Серикҗан билашоғлиниң аяли ләйла: «қазақистан еримни йошурун хитайға қайтуруветәрму?»

Мухбиримиз гүлчеһрә
2019-08-13
Елхәт
Пикир
Share
Принт
Серикҗан билашоғлиниң аяли ләйла адилҗан.
Серикҗан билашоғлиниң аяли ләйла адилҗан.
Leyla Adiljan teminligen

«Ата юрт пидаийлири» тәшкилатиниң қурғучиси, қазақ паалийәтчи серикҗан билашоғли үстидин 29-июл нурсултан шәһиридә ечилған сотта, серикҗанниң мирза қамақ җазасини буниңдин кейин нурсултан шәһиридә әмәс бәлки алмутадики өз өйидә давам қилишиға қарар берилгән иди. Аридин 2 һәптә өтүп серкҗанниң аялидин игилишимизчә серикҗан техи өйгә қайтурулмиған вә бу арилиқта қазақистандики иҗтимаий таратқулирида серкҗанниң хитайға мәхпий қайтурулуш еһтималлиқлири һәққидә ғулғула пәйда болуп, серкҗанниң аилиси вә униң қоллиғучилирида бәлгилик әндишә қозғиған икән.

«Атаюрт пидаийлири» намлиқ кишилик һоқуқ тәшкилатиниң қурғучиси серикҗан биләш оғлиниң адвокати айман умарова, 6-авғуст қазақистандики бир қисим иҗтимаий таратқуларда баянат елан қилип, серкҗанниң аилиси һәм қоллиғучилириниң, серкҗанниң мәхпий һалда қазақистандин хитайға қайтурулушидин әндишә қиливатқанлиқини баян қилған һәмдә пүткүл демократик дөләт вә кишилик һоқуқ тәшкилатлиридин серикҗанға көңүл бөлүш вә уни қутқузушни тәләп қилған.

Серикҗанниң аяли ләйла адилҗан 30-июл күни зияритимизни қобул қилғанда еригә берилгән мирза қамақ җазасиниң алмутаға йөткилидиғанлиқини, йәни серикҗанниң мирза қамақни әмди нур султанда әмәс алмутадики өз өйидә өткүзсә болидиғанлиқини хушаллиқ билән ейтқаниди.

Аридин икки һәптә өтүп, 13-авғуст күни ләйлаға қайта телефон қилғинимизда, у серикҗанниң мирза қамақ җазасини алмутада давам қилиш рәсмийәтлири үчүн узун вақит кәткәнлики вә униң һазирғичә техи алмутаға қайтип келәлмигәнликини билдүрди.

Ләйла ханим, адвокат айҗан умарова 6-авғуст күни тарқатқан баянатида тәкитлигинидәк, өзиниңму серкҗанниң худди түркийәдин йеқинда хитайға қайтурулғанлиқи паш болған зиннәтгүл вәқәсидә, йошурун һалда қазақистан даирилири тәрипидин ухлитиш окули урулуп, хитайға қайтуриветиләрму дәп әндишә қиливатқанлиқини билдүрди.

Серикҗан 20 йилдин буян қазақистанда яшимақта шундақла у 2011-йили қазақистан гиражданлиқиға өтүп болған. Биз ләйла ханимдин униң қазақистанниң өз қанунлуқ пуқраси болған серикҗанни хитайға қайтуруветәрму дәп әндишилинишиниң қандақ бир асаси барлиқини сориғинимизда у буниңға мундақ 3 хил сәвәбни көрсәтти.

Униң ейтишичә, алдинқи қетимлиқ соттин кейинла иҗтимаий таратқуларда «бәзи хитайпәрәс кишиләр серкҗанни хитайниң ишпийони» дегәндәк өсәк сөзләрни тарқитишқа башлап, ғулғула пәйда қилған. Ләйла әдлийә тармақлири җинайәт бекитмигән әһвал астида чиққан бу ғулғулини мәқсәтлик дәп қарайдикән.

Иккинчидин, һазир қазақистанниң ички сиясий вә иҗтимаий вәзийитиму турақсиз болуп, қазақистан һөкүмити йеқинқи намайишларда нурғун өктичиләрни вә паалийәтчиләрни қолға алған вә бәзилириниң түрмидә өлгәнликиму ашкариланған. Қазақистанниң, сиясий мәйдани охшимайдиған кишиләрни қаттиқ бастуруватқанлиқиму ләйланиң әндишисини күчәйткән. Шуниң үчүн у серикҗанниң хәтәрдә икәнликини һес қилған.

Үчинчидин, қазақистан һөкүмити өзиниң пуқралиқиға өткән қазақларни қайтуруш мисаллириму йоқ әмәс болуп, қазақистан әсқар азатбек исимлик, уйғур аптоном районидин көчүп кәлгән вә қазақистан пуқралиқиға өтүп болған бир қазақ содигәрни 2017-йили хитайниң тәлипи бойичә қайтурувәткән. У қайтқандин кейин түрмигә қамалғанлиқи ашкариланғаникән. Бу мисални өткән һәптә адвокат айҗан умароваму өз баянатида әскәртип өткән.

Ләйла мушу бир қанчә мәсилиләрни көздә тутуп, гунаһсиз һалда тутқун қилинип, мирзақамақ җазаси бәш айдин буян 3 қетим узартилған ериниң хитайға қайтурулуш еһтималини нәзәрдин сақит қилмаслиқ вә бу әндишисини хәлқара җамаәткә билдүрүш зөрүр дәп билидиғанлиқини тәкитлиди.

Серикҗанниң аяли ләйла адилҗан серикҗанниң мирзақамақ муддитини сот ечилғанға қәдәр әмди алмутадики өз өйидә өткүзүши керәкликини, рәсмийәтлириниң ахири пүткәнликини, әгәр башқа өзгириш болмиса 15-авғуст серикҗанниң нурсултан шәһиридин алмутаға келидиғанлиқини, әмма йәнә бир қетимлиқ сотниң вақти вә қәйәрдә ечилидиғанлиқи техи бекитилмигәнликини билдүрди.

Буниң алдида мәтбуатларда паалийәтчи серикҗан билашоғлиниң 7 йиллиқ қамаққа һөкүм қилиниш хәвпигә дуч кәлгәнлики һәққидә түрлүк әндишиләр мәйданға кәлгәниди. Серикҗанниң адвокати айман умарова 24‏-июл күни алмутада өткүзүлгән ахбарат елан қилиш йиғинида тәптиш даирилириниң униңға әвәткән әйибнамисидә билашоғлини башқиларни «җиһад» қа чақириш, «миллий өчмәнликкә қутратқулуқ қилиш» билән әйиблигәнликини билдүргәниди. Айман умарова йәнә әгәр сотта серикҗанға артилған бу җинайәтләр бекитилгән тәқдирдә униң 2 йилдин 7 йилиғичә қамақ җазасиға һөкүм қилиниш еһтималлиқи барлиқини оттуриға қойғаниди.

Пикирләр (0)
Share
Толуқ бәт