Д у қ рәһбәрлири әнглийә парламентида уйғур дияридики орган әткәсчиликидин гуваһлиқ бәрди

Ихтиярий мухбиримиз әкрәм
2017-12-14
Елхәт
Пикир
Share
Принт
Д у қ рәиси долқун әйса әпәнди әнглийә парламентида чақирилған «хитайдики ички әза әткәсчилики һәққидә гуваһлиқ бериш» йиғинида доклат бәр бәрмәктә. 2017-Йили 13-декабир.
Д у қ рәиси долқун әйса әпәнди әнглийә парламентида чақирилған «хитайдики ички әза әткәсчилики һәққидә гуваһлиқ бериш» йиғинида доклат бәр бәрмәктә. 2017-Йили 13-декабир.
RFA/Ekrem

Дуня уйғур қурултийиниң рәһбәрлири әнглийә парламентида өткүзүлгән «хитайдики ички әза, йәни орган әткәсчилики» һәққидә гуваһлиқ бериш йиғиниға қатнашти.

Мәзкур гуваһлиқ бериш йиғини 13-декабир күни әнглийә парламентида өткүзүлди. Дуня уйғур қурултийиниң рәиси долқун әйса әпәнди билән д у қ екологийә комитетиниң мудири әнвәр тохти уйғурларға вакалитән бу йиғинға қатнашти вә айрим-айрим гуваһлиқ бәрди.

Д у қ рәһбәрлириниң бүгүн лондондин бәргән мәлуматиға асасланғанда, мәзкур гуваһлиқ бериш йиғинда нуқтилиқ һалда хитайдики, болупму уйғур дияридики ички орган тиҗарити вә шуниңға даир мәсилиләр муһакимә қилинған икән.

Долқун әйса әпәндиниң билдүрүшичә, мәзкур йиғинни әнглийә парламент әзалири уюштурған вә риясәтчилик қилған. Көплигән дөләтләрдин кәлгән сәһийә саһәсидики мутәхәссисләр билән кишилик һоқуқ саһәсидики паалийәтчиләр хитайдики орган тиҗарити мәсилиси бойичә доклат бәргән. Алаһидә тәклип қилинған гуваһчилар нәқ мәйданда гуваһлиқ бәргән.

«Хәлқара христиан һәмкарлиқ тәшкилати» ниң рәиси, әнглийә консерватиплар партийәси кишилик һоқуқ комитетиниң рәиси беннидект рогерт әпәнди, хитайдики орган тиҗарити һәққидә көпләп тәтқиқат елип барған вә китаблар нәшр қилған етин гутман әпәнди, «орган тиҗаритигә қарши һәрикәт тәшкилати» ниң рәиси бекир җеймис ханим, кишилик һоқуқ паалийәтчиси вә филим режиссори анди моде әпәнди, тәйвән орган тиҗаритигә қарши тәтқиқат мәркизиниң мәсули алекис чең, доктор аднан шәрф әпәнди, уйғур мутәхәссисләрдин әнвәр тохти вә д у қ ниң рәиси долқун әйсадин ибарәт 9 киши бу қетимқи йиғинда гуваһлиқ нутқи сөзлигән.

Мутәхәссисләр бу йиғинда хитайдики орган әткәсчиликиниң адәттики бир тиҗарәт кәби тәрәққий қиливатқанлиқини, техиму көп мәһбусларниң ички әзалириниң мәҗбури елинип, сетиливатқанлиқини илгири сүргән.

Долқун әйса әпәнди нутқида уйғур мәһбуслириниң һәмдә из-дерәксиз ғайиб болған уйғурларниң ички әзалириниң сетилиш мәсилиси вә бу һәқтики гуманлирини оттуриға қойған. У сөзидә йәнә хитайниң д н а әвришкисини йиғишиниң маһийәттә орган тиҗарити үчүн хизмәт қилиши мүмкинликиниму тәкитлигән.

Д у қ екологийә комитетиниң мудири әнвәр тохти әпәндиму йиғинда сөз қилип, хитайдики, болупму уйғур дияридики орган тиҗарити мәсилиси үстидә өз тәҗрибилирини, көргән-билгәнлирини оттуриға қойған. У сөзидә һеч бир уйғурниң мәйли һаят чеғида болсун яки өлгәндин кейин болсун, өзиниң ички әзасини халап тәқдим қилмайдиғанлиқини, буниң уйғурларниң миллий һәм диний өрп-адәтлиригә хилап икәнликини, әмәлийәттә хитай тиҗарәт қиливатқан ички әзаларниң көп қисминиң шәрқий түркистандики сиясий мәһбуслар, из-дерәксиз ғайиб болғанлар вә адәм әткәсчилири алдап кәткән уйғурларниң ички органлири икәнликини илгири сүргән.

Долқун әйса әпәнди нутуқиниң ахирида әнглийә һөкүмитини шундақла пүтүн дуня җамаәтчиликини уйғур дияридики орган тиҗарити мәсилисигә җиддий қарашқа, буниң алдини елишниң тәдбирлирини тепип чиқишқа чақирған.

Пикирләр (0)
Share
Толуқ бәт