4 Кишилик уйғур һәйити қатарни зиярәт қилип муһим учришишлар елип барди

Ихтиярий мухбиримиз арслан
2019-03-25
Елхәт
Пикир
Share
Принт
Бир қисим уйғур тәшкилатларниң мәсуллиридин тәркиб тапқан 4 кишилик уйғур һәйити қатарда зиярәттә. 2019-Йили 17-март.
Бир қисим уйғур тәшкилатларниң мәсуллиридин тәркиб тапқан 4 кишилик уйғур һәйити қатарда зиярәттә. 2019-Йили 17-март.
RFA/Arslan

17-Март күни бир қисим уйғур тәшкилатларниң мәсуллиридин тәркиб тапқан 4 кишилик уйғур һәйити қатарни зиярәт қилип, «дуня мусулман алимлар бирлики», «әлҗәзирә» телевизийәсиниң баш шитаби қатарлиқ орунларда муһим учришишларда болди.

Мәркизи истанбулға җайлашқан шәрқий түркистан тәшкилатлар бирлики шундақла маарип вә һәмкарлиқ җәмийитиниң рәиси һидайәтулла оғузхан, сутуқ буғрахан илим вә мәдәнийәт вәхпиниң рәиси доктор абдулхалиқ уйғур, шәрқий түркистан өлималар бирлики мәсуллиридин һәбибулла күсәни вә мәхмутҗан дамоллам қатарлиқ кишиләрдин тәркиб тапқан бу 4 кишилик һәйәт алди билән мәркизи қатарниң дуһа шәһиригә җайлашқан «дуня мусулман алимлар бирлики» ни зиярәт қилип, мәзкур бирликниң баш катипи доктор алий қаридағи билән учришип, уйғур мәсилисини аңлатқан. Андин улар йәнә «әл-җәзирә» телевизийәсиниң мәркизини зиярәт қилған.

Һидайәтулла оғузханниң билдүрүшичә, улар «дуня мусулман алимлар бирлики», «әл-җәзирә» телевизийәсиниң мәркизи қатарлиқ орунларда муһим учришишлар елип барғандин кейин, «әл-җәзирә» телевизийәсиниң тармиқи болған «әлҗәзирә тәтқиқат мәркизи» дә бир йиғин уюштурулуп, уйғур мәсилиси һәққидә мәлумат бәргән. Бу йиғинға «әл-җәзирә» телевизийә қанилиниң бир қисим мәсуллири, журналистлар, тәтқиқатчилар вә академиклар қатнашқан. Йиғинда уйғур мәсилисиниң һазирқи әһвали вә чиқиш йоллири тоғрисида музакирә елип берилған.

Һидайәтулла оғузханниң билдүрүшичә, һәйәт йәнә қатардики «әрәб тәтқиқатлири мәркизи» дә зиярәттә болуп, уйғур мәсилиси тоғрисида пикир алмаштурған вә уйғурлар тоғрисида тәйярланған доклатини сунған. Униңдин башқа йәнә қатар университетини зиярәт қилип, «виҗдан вә мәдәнийәт мәркизи» дә яшлар билән учришиш елип барған.

21-Март күни кечә саәт 12:30 да «әл-җәзирә» ниң нәқ мәйдандин тарқитиш қанилида мәхсус уйғурлар тоғрисида программа уюштурулған болуп, бу программиға һәбибулла күсәни вә мәхмутҗан дамоллам тәклип билән қатнишип, риясәтчиниң уйғурлар мәсилиси тоғрисидики соаллириға тәпсилий җаваб бәрди. 40 Минут давам қилған программида уйғурларниң һазир әһвали, хитайниң җаза лагерлири вә лагерларға қамалған уйғурлар дуч келиватқан қийин-қистақлар тоғрисида сөһбәт өткүзүлгән. Программа ахирида һәбибулла күсәни әрәб-ислам дунясиға хитаб қилип, әрәбләрни уйғур мәсилисигә көңүл бөлүшкә, қоллашқа чақриқ қилған.

Һидайәтулла оғузхан бу зиярәтниң мәқсити тоғрисида тохтилип, әрәб-ислам дунясиға шәрқий түркистан мәсилисини аңлитиш вә ислам дунясиниң қоллишини қолға кәлтүрүш үчүн қатарда бир йүрүш паалийәтләр елип барғанлиқини тилға алди.

Шәрқий түркистан өлималар бирликиниң мәсуллиридин һәбибулла күсәни бу қетимқи зиярәт тоғрисида тохтилип, 4 кишилик уйғур һәйәтниң қатарда мәхсус уйғур мәсилиси бойичә бир қатар паалийәтләрдә вә учришишларда болғанлиқи вә мәлум тәсир пәйда қилғанлиқини тәкитләп өтти.

У йәнә қатардики учришишларда бир қисим әрәб журналистлири, тәтқиқатчилири вә һәр саһә кишилириниң бундин кейин уйғур мәсилисигә көңүл бөлидиғанлиқи һәққидә вәдә бәргәнликини билдүрди.

Шәрқий түркистан өлималар бирликиниң мәсуллиридин мәхмутҗан дамолламму зияритимизни қобул қилип, бу қетимқи қатар зиярәти һәққидә бәзи толуқлимиларни тәқдим қилди.

Дуня мусулман алимлар бирликиниң 5-нөвәтлик йиғини 14-вә 15-март күнлири истанбулда ечилған болуп, йиғинда пүтүн дунядики еғир қийинчилиқларға дуч келиватқан мусулманларниң мәсилилири музакирә қилған иди. Йиғин ахирида дунядики еғир әһвалда қалған мусулманларға алақидар 12 маддилиқ қарар елинған болуп, қарарниң 5-маддиси мәхсус уйғурларға беғишланған иди.

Бу қарарниң уйғурларға алақидар 5-маддисида хитайға чақириқ қилип мундақ дейилгән: «дуня мусулман алимлар бирлики хитай һакимийитидин хитайдики вә шәрқи түркистандики мусулманларниң илаһи шәриәт вә хәлқара қанун кепил болған динға етиқад қилиш, йөткилиш вә пикир әркинликидин ибарәт барлиқ инсаний һоқуқлирини қайтуруп беришни, мусулманларни қийнаш, зулум қилиш вә уларни лагерларға солап һәр түрлүк қийин-қистақларға елишни дәрһал тохтитишни тәләп қилиду.»

Пикирләр (0)
Share
Толуқ бәт