Shwétsiye parlaméntida Uyghurlar toghrisida guwahliq bérish yighini ötküzüldi

Ixtiyariy muxbirimiz arslan
2019-05-31
Élxet
Pikir
Share
Print
Shiwétsiyede hökümet bashquruwatqan sotsiyal démokratlar partiyesidin tomas hammarbérg (Thomas Hammarberg) ependi.
Shiwétsiyede hökümet bashquruwatqan sotsiyal démokratlar partiyesidin tomas hammarbérg (Thomas Hammarberg) ependi.
Social Media

29-May küni shwétsiye sotsiyal démokratlar partiyesidin tomas hammarbirg ependining teklipi bilen shwétsiye parlaméntida, Uyghur diyaridiki xitayning jaza lagérliri we lagérgha qamalghan Uyghurlar toghrisida guwahliq bérish yighini ötküzüldi.

Yighin'gha shwétsiyediki bir qisim Uyghurlar, xelq'ara kishilik hoquq teshkilati, shwétsiye qelemkeshler jem'iyiti we shwétsiyediki "Charta 2008" namliq teshkilatlarning wekilliridin bolup, bir türküm kishiler qatnashti.

Bu yighinni shiwétsiyede hökümet bashquruwatqan sotsiyal démokratlar partiyesidin tomas hammarbérg (Thomas Hammarberg) ependi bilen shiwétsiye Uyghur ma'arip uyushmisi birlikte uyushturghan bolup, yighinda xelq'ara kishilik hoquqni közitish teshkilatining shiwétsiye we daniye mes'uli monis mollandér (Måns Molander), shiwétsiye kishilik hoquq teshkilati charta 2008 (Charta 2008)ning mes'uli shuningdek yene shiwétsiye Uyghur ma'arip uyushmisining re'isi nijat turghun ependi söz qildi.

Yighinda tomas hammarbérg, bu qétimqi yighinni orunlashturghanliqining sewebini anglatti, arqidin yighinda sözi qilish üchün teklip qilin'ghan kishilik hoquqni közitish teshkilatining shiwétsiye we daniye mes'uli monis mollandér xitayning Uyghur üstidin yürgüzüwatqan bésim siyasetliri, shundaqla yéqinqi yillardin buyan Uyghur diyarida qurulghan jaza lagérliri toghrisida igiligen melumatlirini anglitish bilen birge, Uyghurlar toghrisida mexsus ishligen qisqa höjjetlik filim qoyuldi.

Yighinda Uyghurlargha wakaliten shwétsiye Uyghur ma'arip uyushmisining re'isi nijat turghun ependi söz qilip, jaza lagérlirining omumiy ehwali, jaza lagérlirining qandaq halette ikenliki, ichide néme ishlar yüz bériwatqanliqi we bashqa ehwallar toghrisida tepsiliy melumat berdi.

Biz bu yighin toghrisida yene nijat turghun ependi bilen söhbet élip barduq.

Nijat turghun ependining bildürüshiche, u xitayning Uyghurlar üstidin yürgüzüwatqan bésim siyasetliri toghrisida toxtilip, xitayning atalmish qoshmaq tughqanchiliq nam astida bir milyondin artuq kadirlirini Uyghur a'ililerning öylirige ewetip orunlashturushi, Uyghur qizlirining xitaylar bilen toy qilishqa mejburliniwatqanliqi, kichik balilarningmu ata-aniliri jaza lagérgha qamalghanliqi sewebidin yétimxanilargha orunlashturulup xitaylashturush siyasitining qurbani boluwatqanliqi we shuninggha oxshash jaza lagérlirining sirtidiki Uyghurlarning éghir bésim astida yashawatqanliqini emeliy misallar bilen sözlep ötken.

Yighin axirida shwétsiye hökümiti we döliti bolush süpiti bilen Uyghur mesiliside qandaq shekilde yol tutush kérekliki toghrisida teklip layiheler otturigha qoyulghan.

Yighin axiri so'al-jawab we erkin munazire shekilde dawamlashqan bolup, bir qisim kishiler özlirining köz qarashlirini otturigha qoyghan. Munazire jeryanida, Uyghur ma'arip uyushmisining bash katipi abdullah kökyar ependi, Uyghur diyarida, xitay da'iriliri bigunah Uyghurlarni tutqun qilip türme we jaza lagérlirigha solap hertürlük zulumlarni qiliwatqanliqini, emma az sandiki axbarat wasitiliridin bashqa pütün dunya buninggha süküt qilip turuwatqanliqini tekitligen.

Biz yene téximu köp melumatqa ige bolush üchün shiwétsiye Uyghur ma'arip uyushmisining teshwiqat mes'uli turghunjan ependi bilen söhbet élip barduq.

Turghunjan ependi bu yighinning nahayiti yaxshi ötkenlikini, yighinda otturigha qoyulghan Uyghurlargha alaqidar melumatlar we doklatlar shwétsiye parlaméntining Uyghur siyasitige türtkilik rol oynishini ümid qilidighanliqini bildürdi.
Toluq bet