Qaba nahiyeside tutqun qilin'ghan oqughuchilar yétekchiliridin ikki nepirining kimliki aydinglashti

Muxbirimiz shöhret hoshur
2019-01-07
Élxet
Pikir
Share
Print
Mori nahiyeside tarqitilghan "Halal" liq belgilirini men'i qilish uqturushi. 2017-Yili noyabir.
Mori nahiyeside tarqitilghan "Halal" liq belgilirini men'i qilish uqturushi. 2017-Yili noyabir.
Social Media

Ötken ayda altayning qaba we burchin nahiyeliride bir türküm qazaq ottura mektep oqughuchilirining tamaqlirida halal-haramni sürüshte qilip naraziliq bildürgenliki üchün tutqun qilin'ghanliqi, tutulghanlar arisida burchin nahiyesining bir yézisigha tewe oqughuchilardin 20 nechchisi barliqi ashkarilan'ghan idi. Muxbirimizning bu heqtiki ilgirilep ehwal éniqlishi dawamida naraziliq bildürüshke yétekchilik qilghanlardin birining jaylima yézisigha nopusluq oralqan isimlik oqughuchi ikenliki, yene birining bolsa sarbulaq yézisigha nopusluq qanat isimlik oqughuchi ikenliki aydinglashti.

Altayning qaba we burchin nahiyeliride bir türküm qazaq ottura mektep oqughuchilirining tutqun qilin'ghanliqi heqqidiki xewirimiz élan qilin'ghandin kéyin, ehwaldin xewerdar kishilerdin biri ötken hepte yene radiyomizgha inkas yollap, tutqunlar üstidin bir qisim mekteplerde ichki jehettin uqturush tarqitilghanliqini melum qildi. Inkasta déyilishiche, mezkur uqturushta bezi mekteplerdiki bir qisim oqughuchilarning mektepning tamaq we yataq tüzümige xilapliq qilghanliqi bildürülgen. Besh neper oqughuchining ismi tilgha élinip tenqid qilin'ghan we bashqa oqughuchilardin bu weqedin ibret élishqa dewet qilin'ghan.

Radiyomizgha élxet arqiliq kelgen bu inkasta bu 5 yétekchi oqughuchining kimliki bayan qilinmighan. Bu uqturushning herqaysi saqchixanilarghimu tarqitilghanliqi eskertilgen. Biz bu besh oqughuchining kimliki we barliq tutqunlarning aqiwiti heqqide melumat élish üchün altaydiki alaqidar orunlargha qaytidin téléfon qilduq. Qaba bazarliq saqchi xadimining bayan qilishiche, üstidin uqturush élan qilin'ghan we tenqidlen'gen 5 oqughuchidin biri oralqan bolup, u qaba nahiyesining jaylima yézisigha nopusluq bir oqughuchi iken.

Emma bu xadim oralqanning néme üchün tutulghanliqi, weqede qandaq rol alghanliqi we nöwette qeyerde tutup turuluwatqanliqi heqqidiki so'allirimizgha jawab bérelmidi. Ilgiriki igileshlirimizdin melum bolushiche, yéqinqi ikki yil ichide tutulghanlar sirtta xizmet ishlewatqan we yaki oquwatqan bolsimu, soraq mezgilide özining esli nopusi turushluq saqchixanilarning bashqurushidiki qamaqxanilarda tutup turuluwatqanliqi melum bolghan idi. Qaba bazarliq saqchixana xadimimu oralqanning nahiye baziridin 5 kilométirche uzaqliqtiki jaylima yézisidiki bir qamaqxanida bolush éhtimalliqini ilgiri sürdi.

Radiyomizgha kelgen inkasta déyilishiche, ichki uqturushta tenqidlen'gen bu besh neper yétekchi oqughuchi asasliqi mektep rehberlikige mektep réstoranidiki tamaq terkibi doskisini eslige keltürüsh, oqughuchilarning choshqa göshini perqlendürüshige imkan yaritip bérishni telep qilip xet yazghan. Bezi oqughuchilarni mektep réstoranidin emes, yataqlirida tamaq yéyishke teshkilligen yaki bashlamchiliq qilghan. Biz sarbulaq yéziliq saqchixana xadimidin tenqidlen'gen 5 oqughuchidin sarbulaqqa tewe oqughuchining kim ikenlikini sorighinimizda, bu xadim uning qanat isimlik oqughuchi ikenlikini ashkarilidi. Emma u qanatning nöwette qeyerde tutup turuluwatqanliqi heqqide melumat bermidi. Biz uningdin qanatning yaki a'ilisining téléfon nomurini sorighinimizda u qanatning nahiye derijilik dölet bixeterlik tarmaqlirining qamaqxanisida tutup turuluwatqanliq éhtimalliqini isharetlidi.

Biz bu xadimdin sarbulaq yézisidin choshqa göshi weqesige chétishliq qanattin bashqa yene kimlerning barliqini sorighinimizda u sarbulaq yéziliq hökümettiki bir dölet xizmetchisiningmu barliqini ashkarilidi. Emma u bu xadimning bu oqughuchilar délosigha qandaqlarche chétilip qalghanliqi heqqide melumat bérelmidi. U bu xadimning isim-familisi heqqidimu melumat bermidi.

Altayning qaba we burchin nahiyeliride bir türküm qazaq ottura mektep oqughuchilirining tutqun qilin'ghanliqi heqqidiki ötken ayda ijtima'iy taratqularda chiqqan xewerlerde oqughuchilarning choshqa göshi yéyishke mejburlinishqa qarita naraziliq bildürüp namayish qilghanliqi we namayishqa qatnashqanlardin az dégende 4 che oqughuchining tutqun qilin'ghanliqi bayan qilin'ghan idi. Hazirghiche éniqlashlirimiz dawamida mezkur tutqun qilinishning choshqa göshi weqesi bilen alaqisi barliqi aydinglashqan bolsimu, emma namayishning bolghan yaki bolmighanliqi we yaki nede bolghanliqi téxi delillenmigen idi. Saqchi xadimlirimu namayishning yüz bergenlikini keskin bir shekilde inkarmu qilmighan idi. Ene shu weqening yétekchiliridin bolghan oqughuchi oralqan bilen qanatning qaba nahiyelik 1‏-ottura mektep we 2‏-ottura mektep oqughuchiliri ikenliki melum, emma ularning qanchinchi yilliqning oqughuchiliri ikenliki téxiche ayding emes.

Toluq bet