Qirghizistan bash ministiri daniyar usenuf dölet boyiche jiddiy halet élan qildi

Fransiye agéntliqi, roytérs agéntliqi, intérfakis agéntliqi qatarliq uchur wastilirining xewerlirige qarighanda, bügün qirghizistan bash ministiri daniyar usenuf dölet boyiche jiddiy halet élan qildi. Tönügün qirghizstanning paytexti bishkek shehiride prézidént qurmanbék baqiyéfqa qarshi namayish yüz bergen idi.
Muxbirimiz weli
2010-04-07
Élxet
Pikir
Share
Print

Bügün yene mingdin artuq adem toplinip élip bérilghan chiriklik peyda qilghan namratliqqa qarshi turush namayishida, prézidént baqiyéfning ish binasi qorshiwélin'ghan, qirghizstanning mu'awin bash ministiri we ichki ishlar ministiri görüge éliwélin'ghan, dölet téléwiziye istansisi igiliwélin'ghan. Qirghizistan bixeterlik da'irilirining éytishiche, ular yash bombisi qatarliqlarni qollinip namayishchilarni tarqitiwétishke tirishqan.

Fransiye agéntliqi muxbirliri namayish meydanidin 6 jesetning élip kétiliwatqanliqini körgen. Qirghizistan saqchi da'iriliri 12 adem ölgenlikini ashkarilighan. Amérikining bishkektiki elchixanisi qirghizistanda yüz bériwatqan bu qalaymiqanchiliqtin, bolupmu talasta yüz bergen jiddiyliktin ensirep, sabiq parlamént ezasi ömürbek tékebayéf bashchiliqidiki namayishchilar bilen qirghizistan hökümitini söhbet arqiliq mesilini hel qilishqa ündigen.
 
Bishkektiki ixtiyari muxbirimizning bayan qilishiche, bishkekte pikir erkinlikining boghulushigha qarshi élip bérilghan bu namayishqa 10mingdin artuq adem qatnashti. Hökümet namayishchilargha oq chiqardi, namayishchilardin köp adem öltürüldi we yarilanduruldi.

Shinxu'a agéntliqi, "namayishchilar görüge éliwalghan qirghizistan ichki ishlar ministiri moldomusa kon'gantuyéfni urup öltürgen," dep xewer qildi.
 
Toluq bet