир уюшмисиниң қурулуши зөрүр икәнлики әмма, униң уйғурларға вә миллий карханиларниң өзлиригә қанчилик әһмийәтлик ишларни қилалиши нишан-мәқсәт, һошярлиқ вә тәдбиргә бағлиқ дәп қарайдиғанлиқини билдүрди, шундақла өзиниңму чәтәлдики охшаш мәқсәттики карханичиларни бир йәргә җәм қилиш арзусида һәрикәт башлиғанлиқини тонуштурди.

Пикирләр (0)
Share
Толуқ бәт