Ebu-zebide ötken jyu-jitsu boyiche dunya musabiqiside Uyghur ösmürliri dunya chémpiyoni boldi

Ixtiyariy muxbirimiz oyghan
2019-05-01
Élxet
Pikir
Share
Print
Ebu-zebide ötküzülgen jyu-jitsu musabiqisige qatnashqan qazaqistanliq tenheriketchiler. 2019-Yili 26-aprél. Ebu-zebi, ereb birleshme xelipiliki.
Ebu-zebide ötküzülgen jyu-jitsu musabiqisige qatnashqan qazaqistanliq tenheriketchiler. 2019-Yili 26-aprél. Ebu-zebi, ereb birleshme xelipiliki.
RFA/Oyghan

20- We 26-aprél ariliqida ereb birleshme xelipiliki paytexti ebu-zebide braziliyeche jyu-jitsu, yeni erkin chélishish we mushtlishish boyiche dunya musabiqisi bolup, uninggha 100 din oshuq memlikettin 7000 din oshuq tenheriketchi qatnashqan we dunya chémpiyoni dégen yuqiri ataq üchün küreshken. Ularning ichide qazaqistandin barghan Uyghur qiz-yigitlirimu bolghan. Bu musabiqining birinchi künide adilem hoshurowa, aminem meshürowa, gülminem iminowa, tomiris békmurzin qatarliq ösmür qizlar dunya chémpiyoni bolghan.

Nur-sultan shehiride yashawatqan, "Alyans" braziliyeche jyu-jitsu akadémiyisining prézidénti armanjan rozaxunofning éytishiche, jyu-jitsu boyiche dunya musabiqisi ebu-zebide her yili ötküzülidighan bolup, uninggha dunyaning her qaysi memliketliridin minglighan küchlük tenheriketchiler qatniship turidiken. U bu musabiqige qatnishiwatqan qazaqistanliq tenheriketchiler sanining yildin-yilgha köpiyiwatqanliqini bildürüp, bu yilning alahide utuqluq bolghanliqini tekitlidi. U mundaq dédi: "Bizning komanda 75 tenheriketchining wekillikide qatniship, 61médal, shu jümlidin 24 altun, 10 kümüsh, 27 mis médal utuwalduq. Komandimizgha yarkent, almuta we nur-sultan tenheriketchiliri kirdi. Musabiqe bir nechche yash derijiliri boyiche ötti. 10 Yashqiche bolghanlar üchün dunya féstiwali ötti. 10 Yashtin chonglar dunya musabiqisige qatnashti. Yarkent we nur-sultan komandilirida qiz we yigitler bolsa, almuta komandisida peqet yigitler boldi. Musabiqining birinchi künide bizning hoshurowa adilem, meshürowa aminem, iminowa gülminem, békmurzina tomiriske oxshash qizlirimiz dunya chémpiyoni dégen bash mukapatqa ige boldi. Bu musabiqige qatnashqanlarning sani intayin köp, texminen 7 ming etrapida bolghanliqtin riqabetchilirimizmu hem köp boldi, hem küchlük boldi. Shuninggha qarimay, bizning komanda yaxshi netijilerni körsitip, ötken yilqidek töt eng küchlük komandilar sépidin orun aldi. Méning qattiq tesirlen'gen yérim shu boldiki, bizning bolupmu qizlirimiz mezkur musabiqige qattiq teyyarliq bilen kelgen." 

Ebu-zebide braziliyeche jyu-jitsu boyiche ötken dunya musabiqisi qatnashquchilirining ichide ikki mertem dunya chémpiyoni atiqigha érishkenlermu bolup, shularning biri adilem hoshurowa radiyomiz ziyaritini qobul qilip, mundaq dédi: "Essalamu'eleykum. Méning ismim hoshurowa adilem. Men 12 yash. Men braziliyeche jyu-jitsu bilen shughullinimen. Yéqinda, yeni 21-aprél küni ebu-zebide dunya musabiqisi ötken idi. Manga altun médal élip, shuning bilen ikki mertem dunya chémpiyoni bolush mumkin boldi. Men üch qétim küreshke chüshüp, üchiliside ereb tenheriketchilirini yéngiwaldim. Ötken yilimu men mushundaq musabiqige qatniship, altunni yéngiwalghan idim. Men shuning bilen ikki mertem dunya chémpiyoni dégen derijini saqlap qalalidim. Méni bu qétimda minglighan oylar qapliwalghan idi. Qiyin hem qorqunchluqmu boldi. Minglap hayajanlansammu, emma men bu ishni qilalidim. Men öz komandamni, öz trénérimni, öz qazaqistanimni yerge qaratmidim. Méning ata-anilirim méning üchün bek xushal boldi hem méningdin bek meghrurlinidu. Men mushuning bilenla toxtap qalmay, peqet bizning bayraqni kötürüp, algha qarap mangimen."

