Qirghizistan jumhuriyitining musteqilliq bayrimini qutlash pa'aliyitige Uyghurlarmu qatnashti

Ixtiyariy muxbirimiz féruze
2019-09-02
Élxet
Pikir
Share
Print
Prézidént mehkimisidiki az sanliq milletler we diniy ishlar bölümining bashliqi sanjar tajimemetof ependi Uyghur chédirini ziyaret qildi. 2019-Yili 31-awghust, bishkek
Prézidént mehkimisidiki az sanliq milletler we diniy ishlar bölümining bashliqi sanjar tajimemetof ependi Uyghur chédirini ziyaret qildi. 2019-Yili 31-awghust, bishkek
RFA/Féruze

31-Awghust küni qirghizistanda milliy musteqilliq bayrimi qutlandi.

1991-Yili sabiq sowét ittipaqi yimirilip, uning terkibidiki herqaysi ittipaqdash jumhuriyetler arqa-arqidin musteqilliq jakarlidi. Shu qatarida qirghizistanmu 1991-yili 31-awghust küni öz musteqilliqini jakarlighan idi.

31-Awghusttiki musteqilliq bayrimigha qirghizistanda yashawatqan Uyghurlarmu qatniship, özlirining milliy en'eniwi bayliqliri bilen qirghizistanning musteqilliq künini tebriklidi.

Radiyomiz ziyaritini qobul qilghan qirghizistan Uyghurliri "Ittipaq" jem'iyitining re'isi esqer qasimof qirghizistan jumhuriyitining musteqilliq bayrimining bu dölette yashawatqan her millet xelqining, shu jümlidin Uyghurlarningmu bayrimi ikenlikini, shu munasiwet bilen bu yil "Ittipaq" jem'iyitining qirghizistan musteqilliqining ottuz yilliqini tebriklesh pa'aliyiti uyushturghanliqini bildürdi.

Bishkek shehirining "Qurmanjan datqa" namliq meydanida qirghizistan xelq birleshmisi uyushturghan musteqilliq bayrimini qutlash murasimida qirghizistan Uyghurlirining "Ittipaq" jem'iyiti yashlar komitéti mexsus chédir tikip, Uyghurlarning milliy kiyim-kéchekliri, we kündilik turmush buyumlirini namayan qildi. Mezkur meydan paytext shehirining neq merkizige jaylashqan bolghachqa Uyghurlar ötküzgen murasimni 1000 gha yéqin kishi ziyaret qildi. Ularning qatarida rusiye, yawropa we amérikadin kelgen sayahetchilermu bar idi.

Sayahetchiler Uyghur chédirini ziyaret qilip, Uyghurlarning doppisini kiyip süretlerge chüshti. Ular bügünki Uyghur xelqining éghir weziyitidin xewerdar ikenlikini bildürüshti. Radiyomiz ziyaritini qobul qilghan washin'gton shehiridin kelgen sayahetchi xanim-ependiler xitay hökümitining Uyghurlar üstidin yürgüzüwatqan bésim siyasiti we ularni lagérlargha qamighanliqi heqqide gézitlerdin we chet'ellerdiki Uyghurlarning naraziliq namayishliridin bilidighanliqini bayan qilishti.

Uyghur chédirini yene prézidént mehkimisidiki az sanliq milletler we diniy ishlar bölümining bashliqi tajimemetof sanjar ependimu ziyaret qilip, bu yerge qoyulghan qedimiy samawerlarni körüp heyran bolghanliqini bildürdi.

Qirghizistan xelq birleshmisi medeniyet bölümining bashliqi aynagül cholowa mezkur bayramning milletler ara ittipaqliqni kücheytishte muhim rol oynaydighanliqini tilgha aldi. U bu xil murasimlarda Uyghur jama'itining alahide aktipliq bilen qatnishidighanliqini tekitlep ötti.

U mundaq dédi: "Biz bügün qirghizistan jumhuriyitining musteqilliqigha béghishlan'ghan chong murasimni ötküzüwatimiz. Mezkur murasimgha 20 din oshuq étnikiliq uyushmilar qatnashti. Körgezmiler uyushturuldi. Herqaysi xelqlerning qol hüner sen'iti we kündilik buyumliri namayan qilindi. Bu murasimlarning meqsiti milletler ara ittipaqliqni we öz-ara hörmetni kücheytishtin ibarettur. Méningche, biz meqsitimizge yettuq. Barliq milletlerning uyushmiliri yaxshi teyyarliqlarni qilishti, lékin méning shexsiy köz qarishimda Uyghurlar her da'im bundaq murasimlarda alahide teyyarliqlar bilen qatnishidu."

Bu murasimda "Qurmanjan meydanida" konsért uyushturuldi. Qirghizistan xelq artisti sultan kerimof güzel naxshilirini orundap tamashibinlarning qelbini lerzige keltürdi. Konsért dawamida yene Uyghur milliy ussullirimu orundaldi. Radiyomiz ziyaritini qobul qilghan sultan kerimof musteqil qirghizistanda her millet xelqining barawer, inaq we öm yashawatqanliqini, shu qatarida Uyghurlarningmu zor tereqqiyatlargha ige boluwatqanliqini bildürdi.

Shuni tekitlep ötüsh kérekki, 1930-yillirida stalin hökümranliqidiki sabiq sowétlar ittipaqida, bolupmu sowét ittipaqining ottura asiyadiki özbékistan we qirghizistan ittipaqdash jumhuriyetliride yashaydighan Uyghurlargha qarita qattiq bésimlar élip bérilgen idi. Shu sewebtin Uyghurlarning köp qismi özini özbék yaki qirghiz tizimlitishqa mejbur bolghan idi.

Musteqilliq bayrimini qutlash murasimliri yene issiq-ata nahiyesining merkizi kant shehiridimu uyushturuldi. Mezkur nahiyediki Uyghur jama'iti Uyghur yémek-ichmek yermenkisi uyushturdi. Murasimda tonulghan naxshichi nurtay abdurehim naxsha éytti, "Yultuz" ansambili ussul orundap tamashibinlarning alqishlirigha érishti.

Toluq bet