Qeshqerdiki 2-doxturxanining tashqi késeller doxturi sayit hajining tutqunda ikenliki melum

Muxbirimiz méhriban
2019-08-21
Élxet
Pikir
Share
Print

Doxtur sayithaji qasim qeshqer 2-doxturxanisi tashqi késeller bölümining mudir wirachi bolup, u 2017-yil 9-ayning 4-küni, yeni qurban héyt kéchisi saqchixanigha chaqirtilip élip kétilgendin buyanqi ikki yil jeryanida héchqandaq iz-dériki bolmighan.

Uni bilidighanlarning radiyomizgha ashkarilishiche, doxtur sayithaji qasim tejribilik tashqi késeller doxturi bolup, u özi xizmet qilghan doxturxanidila emes, belki jenubiy Uyghur diyarida süydük yolidiki tashni chüshürüsh opératsiyeside yuqiri téxnikisi bilen tonulghan Uyghur doxtur hésablinidiken.

Sayithaji qasimni yéqindin bilidighan tonushliridin bir qancheylen öz kimlikini ashkarilimasliq sherti bilen radiyomiz ziyaritini qobul qilip, doxtur sayithaji heqqide bilidighan ehwallarni bayan qildi.

Ularning bildürüshiche, bu yil 47 yashlargha kirgen sayithaji qasim 1996-yili shinjang tébbiy uniwérsitétining dawalash kespini tügetkendin kéyin, qeshqer 2-xelq doxturxanisining tashqi késeller bölümige xizmetke teqsim qilin'ghan. U 2004-yilidin buyan mezkur doxturxanining süydük yoli we tashqi késeller bölümide wirachliq unwani bilen ishleshke bashlighan. 2006-Yili béyjing tébbiy uniwérsitétining doxturxanisida bir yil bilim ashurghan. Doxtur sayithaji qasim mezkur doxturxanida ishligen 20 yildin buyan börek we süydük yolliridiki tashni chüshürüsh opératsiyesidiki yuqiri mahariti bilen qeshqer wilayitidila emes, belki jenubiy Uyghur diyaridimu name chiqqan iken.

Melum bolushiche, sayithaji qasim 2017-yili 9-ayning 4-küni qeshqerdiki öyidin élip kétilgende uning 80 yashtin halqighan ata-anisi, ayali we ikki nareside balisi néme bolghanliqini bilelmey qalghan. Uning a'ilisidikiler bilen doxturxanidiki xizmetdashlirimu sayit hajining néme sewebtin tutqun qilin'ghanliqini hetta sürüshtürüshkimu pétinalmighan.

Kéyinki mezgillerde a'ilisidikiler sayit hajining tutqun qilinish sewebini saqchilar arqiliq anche-munche xewer tapqan. Igilinishiche, sayit hajining tutulushigha uning ilgiri qeshqer wilayitige qarashliq nahiyelerde élip bérilghan bir qétimliq seyyare dawalash mezgilide melum bir gumanliq kishi chüshken méhmanxanida yatqanliqi seweb bolghan iken.



Ularning bildürüshiche, doxtur sayit haji tutup kétilishtin burun pat-pat herqaysi nahiyelerge teklip qilinip, süydük yolidiki tashni chüshürüsh opératsiyesi ishligen iken. Shu chaghlarda sayithaji heqqide xitay hökümet taratqulirida "Xizmette netije körsetken doxtur" dégendek medhiye tüsidiki xewerler bérilgen iken.

Igilinishimizche, ilgiri ündidar salonida sayithajining kespiy jehettiki yuqiri téxnikisi we ish-izliri tonushturulghan "Kesipke bolghan hörmet we ishtiyaq" namliq edebiy axbarat élan qilin'ghan iken.

Biz qeshqer 2-xelq doxturxanisining tor bétige kirip, mezkur doxturxanining mutexessisler tizimlikini tekshürginimizde sayithaji qasimning ismi tépilmidi. Doxturxanining toridiki xewer we resimlerni tekshürginimizde 2015-yiligha a'it birqanche xewerde sayithaji qasimning 2015-yili doxturxanida échilghan "Bir yol bir belwagh" qurulushi boyiche seperwerlik yighini we ilmiy doklat yighinlirida kolléktip chüshken birqanche parche foto süriti tépildi.

Biz yene doxturxanining 2019-yilliq késel körgüchi mutexessisler tizimliki bilen doxturxanigha a'it xewerlerni tekshürginimizde uning ismining 2017-yili 4-séntebir künidin kéyin doxturxanidiki mutexessisler tizimlikidin öchürülgenliki melum boldi.

Biz qeshqer wilayetlik 2-xelq doxturxanisigha téléfon qilip, tashqi késeller bölümidiki mutexessislerdin mudir wrach sayithajining késel körüsh nomurini qandaq alghili bolidighanliqini sürüshtürduq.

Emma mezkur doxturxanidin téléfonni alghan xadim doxturxanidiki mutexessisler tizimlikide sayithaji qasimning ismining yoqlighini depla téléfonni qoyuwetti.

Sayit haji qasimning ilgiriki késelliridin biri namida eyni nomurgha qayta téléfon qilip uning ismining néme üchün doxturxanining mutexessisler tizimlikidin yoqap ketkenlikini sürüshtürduq.

Bu qétim téléfonimizni alghan ayal xadim awwal téléfonning xata urulghanliqini bildürdi. Uninggha mezkur nomurning qeshqer 2-xelq doxturxanisining tor békitidiki nomur ikenlikini qayta tekrarlighandin kéyin bolsa, u sayithaji doxtur heqqide héchnéme bilmeydighanliqini shunga uning heqqidiki so'allargha jawab bérelmeydighanliqini bildürdi.

Undin kéyin urghan birqanche qétimliq téléfonlirimizning hemmisi dégüdek jawabsiz qaldi.

Doxtur sayithajining ehwali heqqide radiyomizgha inkas yollighan bu kishi yene doxtur sayithaji sürüshtürülgende doxturxana xadimlirining jawab bermesliki heqqidimu özining gumaniy qarashlirini otturigha qoydi.

U özining 2017-yili 9-ayda sayithaji saqchilar teripidin tutqun qilinip soraq qilin'ghan deslepki mezgillerde, sürüshtürüsh arqiliq, saqchilar teripidin tutqun qilinip soraq qilin'ghanlar heqqide idare rehberliri képillik xéti chiqirip berginide, shu kishining qoyup bérilish éhtimalliqini bilgendin kéyin, sayit hajining a'ilisidikiler we uni yéqindin bilidighanlarning qeshqer 2-doxturxana rehberliridin ispat xéti telep qilghan bolsimu, eyni chaghda bu telepning doxturxana bashliqliri teripidin ret qilin'ghanliqini bildürüp, sayithajidek öz kespide pishqan bir doxturning tutqun qilinishida her xil gumanliq qiyaslarni qilish mumkinlikini tekitlidi.

Toluq bet