Қәшқәрдики бир сақчи: «сәмән саяһәт гуруһиниң башлиқи ибраһим муса аяли вә оғли билән тутқунда»

Мухбиримиз шөһрәт һошур
2019-03-11
Елхәт
Пикир
Share
Принт
Сәмән саяһәт гуруһиниң баш директори, сәмән меһманханисиниң саһиби ибраһим сәмән әпәнди.
Сәмән саяһәт гуруһиниң баш директори, сәмән меһманханисиниң саһиби ибраһим сәмән әпәнди.
Tahir Mutellip Qahiri teminligen

Қәшқәр вәзийитидин хәвәрдар кишиләрдин бири сәмән саяһәт гуруһиниң баш директори, сәмән меһманханисиниң саһиби ибраһим муса, униң аяли дилнур һүсәйин вә бир оғли билән бирликтә тутқунда икәнликини мәлум қилди.

Мухбиримизниң қәшқәрдики алақидар орунларға қарита елип барған телефон зиярәтлири давамида қәшқәрдики сәмән меһманханиси тәвәликигә мәсул бир дөләт аманлиқ хадими ибраһим мусаниң аяли вә оттуранчи оғли билән бирликтә тутқунда икәнликини дәлиллиди.

Вәзийәттин хәвәрдар кишиниң радийомизға билдүрүшичә, қәшқәр сәмән саяһәт гуруһиниң баш директори, сәмән меһманханисиниң саһиби ибраһим муса қәшқәрдә әң балдур игилик тиклигән, мевә-чевә содиси, өй-мүлүк тиҗарити, меһманхана вә саяһәт ишлири қатарлиқ көп хил саһәдә сода қилип бейиған киши икән. Игилинишичә, ибраһим муса хитай дөләт бихәтәрлик хадимлири тәрипидин 2017‏-йилниң бешида үрүмчигә әкетилгән. Аридин узун өтмәй униң аяли дилнур вә бир оғлиму тутқун қилинған. Дәсләп телефонимизни қобул қилған қәшқәрдики алақидар хадимлар ибраһим муса вә униң ширкити һәққидики соалимизға җаваб бәрмиди. Тордики учур архиплиридин мәлум болушичә, ибраһим муса 2005‏-йили хитай бойичә «мәмликәтлик әмгәк нәмуничиси» болуп баһаланған. Йәнә бир тордин өчүрүветилгән хәвәрниң изнасидин мәлум болушичә, ибраһим муса 2016‏-йилиниң ахири қәшқәр вилайәтлик сода-санаәтчиләр бирләшмисиниң һәйәт әзалиридин бири болуп сайланған.

Қәшқәрдики сәмән меһманханисиниң мулазимәтчи хадимлири ибраһим муса һәққидики соалимизға өзлириниң җаваб берәлмәйдиғанлиқини, буниңға пәқәт меһманханиниң нөвәттики директориниңла җаваб берәләйдиғанлиқини баян қилди. Әмма бу директор ибраһим мусаниң нәдилики вә аилә әзалириниң телефон номури һәққидики соалимизни қопаллиқ билән рәт қилди. Изчил елип барған ениқлашлиримиз давамида қәшқәрдики сәмән меһманханиси тәвәликигә мәсул бир дөләт аманлиқ хадими телефонимизни қобул қилди. У сәмән меһманханисиниң нөвәттики саһибиниң ву зоң исимлик бир хитай икәнликини ашкарилиди. У соаллиримизға җавабән ибраһим мусаниң тутқунда икәнликини дәлиллиди. Гәрчә у ибраһим мусаниң ениқ қачан тутулғанлиқи һәққидә мәлумат берәлмигән болсиму, әмма ибраһим мусаниң аяли дилбәр һүсәйинниңму тутқунда икәнликини инкар қилмиди. Өзиниң сәмән тәвәликиниң муқимлиқ ишлириға мәсул сақчи икәнлики вә бир гуруппа дөләт аманлиқ хадимлириниң башлиқи икәнликини тилға алған бу хадим ибраһим мусаниң делосиға өзиниң арилашмиғанлиқини, делосиниң тәпсилатидинму хәвири йоқлуқини, ибраһим муса үрүмчигә елип кетилгәндин кейин алақидар ишларда меһманханиниң нөвәттики директори ву зоң биләнла мунасивәт қиливатқанлиқини тилға алди.

Илгири қәшқәрдә хәлқара мевә-чевә содиси билән шуғулланған, нөвәттә японийәдә панаһлинип туруватқан абдурахман һәсән әпәндиниң баян қилишичә, ибраһим муса қәшқәрдә хели игилик тиклигән тиҗарәтчиләрдин бири болуп, у алдинқи йили қәшқәр вилайәтлик сода-санаәтчиләр бирләшмисиниң рәиси абдуҗелил һаҗим қатарлиқ бир түрүкүм сода-санаәтчиләр билән бир қатарда тутулған икән.

Қәшқәр вәзийитидин хәвәрдар кишиниң баян қилишичә, қәшқәрдә көзгә көрүнгән уйғур содигәрләр 2017‏-йилдин башлап тутқун қилинғандин кейин уларниң сода ширкәтлириниң бәзлири қәшқәрдә содиси ақмиған хитай тиҗарәтчиләрниң қолиға өтүп кәткән; йәнә бәзилири болса шу ширкәтләрдики хитай ишчи-хизмәтчиләрниң қолиға оңчә қалған. Мәзкур дөләт аманлиқ хадими сәмән меһманханисиниң нөвәттики директори ву зоңниң әслидә бу меһманханиниң бир мулазимәтчиси икәнликини ашкарилиди. У соалимизға җавабән ибраһим мусаниң 6 пәрзәнти барлиқи, уларниң нөвәттә өйидә бар-йоқлуқиға бир нәрсә дейәлмәйдиғанлиқини ейтти. У йәнә ибраһим мусаниң оттуранчи оғлиниң тутқунда икәнликидин хәвири барлиқини йошурмиди. Бу хадим баштин-ахир ибраһим мусаниң тутулуш сәвәби, үрүмчигә елип кетилгәндин кейинки қамалған орни вә тәқдири һәққидә һечқандақ бир мәлуматиниң йоқлуқини тәкрарлиди.

Абдурахман һәсән әпәнди ибраһим мусаниң иҗтимаий мунасивәтлири яки паалийәтлири сәвәблик тутулған болуш еһтималиниң төвәнликини, униң пәқәт мувәппәқийәт қазанған бир уйғур карханичи болуш сүпити билән хитай даирилиридә әндишә пәйда қилған болуши мумкинликини илгири сүрди.

Хитай тор архиплирида һелиһәм сақлинип туруватқан уйғур райондики өй-мүлүк ширкәтлири вә содигәрлири тизимликидә ибраһим мусаниңму исми вә сәмән саяһәт ишлири гуруһиниң нами тилға елинған. Мәзкур тизимликтә ибраһим мусаниң 2000 ‏-йилила 12 милйон йүәнлик мәбләғгә игә карханичи икәнлики хатириләнгән.

Пикирләр (0)
Share
Толуқ бәт