Qazaqistan Uyghur tiyatiri türkiyede Uyghur muqam sen'itini tonushturmaqta

Ixtiyariy muxbirimiz erkin tarim
2019-06-26
Élxet
Pikir
Share
Print

Qazaqistan jumhuriyetlik Uyghur tiyatiri "Muqamchilar" namliq muzikiliq tiyatirni türkiyening herqaysi sheherliride körsetmekte.

Uyghur tiyatiri "Muqamchilar" namliq muzikiliq tiyatirni 6-ayning 23-24-künliri izmirda, 25-küni axsham bursa shehiride körsetti. Bügün, yeni 26-iyun küni istanbuldiki bayrampasha rayonluq hökümetning zalida tamashibinlargha körsetti. Mezkur tiyatir 27-iyun küni chüshtin kéyin sa'et 3 te istanbul baghlarbéshi kültür merkizide, kech sa'et 8de istanbuldiki maltepe uniwérsitétida körsitilidiken. Biz bu heqte tepsiliy melumat igilesh üchün aldi bilen qazaqistan jumhuriyetlik Uyghur tiyatir we "Muqamchilar" namliq muzikiliq tiyatirning ussul rézhissori, dangliq ussulchi gulbahrem turdiyewa xanim bilen téléfon söhbiti élip barduq.

U, bu qétim türkiyede oyun qoyushning meqsiti toghrisida toxtilip mundaq dédi: "Bu qétim biz sehnige élip chiqqan rak muqamini Uyghur tiyatirining bedi'iy rehbiri dangliq naxshichi murat axmedi sehnileshtürgen. Biz rak muqami toluq ijra qilin'ghan 'muqamchi' namliq muzikiliq tiyatirni izmir, bursa qatarliq sheherlerde körsettuq. Bu ikki chong sheherde Uyghurlardin köprek türk tamashibinlar körüp heyran qélishti. Ular güldüras alqishlarni yangratti. Elwette 12 muqamning her biri bashqa bir dunya. Pütün Uyghur xelqining béshidin ötküzgen derd-elemliri, arzu-armanliri öz ipadisini tapqan muqamlirimiz peqet Uyghurlarningla emes barliq türkiy xelqler qiziqip köridighan nadir bir eser. Biz bu qétim rak muqamini élip kelduq. Bizning meqsitimiz bundin kéyin bashqa muqamlarnimu ayrim-ayrim sehnileshtürüp dunyagha tonutush. Mana bügün tiyatirimizni istanbuldiki körürmenlerning huzurigha sunimiz".

Arqidin "Muqamchilar" namliq muzikiliq tiyatirni yazghan, tonulghan yazghuchi exmetjan hashiri ependi téléfon ziyaritimizni qobul qilip, "Muqamchilar" namliq muzikiliq tiyatirda se'idiye xanliqi mezgilide ötken tonulghan muzikishunas amannisaxanning hayati we sultan abduréshit xanning Uyghur muqamlirini retleshke bergen ehmiyitining bayan qilin'ghanliqini éytti.

Uyghur tiyatirining 1 perde 3 körünüshlük "Muqamchilar" namliq muzikiliq tiyatiri 24-iyun küni aqsham türkiyening üchinchi chong shehiri hésablinidighan izmir shehiride tamashibinlar bilen yüz körüshken. Izmirdiki ege uniwérsitéti türk dunyasi tetqiqat instituti proféssori doktor alimjan inayet ependi "Muqamchi" namliq tiyatir esirini körgenlikini, körürmenlerning shundaqla özining bekla tesirlen'genlikini bayan qildi.

"Muqamchilar" namliq muzikiliq tiyatir 25-iyun küni axsham türkiyening tötinchi chong shehiri hésablinidighan bursa shehiride tamashibinlar bilen yüz körüshken. Buninggha bursa shehiridiki Uyghur we türklerdin bolup köp sanda kishi ishtirak qilghan. Bursadiki uludagh uniwérsitéti Uyghur oqughuchilirining wekili abduqadir abdulkérim ependi mezkur tiyatirni körüp bek tesirlen'genlikini we bundaq bir medeniyetke ige milletning perzenti bolush süpiti bilen pexirlen'genlikini bayan qildi.

Qazaqistan jumhuriyetlik Uyghur tiyatiri 1934-yili qurulghan bolup, 85 yildin béri dunyaning nurghun jaylirida oyun qoyghan. 2018-Yili 12-ayning axirida dangliq Uyghur kompozitori quddus ghojamyarof tewellutining 100 yilliqini xatirilesh munasiwiti bilen türkiyening enqere, istanbul we adana sheherliride oyun qoyghanidi.

Toluq bet