Nazir derijilik ikki emeldar-shirzat bawudun bilen enwer abdushükür partiyidin qoghlap chiqirilghan

Muxbirimiz shöhret hoshur
2019-01-22
Élxet
Pikir
Share
Print
Partiyidin qoghlap chiqirilghan nazir derijilik ikki emeldar - shirzat bawudun (ongda) bilen enwer abdushükür (solda). 2019-Yili yanwar.
Partiyidin qoghlap chiqirilghan nazir derijilik ikki emeldar - shirzat bawudun (ongda) bilen enwer abdushükür (solda). 2019-Yili yanwar.
Social Media


21‏-Yanwar küni xitay axbarati Uyghur rayondiki nazir derijilik emeldarlardin shirzat bawudun bilen enwer abdushükürning partiyidin qoghlap chiqirilghanliqini xewer qildi. Ilgiri muxbirimiz shirzat bawudunning tutqun qilin'ghanliqini xewer qilghan we xewerni igilesh dawamida alaqidar xadimlarning shirzat bawudunning tutqun qilin'ghanliqi heqqide ziddiyetlik jawab bérip heqiqiy ehwalni yoshurghan idi. Siyasiy közetküchi tahir hamut, shinxu'aning bu qétimqi xewirini yuqiriqi ikki emeldarning tutqunda ikenlikining delili dep qarashqa bolidighanliqini bayan qildi.

Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, shinxu'a agéntliqi qatarliq xitay axbarat wasitilirining xewer qilishiche Uyghur aptonom rayonluq partkom 9 ‏-nöwetlik intizam tekshürüsh komitétining 4 ‏-nöwetlik omumiy yighini mushu ayning 19 ‏-we 20 ‏-künliri ürümchide échilghan. Yighinda bir türküm mesililer qatarida aptonom rayonluq partkom siyasiy qanun komitétining mu'awin sékrétari shirzat bawudun bilen ili oblastliq partkomning mu'awin sékrétari enwer abdushükür üstidin teyyarlan'ghan tekshürüsh doklatigha qarap chiqilghan we da'imiy komitétning mezkur ikki emeldarni intizamgha éghir derijide xilapliq qilghanliqi üchün bergen partiyidin qoghlap chiqirish qarari testiqlan'ghan. Xewerde shirzat bawudun bilen enwer abdushükürning konkrét qandaq xataliq ötküzgenliki bayan qilinmighan؛ emma bu ikkisi üstidiki tekshürüsh doklatini intizam tekshürüsh komitétining 40 neper hey'et ezasidin bashqa, sirttin 206 kishining közdin kechürgenliki eskertilgen.

Buningdin bir ay awwal amérika Uyghur birleshmisining re'isi ilshat hesen rayondiki alaqe torliridin sabiq mu'awin sékrétar shirzat bawudunning ikki yüzlimichilik bilen eyiblinip, 2018-yili 17 ‏-dékabir küni tutqun qilin'ghanliqi heqqide uchur tapshuruwalghan. Eyni chaghda biz bu heqte éniqlash élip barghinimizda, alaqidar xadimlar, shirzat bawudunning nediliki heqqide ziddiyetlik jawablarni bergen. Xadimlardin biri shirzat bawudunning xélidin béri xizmet ornida yoq ikenlikini ashkarilisa, yene bir mes'ul xadim uning siyasiy kéngeshke yötkilip ketkenlikini éytqan. Emma xitayning tor arxipliridin "Beydu" diki bir xewerde shirzat bawudunning 2018-yili séntebirning deslepki heptisi aptonom rayonluq siyasiy kéngeshtiki mu'awin bash katipliq wezipisidin qaldurulghanliqi tilgha élin'ghan. Netijide alaqidar xadimlarning shirzat bawudunning tutqunda ikenlikini yoshuruwatqanliqi melum bolghan.

Ilgiri xitayning merkizi partiye mektipide oqutquchiliq qilghan, nöwette amérikada yashawatqan siyasiy közetküchi tahir hamut ependi, xitayning alaqidar jaza qa'ide-tertiplirige asasen, shirzat bawudun bilen enwer abdushükürning partiyidin qoghlap chiqirilishini ularning xélidin béri tutqunda ikenlikining delili dep qarashqa bolidighanliqini otturigha qoydi. Uning bayan qilishiche, adette xitayda kompartiye ezaliri xatalashsa, uninggha awwal partiye ichide agahlandurush bérilidu؛ partiyidin qoghlinish mezkur ezaning éghir bir xataliq ötküzgenliki we qattiq bir tekshürüshni bashtin kechürgenlikining netijisi.

Enwer abdushükür heqqide melumati yoqluqini bayan qilghan tahir hamut ependi, emma shirzat bawudun heqqide bilidighanlirini töwendikiche bayan qildi.

Shinxu'a agéntliqining21-yanwardiki xewiride bayan qilinishiche, mezkur ikki emeldarning partiyidin qoghlap chiqirilghanliqi élan qilin'ghan mezkur yighin'gha Uyghur rayonning hökümdarliridin chén chu'en'go, li péngshin qatarliqlardin bashqa, shöhret zakir, shawket imin, nurlan abdumijit, erkin tuniyaz qatarliq emeldarlarmu toluq ishtirak qilghan. Ötken aydiki programmimizda shirzat bawudunning tutqun qilinishi heqqide pikir bayan qilghan ilshat hesen ependi, xitayning bu türdiki jazalar arqiliq Uyghur rehbiriy kadirlarni chöchütmekchi we özige téximu béqindurmaqchi boluwatqanliqini ilgiri sürgen we aqiwettin toghra ders élinishi kéreklikini otturigha qoyghan idi.

Hörmetlik radi'o anglighuchilar, yuqirida Uyghur rayonida nazir derijilik ikki emeldarning partiyidin qoghlap chiqirilghanliqi heqqide anglitish berduq.

Toluq bet