Қирғизистандики уйғурлар мәсчитләр ечилғандин кейинки тунҗи намизида вәтәндики уйғурлар үчүн дуа қилди

Ихтиярий мухбиримиз ферузә
2020-06-08
Елхәт
Пикир
Share
Принт
Уйғурлар зич олтурлашқан бишкәк шәһириниң әтрапидики новопокровка йезисидики мәсчиттә намазини түгитип чиққан уйғурлар. 2020-Йили 8-июн, қирғизистан.
Уйғурлар зич олтурлашқан бишкәк шәһириниң әтрапидики новопокровка йезисидики мәсчиттә намазини түгитип чиққан уйғурлар. 2020-Йили 8-июн, қирғизистан.
RFA/Féruze

8-Июн күни қирғизистан һөкүмити пәрман чиқирип, мәмликәттики җамә-мәсчитләрниң қайта ечилғанлиқини җакарлиди. Буниң билән қирғизистандики уйғур җамаити мәмликәттики башқа мусулманлар билән бир қатарда намазлирини мәсчитләрдә өтәшкә башлиди.

Бу йил 20-март күни қирғизистан һөкүмити корона вируси юқуми сәвәблик мәсчитләрни вақитлиқ тақиған вә пуқраларниң коллектип бир сорунға йиғилип аммиви паалийәтләрдә болушини чәклигән иди. Җумһурийәт тәвәсидики мусулманлар диний ибадәтлирини мәсчитләрдә давам қилалмиғанлиқи, болупму җүмә вә тарави намазлирини бирликтә оқуялмиғанлиқи үчүн биарам болушқан иди.

Учур қоллаш аппаратиниң билдүрүшичә, 8-июн күнидин тартип қирғизистанда мәсчит вә черкавлар қайтидин ечилған. Бу қарар қирғизистан һөкүмитиниң җумһурийәтниң баш муфтиси вә диний органлириниң вәкиллири билән мәслиһәтләшкәндин кейин чиқирилған. Лекин мәзкур қарарда вирусниң тарқитилишиниң алдини елиш үчүн бир қатар тәдбирләрниң елиниши тәләп қилинған. Йәни ну қарар бойичә һәр бир киши маска тақиши, мәсчитләрниң кириш еғизида бәдән температурисини өлчитиши вә аммиви сорунларда бир-биридин арилиқ сақлиши керәк икән.

Уйғурлар зич олтурлашқан бишкәк шәһириниң әтрапидики новопокровка йезисидики мәсчитиниң мутвәлиси мирзаәхмәт садиқоф зияритимизни қобул қилип, мәсчит вә җамәләрдә вирустин юқумлинишниң алдини елиш үчүн намаз қаидилириниң бир аз өзгәртилгәнликини баян қилди. У йәнә йеқин арилиқта мәсчитләрдә балиларға қуран өгитиш дәрслириниң ечилидиғанлиғини тилға алди.

8-Июн күни, йәни мәсчитләр ечилған тунҗи күни қирғизистанниң тоқмақ, кәңбулуң, восток, лебединовка вә башқа районлиридики мәсчитләр ечилип, бу җайларда яшиғучи уйғурлар җамаәт билән бирликтә намазлирини оқуған вә уйғур дияридики қериндашлирини әсләп, улар үчүн дуа қилған.

Радийомиз зияритимизни қобул қилған уйғур ақсақаллириниң актип паалийәтчиси ғәйрәт җаһаноф хитайдин тарқалған корона вирусиниң пүтүн дуняға, болупму мусулманларға нурғун қулайсизлиқларни елип келгәнлигини баян қилди. У мәсчиткәр ечилғандин кейин қирғизистандики уйғур җамаитиниң тунҗи намазлирида уйғур диярида лагерларға соланған милйонлиған қериндашлири үчүн дуа қилғанлиқини тилға алди.

Қирғизистан һөкүмитиниң корона вируси юқуминиң алдини баш штабиниң әскәртишичә, дөләттә карантин түзүми йәнә давам қилидикән. Шуңа пуқраларниң тазилиқ өлчәмлиригә әмәл қилиши вә аммиви сорунларда маска тақиши давамлиқ тәләп қилинидикән.

Қирғизистанда корона вирус юқуми башланғандин буян вирус билән йүқумғанларниң сани 2000 ға йәткән. юқумланғанлар ичидә 365 нәпәр дохтур вә саһийә хадими бар икән. Бу җәрянда 20 киши корона вируси сәвәбидин қаза тапқан.

Пикирләр (0)
Share
Толуқ бәт