Igilishimizche, adilem hoshurowa qazaqistan paytexti nur-sultan shehiride ötküzülgen "Chélish küni" xelq'ara féstiwalining, ebu-zebide ötküzülgen dunya musabiqisining, qazaqistan boyiche memliketlik musabiqining, jyu-jitsu türi boyiche girétsiyede ötküzülgen dunya musabiqisining qatnashquchisi. U axirqi qétimda girétsiye paytexti afinada ötken braziliyeche jyu-jitsu dunya musabiqiside rusiyening, andin girétsiyening mahirlirini yéngip chiqqan idi. Adilem hoshurowa axirida qattiq qarshiliq körsetkinige qarimay polshaning mahirini yéngip, dunya chémpiyoni dégen ataqqa érishken idi. 

Ebu-zebide ötken dunya musabiqisige Uyghurlar köp olturaqlashqan almuta wilayitining panfilof nahiyisige qarashliq yarkent shehiridinmu tenheriketchiler qatnashqan. Biz yarkent shehiride pa'aliyet élip bériwatqan braziliyeche jyu-jitsu kulubining trénéri ilshat osmanof bilen alaqileshkinimizde u mundaq dédi: "Bizning 'alyans' kulubimiz üch yil burun armanjan akimiz yarkentke kélip uning shöbisini échip berdi. Biz chong musabiqilerdin 2018 we 2019-yilliri ebu-zebige barduq. Bu yili barghinimizda töt altun, töt kümüsh we üch mis médal élip kelduq. Altunni enwer di'as, meshürowa aminem, roziyéwa yasmina we iminowa gülminem élip keldi. Bizde nurghuni Uyghur baliliri. Uningdin bashqa tunggan, qazaq, rus, ukra'in, özbék, qirghiz balilirimu bar. Hemmisi bolup 130 ademge yétidu".

Ilshat osmanofning éytishiche, u özi mektepte oquwatqan chaghlirida grék-rim kürishi bilen shughullinip kelgen iken. Hazir astana, yeni nur-sultan shehiride pa'aliyet élip bériwatqan "Alyans" braziliyeche jyu-jitsu akadémiyisining asaschisi we prézidénti armanjan rozaxunofning teshebbusi bilen üch yildin buyan braziliyeche jyu-jitsu bilen shughullinip kelmektiken. Ilshat osmanof 2018-yili moskwada ötken dunya musabiqiside dunya chémpiyoni bolghan bolsa, shu yili yene ebu-zebide ötken musabiqide kümüsh médalgha érishken. U öz komandisining kélechekte qazaqistan we dunya boyiche musabiqilerge qatniship, chémpiyon derijisige yétish üchün tirishidighanliqini otturigha qoydi. 

Biz ilshat osmanofning shagirtliridin biri ebu-zebide ötken musabiqide dunya chémpiyoni atalghan enwer di'asni söhbetke tartqinimizda u özining tenheriket bilen shughullinishni yaqturidighanliqini, kélechekte olimpik oyunlirighimu qatnishish arzusining barliqini bildürdi.

Biz enwer di'asning anisi sahidem téyipowa bilen söhbet élip barduq. U mundaq dédi: "Balam özi kichikidin tartip tenheriketke qiziqidu. Mana bir yil boldi jyu-jitsu bilen shughullinip kéliwatidu. Buningdin ilgiri u grék-rim erkin chélishish bilen shughullinip kelgen idi. U birinchi qétim dunya musabiqisige qatnashti. Yeni yéqinda ebu-zebige bérip, jyu-jitsudin altun médal élip keldi. Ochuqini éytsam, hazir balilar tenheriketke qattiq qiziqqandek oqushqa unchilik qiziqip ketmeydiken. Shuning üchün men buningdin ensirep, "Balam, sen mektepte oquwatisen. Yéqinda imtihan tapshurushing kérek. Oqushunggha ziyan kelmisun" dep nechche éytsammu, u tenheriketni tashlimay, axirqi waqitlarda künde dégüdek meshiqqe baridu. Bezide balam "Apa, men bashqilar oxshash talada bikar yürüwatqinim yoq. Tenheriket bilen shughulliniwatimen'ghu" dégendin kéyin yene xatirjem bolup qalimen. Di'asning trénéri ilshat balilargha yaxshi qaraydu. U yaxshi bolghan üchün balilarmu buninggha qattiq qiziqidu. Sewebi trénér peqet tenheriketchi bolushnila emes, adem bolushnimu ögitidu emesmu. Shuning üchün biz barliqimiz di'asning dunya chémpiyoni bolghanliqidin nahayiti xushal bolduq. U yene shundaq utuqlargha yétip, xelqimizning, qazaqistan élimizning dangqini chiqiriwersun deymiz". 

Melum bolushiche, qazaqistanda tenheriketning her xil türliri boyiche musabiqilerge qatniship, dunya chémpiyoni derijisige yetken Uyghur qiz-yigitliri köplep sanilidu. Ularning arisida abduréshit abduraxmanof, tuyghun nasirof, hémid toxtaxunof, zakir toxtiyéf oxshash köpligen ataqliq tenheriketchilermu bar.

Toluq bet