Qeshqerdiki bir saqchi: "Semen sayahet guruhining bashliqi ibrahim musa ayali we oghli bilen tutqunda"

Muxbirimiz shöhret hoshur
2019-03-11
Élxet
Pikir
Share
Print
Semen sayahet guruhining bash diréktori, semen méhmanxanisining sahibi ibrahim semen ependi.
Semen sayahet guruhining bash diréktori, semen méhmanxanisining sahibi ibrahim semen ependi.
Tahir Mutellip Qahiri teminligen

Qeshqer weziyitidin xewerdar kishilerdin biri semen sayahet guruhining bash diréktori, semen méhmanxanisining sahibi ibrahim musa, uning ayali dilnur hüseyin we bir oghli bilen birlikte tutqunda ikenlikini melum qildi.

Muxbirimizning qeshqerdiki alaqidar orunlargha qarita élip barghan téléfon ziyaretliri dawamida qeshqerdiki semen méhmanxanisi tewelikige mes'ul bir dölet amanliq xadimi ibrahim musaning ayali we otturanchi oghli bilen birlikte tutqunda ikenlikini delillidi.

Weziyettin xewerdar kishining radiyomizgha bildürüshiche, qeshqer semen sayahet guruhining bash diréktori, semen méhmanxanisining sahibi ibrahim musa qeshqerde eng baldur igilik tikligen, méwe-chéwe sodisi, öy-mülük tijariti, méhmanxana we sayahet ishliri qatarliq köp xil sahede soda qilip béyighan kishi iken. Igilinishiche, ibrahim musa xitay dölet bixeterlik xadimliri teripidin 2017‏-yilning béshida ürümchige ekétilgen. Aridin uzun ötmey uning ayali dilnur we bir oghlimu tutqun qilin'ghan. Deslep téléfonimizni qobul qilghan qeshqerdiki alaqidar xadimlar ibrahim musa we uning shirkiti heqqidiki so'alimizgha jawab bermidi. Tordiki uchur arxipliridin melum bolushiche, ibrahim musa 2005‏-yili xitay boyiche "Memliketlik emgek nemunichisi" bolup bahalan'ghan. Yene bir tordin öchürüwétilgen xewerning iznasidin melum bolushiche, ibrahim musa 2016‏-yilining axiri qeshqer wilayetlik soda-sana'etchiler birleshmisining hey'et ezaliridin biri bolup saylan'ghan.

Qeshqerdiki semen méhmanxanisining mulazimetchi xadimliri ibrahim musa heqqidiki so'alimizgha özlirining jawab bérelmeydighanliqini, buninggha peqet méhmanxanining nöwettiki diréktoriningla jawab béreleydighanliqini bayan qildi. Emma bu diréktor ibrahim musaning nediliki we a'ile ezalirining téléfon nomuri heqqidiki so'alimizni qopalliq bilen ret qildi. Izchil élip barghan éniqlashlirimiz dawamida qeshqerdiki semen méhmanxanisi tewelikige mes'ul bir dölet amanliq xadimi téléfonimizni qobul qildi. U semen méhmanxanisining nöwettiki sahibining wu zong isimlik bir xitay ikenlikini ashkarilidi. U so'allirimizgha jawaben ibrahim musaning tutqunda ikenlikini delillidi. Gerche u ibrahim musaning éniq qachan tutulghanliqi heqqide melumat bérelmigen bolsimu, emma ibrahim musaning ayali dilber hüseyinningmu tutqunda ikenlikini inkar qilmidi. Özining semen tewelikining muqimliq ishlirigha mes'ul saqchi ikenliki we bir guruppa dölet amanliq xadimlirining bashliqi ikenlikini tilgha alghan bu xadim ibrahim musaning délosigha özining arilashmighanliqini, délosining tepsilatidinmu xewiri yoqluqini, ibrahim musa ürümchige élip kétilgendin kéyin alaqidar ishlarda méhmanxanining nöwettiki diréktori wu zong bilenla munasiwet qiliwatqanliqini tilgha aldi.

Ilgiri qeshqerde xelq'ara méwe-chéwe sodisi bilen shughullan'ghan, nöwette yaponiyede panahlinip turuwatqan abduraxman hesen ependining bayan qilishiche, ibrahim musa qeshqerde xéli igilik tikligen tijaretchilerdin biri bolup, u aldinqi yili qeshqer wilayetlik soda-sana'etchiler birleshmisining re'isi abdujélil hajim qatarliq bir türüküm soda-sana'etchiler bilen bir qatarda tutulghan iken.

Qeshqer weziyitidin xewerdar kishining bayan qilishiche, qeshqerde közge körün'gen Uyghur sodigerler 2017‏-yildin bashlap tutqun qilin'ghandin kéyin ularning soda shirketlirining bezliri qeshqerde sodisi aqmighan xitay tijaretchilerning qoligha ötüp ketken؛ yene beziliri bolsa shu shirketlerdiki xitay ishchi-xizmetchilerning qoligha ongche qalghan. Mezkur dölet amanliq xadimi semen méhmanxanisining nöwettiki diréktori wu zongning eslide bu méhmanxanining bir mulazimetchisi ikenlikini ashkarilidi. U so'alimizgha jawaben ibrahim musaning 6 perzenti barliqi, ularning nöwette öyide bar-yoqluqigha bir nerse déyelmeydighanliqini éytti. U yene ibrahim musaning otturanchi oghlining tutqunda ikenlikidin xewiri barliqini yoshurmidi. Bu xadim bashtin-axir ibrahim musaning tutulush sewebi, ürümchige élip kétilgendin kéyinki qamalghan orni we teqdiri heqqide héchqandaq bir melumatining yoqluqini tekrarlidi.

Abduraxman hesen ependi ibrahim musaning ijtima'iy munasiwetliri yaki pa'aliyetliri seweblik tutulghan bolush éhtimalining töwenlikini, uning peqet muweppeqiyet qazan'ghan bir Uyghur karxanichi bolush süpiti bilen xitay da'iriliride endishe peyda qilghan bolushi mumkinlikini ilgiri sürdi.

Xitay tor arxiplirida hélihem saqlinip turuwatqan Uyghur rayondiki öy-mülük shirketliri we sodigerliri tizimlikide ibrahim musaningmu ismi we semen sayahet ishliri guruhining nami tilgha élin'ghan. Mezkur tizimlikte ibrahim musaning 2000 ‏-yilila 12 milyon yüenlik mebleghge ige karxanichi ikenliki xatirilen'gen.

Toluq bet