Dunya Uyghur qurultiyi wekilliri malaysiyaning bir qisim rehberliri bilen uchrashti

Muxbirimiz irade
2019-01-15
Élxet
Pikir
Share
Print
D u q ning toluq hawalisi bilen teshkillen'gen wekiller ömiki malaysiyadiki ziyaritining ikkinchi künidimu muhim uchrishishlarda boldi. 2019-Yili 15-yanwar.
D u q ning toluq hawalisi bilen teshkillen'gen wekiller ömiki malaysiyadiki ziyaritining ikkinchi künidimu muhim uchrishishlarda boldi. 2019-Yili 15-yanwar.
RFA

Közetküchilerning qarishiche, xitay hökümitining Uyghurlargha séliwatqan zulumining éshishi we Uyghur élide zor sandiki kishini lagérlargha qamishi bir qisim döletlerning Uyghurlargha qaratqan pozitsiyeside melum özgirish yasishigha türtke bolghan idi. Malaysiya ene shu döletlerning biri. Yéqinda "Qanunsiz chégradin kirish" jinayiti bilen malaysiyada tutup turuluwatqan 11 neper Uyghurni xitayning bésimigha qarimay qayturushni ret qilip Uyghurlarning qattiq alqishigha érishken malaysiya döliti yene xitay hökümitining Uyghurlargha qaratqan siyasetlirini tenqidlewatqan yégane musulman döletlirining biridur.

14-Yanwar küni, malaysiya hökümiti bilen d u q rehberliri otturisidiki mexsus söhbetning bashlinishi malaysiyaning Uyghurlar neziridiki ijabiy tesirini yenimu ashurdi. D u q ning toluq hawalisi bilen teshkillen'gen wekiller ömiki d u q ijra'iye komitétining mudiri ömer qanat, amérika Uyghur birleshmisining re'isi ilshat hesen we d u q diniy ishlar komitétining mudiri turghunjan alawudun qatarliqlarni oz ichige alghan bolup, ular malaysiyadiki ziyaritining ikkinchi künidimu muhim uchrishishlarda boldi.

Bizge bu ziyaretler heqqide melumat bergen ilshat hesen ependining bildürüshiche, ularning malaysiyadiki pa'aliyetlirining 2-küni nahayiti zich ötken bolup, etigenlik nashtidin kéyinla uchrishishlar bashlinip ketken. Ular aldi bilen malaysiyadiki herqaysi ayallar teshkilatlirining wekilliri bilen uchriship, ularning Uyghur ayalliri we balilirining weziyiti heqqidiki so'allirigha jawab bergen.

Dunya Uyghur qurultiyining wekilliri arqidin 2 neper malaysiya parlamént ezasi bilen uchriship, ular bilen malaysiya parlaméntida "Uyghurlargha köngül bölüsh guruppisi" qurush üstide söhbetleshken.

Ular yene malaysiyadiki chong partiyelerdin bolghan malaysiya islam partiyesining yash wekilliri bilen hem shundaqla teklipke bina'en amérikining malaysiyada turushluq elchixanisidimu uchrishishlarni élip barghan.

Ilshat hesen ependining bildürüshiche, ularning bügünki pa'aliyetlirining ichide nahayiti ehmiyetlik hésablan'ghanlirining biri, ularning malaysiyadiki bir qisim uniwérsitétlarning oqughuchilar uyushmiliri wekilliri bilen ötküzgen uchrishi iken. Malaysiya yashlirining Uyghur mesilisige bolghan qizghinliqi dunya Uyghur qurultiyi wekillirini hayajan'gha chömdürgen.

Malaysiya iqtisadiy tereqqiy qiliwatqan we démokratiyesi xéli tereqqiy qilghan bir dölet bolush süpiti bilen islam dunyasida we sherqiy jenubiy asiyadiki tesir küchi zor döletlerning biri bolup hésablinidiken. Dunya Uyghur qurultiyi wekillirining qarishiche, ene shu sewebtin malaysiya hökümiti we xelqining Uyghur mesilisige köngül bölüshining ehmiyiti muhimdur.

Dunya Uyghur qurultiyi wekilliri ziyaritining birinchi küni yeni 14-yanwar küni malaysiyaning mu'awin bash ministiri we malaysiya dini ishlar ministiri qatarliqlar bilen uchriship, Uyghur mesilisi boyiche ayrim-ayrim söhbette bolush pursitige érishken idi.

Malaysiyaning mu'awin tashqi ishlar ministiri datuk merzuqi buningdin bir ay ilgiri Uyghurlar mesilisi heqqide söz qilghanda: "Uyghurlar uchrawatqan ehwalgha qarita biz öz qarishimizni we meydanimizni ipadilewatimiz. Shuningdek Uyghurlarning diniy we insaniy heqlirige kapaletlik qilishini tewsiye qilimiz," dep ipade bildürgen idi.

Toluq bet