Qirghizistandiki Uyghurlar meschitler échilghandin kéyinki tunji namizida wetendiki Uyghurlar üchün du'a qildi

Ixtiyariy muxbirimiz féruze
2020-06-08
Élxet
Pikir
Share
Print
Uyghurlar zich olturlashqan bishkek shehirining etrapidiki nowopokrowka yézisidiki meschitte namazini tügitip chiqqan Uyghurlar. 2020-Yili 8-iyun, qirghizistan.
Uyghurlar zich olturlashqan bishkek shehirining etrapidiki nowopokrowka yézisidiki meschitte namazini tügitip chiqqan Uyghurlar. 2020-Yili 8-iyun, qirghizistan.
RFA/Féruze

8-Iyun küni qirghizistan hökümiti perman chiqirip, memlikettiki jame-meschitlerning qayta échilghanliqini jakarlidi. Buning bilen qirghizistandiki Uyghur jama'iti memlikettiki bashqa musulmanlar bilen bir qatarda namazlirini meschitlerde öteshke bashlidi.

Bu yil 20-mart küni qirghizistan hökümiti korona wirusi yuqumi seweblik meschitlerni waqitliq taqighan we puqralarning kolléktip bir sorun'gha yighilip ammiwi pa'aliyetlerde bolushini chekligen idi. Jumhuriyet tewesidiki musulmanlar diniy ibadetlirini meschitlerde dawam qilalmighanliqi, bolupmu jüme we tarawi namazlirini birlikte oquyalmighanliqi üchün bi'aram bolushqan idi.

Uchur qollash apparatining bildürüshiche, 8-iyun künidin tartip qirghizistanda meschit we chérkawlar qaytidin échilghan. Bu qarar qirghizistan hökümitining jumhuriyetning bash muftisi we diniy organlirining wekilliri bilen meslihetleshkendin kéyin chiqirilghan. Lékin mezkur qararda wirusning tarqitilishining aldini élish üchün bir qatar tedbirlerning élinishi telep qilin'ghan. Yeni nu qarar boyiche her bir kishi maska taqishi, meschitlerning kirish éghizida beden témpératurisini ölchitishi we ammiwi sorunlarda bir-biridin ariliq saqlishi kérek iken.

Uyghurlar zich olturlashqan bishkek shehirining etrapidiki nowopokrowka yézisidiki meschitining mutwelisi mirza'exmet sadiqof ziyaritimizni qobul qilip, meschit we jamelerde wirustin yuqumlinishning aldini élish üchün namaz qa'idilirining bir az özgertilgenlikini bayan qildi. U yene yéqin ariliqta meschitlerde balilargha qur'an ögitish derslirining échilidighanlighini tilgha aldi.

8-Iyun küni, yeni meschitler échilghan tunji küni qirghizistanning toqmaq, kengbulung, wostok, lébédinowka we bashqa rayonliridiki meschitler échilip, bu jaylarda yashighuchi Uyghurlar jama'et bilen birlikte namazlirini oqughan we Uyghur diyaridiki qérindashlirini eslep, ular üchün du'a qilghan.

Radiyomiz ziyaritimizni qobul qilghan Uyghur aqsaqallirining aktip pa'aliyetchisi gheyret jahanof xitaydin tarqalghan korona wirusining pütün dunyagha, bolupmu musulmanlargha nurghun qulaysizliqlarni élip kélgenligini bayan qildi. U meschitker échilghandin kéyin qirghizistandiki Uyghur jama'itining tunji namazlirida Uyghur diyarida lagérlargha solan'ghan milyonlighan qérindashliri üchün du'a qilghanliqini tilgha aldi.

Qirghizistan hökümitining korona wirusi yuqumining aldini bash shtabining eskertishiche, dölette karantin tüzümi yene dawam qilidiken. Shunga puqralarning taziliq ölchemlirige emel qilishi we ammiwi sorunlarda maska taqishi dawamliq telep qilinidiken.

Qirghizistanda korona wirus yuqumi bashlan'ghandin buyan wirus bilen yüqumghanlarning sani 2000 gha yetken. Yuqumlan'ghanlar ichide 365 neper doxtur we sahiye xadimi bar iken. Bu jeryanda 20 kishi korona wirusi sewebidin qaza tapqan.

Toluq bet