Қазақистандики бир уйғур ана көп балилиқ аилиләргә өй һәдийә қилди

Ихтиярий мухбиримиз ойған
2019-08-01
Елхәт
Пикир
Share
Принт

1-Авғуст күни алмута вилайитиниң талғир наһийәсигә қарашлиқ гүлдала йезисида көп балилиқ аилиләргә һәдийә қилинған өйләрниң ачқучини тапшуруш мурасими болуп өтти.

Қазақистан уйғурлириниң җумһурийәтлик етно-мәдәнийәт мәркизиниң башқарма әзаси, мәркәз йенидики «нураний анилар кеңиши» ниң рәиси гүлҗаһан муратова тәрипидин орунлаштурулған мәзкур мурасимға зиялийлар, җәмийәтлик бирләшмиләр, йәрлик һөкүмәт органлири һәмдә аммиви ахбарат васитилириниң вәкиллири, яшлар, йеза турғунлири болуп көп киши қатнашти.

Игилишимизчә, мәзкур мурасим гүлҗаһан муратова тәшкиллигән иҗтимаий лайиһә асасида уюштурулған болуп, бу лайиһә бойичә көп балилиқ, турмуш шараити төвән, баққучисидин айрилған аилиләрни турушлуқ өй билән тәминләш пиланланған икән.

Мурасим риясәтчиси бу күни пәқәт гүлдала йезисидила әмәс, бәлки пүткүл талғир наһийәси даирисидә чоң йеңилиқниң йүз бәргәнликини тәкитләп, мурасимни ечип беришкә гүлҗаһан муратовани тәклип қилди. Гүлҗаһан муратова бу мурасимниң қазақистандики милләтләр ара достлуқниң, бирликниң бир ярқин үлгиси икәнликини, йетим вә мәҗруһ балиларға, турмуши еғир аилиләргә мәниви вә маддий ярдәм көрситишниң һәр бир кишиниң инсанлиқ бурчи икәнликини оттуриға қойди.

Радийомиз зияритини қобул қилған бәш балиниң аниси зулфийә исраилова ханим мундақ деди: «мән йолдишим қайтиш болғандин кейин еғир әһвалға чүшүп қалдим. Шу чағда гүлҗаһан апа дәрру көчүп келиң деди. Мени балилириңни йетимләр өйигә өткүзүвәт дегән иди. Аллаға шүкри, мушу гүлҗаһан аниниң өйигә кәлгәндин бери әһвалим яхши туруватиду.»

Мурасимда сөзгә чиққан талғир наһийәлик ички сиясәт бөлүминиң башлиқи толқун саметова, гүлдала йеза башлиқиниң орунбасари меруерт әзилқияшова, қазақистан уйғурлириниң җумһурийәтлик етно-мәдәнийәт мәркизи рәисиниң орунбасари ершат әсмәтоф вә башқилар мәзкур иҗтимаий лайиһә асасида уюштурулған бу мурасимни юқири баһалап, лайиһә асасида ярдәмгә еришкән аилиләр ичидә һәр милләт вәкиллириниң бар икәнликини алаһидә тәкитлиди. Мурасимда гүлҗаһан муратоваға талғир наһийәлик вә гүлдала йезилиқ һакимийәтләр намидин пәхрий ярлиқлар тапшурулди.

Зияритимизни қобул қилған йәнә бир көп балилиқ ана татяна хулхачинова өзиниң бәш йил мабәйнидә өйләрдә иҗаридә туруп, маддий җәһәттин интайин қийналғанлиқини, шу чағда гүлҗаһан аниға йолуққанлиқини билдүрүп, мундақ деди: «мән башта гуманланған идим, сәвәби мундақ адәмләрни учритиш адәмниң әқлигә кирмәтти. Мән гүлдала йезисиға келип, өзүмниң бу ишидин пушайман қилмидим. Биз бу йәргә кәлгәндә гүлҗаһан ана иҗтимаий лайиһә бойичә өй салди. Биз бүгүн әнә шу өйниң ачқучини тапшуруп еливатимиз. Бу биз үчүн чоң бәхт. Гүлҗаһан һәдә интайин яхши киши. Мундақ адәмләр аз болсиму, лекин бар икәнликигә биз хушал. Биз әмди өйимиз йоқ дәп әнсиримәй, балилиримизни хатирҗәм тәрбийәләймиз, дәп ойлаймән.»

«Нураний анилар кеңиши» ниң рәиси гүлҗаһан муратова ханим зияритимизни қобул қилип, мундақ деди: «мән кичик вақтимда қийинчилиқни көп тарттим. Шу вақитта арминим бар иди. Чоң болсам, балиларға қараймән дегән. Шуниң үчүн мушу ишларни қолумға алдим. Оттуз йил болди. Кейин һамийлар пәйда болди. Шулар вә хәлқ нурғун ярдәм қилди. Икки йил болди, саламәтликим начар болғанлиқи үчүн кәнҗи баламни мушу ишқа тәйярлаватимән.»

Гүлҗаһан муратова һамийларниң ярдими билән йәниму көп мушундақ аилиләрни өй билән тәминләш, йетим-йесирларға ярдәм қилиш ишлирини йәниму давамлаштуруш ойиниң барлиқини илгири сүрди.

Мәлум болушичә, гүлҗаһан муратова йеқинда алмута вилайитиниң уйғур наһийәсидә 150 аилини, яркәнд тәвәсидә 180 аилини озуқ-түлүк билән тәминлигән. Буниңдин ташқири у башқиму хәйрхаһлиқ ишлирини йүргүзүп, юрт-җамаәтчилик ичидә чоң һөрмәткә еришмәктә.

Пикирләр (0)
Share
Толуқ бәт