Помпейо: хитайниң күлкилик тәшвиқати һечкимни алдиялмайду

Мухбиримиз җүмә
2020-06-07
Елхәт
Пикир
Share
Принт
Америка ташқи ишлар министири майк помпейо «2019-йиллиқ кишилик һоқуқ доклати» ниң елан қилиниш мунасивити билән сөз қилди. 2020-Йили 11-март, вашингтон.
Америка ташқи ишлар министири майк помпейо «2019-йиллиқ кишилик һоқуқ доклати» ниң елан қилиниш мунасивити билән сөз қилди. 2020-Йили 11-март, вашингтон.
Photo: RFA

Хитайниң җорҗ флойдниң өлүмини суйиистемал қилип америкаға қариши башлиған тәтүр тәшвиқати давам қиливатқан пәйтләрдә, америка ташқи ишлар министири хитайниң тәшвиқатлирини «күлкилик», дәп атиди вә униң «һечкимни алдиялмайдиғанлиқи» ни ейтти.

Америка ташқи ишлар министири майк помпейо шәнбә күни елан қилған баянатида мундақ деди: «хитай коммунист партийәсиниң җор флойдниң трагедийәлик өлүмини қара нийәтлик билән суйиистемал қилиш арқилиқ өзиниң негизлик инсаний қәдр қиммәтни мустәбитләрчә рәт қилиш қилмишини ақлашқа урунуши, униң һәқиқий маһийитини йәнә бир қетим ашкарилиди. Партийәниң һоқуқ һәвиси үчүн хизмәт қилидиғанла болса, мустәбит һакимийәтләр үчүн һәр қандақ ялғанчилиқ чекидин ашқан пәскәш һесабланмайду. Бу тарихтин буян шундақ болуп кәлди. Бу күлкилик тәшвиқат һечкимни алдиялмайду.»

25-Май миннесота штатиниң миннеаполис шәһиридә 20 доллар сахта пулини ишләткәнлики сәвәблик қолға елинған җорҗ фолйд сақчи тутқуни җәрянида һаятидин айрилған. Бу һадисә, америкада сақчи зораванлиқи вә ирқий айримичилиққа қариши кәң көләмлик намайишлар партлишиға сәвәб болған.

Намайишниң зор көп қисми тинчлиқ шәкилдә давам қилған болсиму, бәзи намайишларда дукан-сарайларни булаш, шәхсий мүлүкләрни уруп чеқишқа охшаш җинайи қилмишларниң садир болғанлиқи хәвәр қилинған иди.

Америкада партлиған наразилиқ намайишлирини хитай америкаға қариши тәтүр тәшвиқат һуҗуми сүпитидә пайдиланған. Хитай дипломатлиридин хитай ахбаратлириғичә һәммә йәрдә америкаға қариши тәшвиқат күчәйгән.

Хитай тәшвиқатлирида американи «азсанлиқлар һоқуқи һөрмәт қилинмайдиған», «ирқий кәмситиш сақаймас кесәлгә айланған» дөләт, дәп көрситишкә тиришқан.

Помпейо хитай билән американиң намайишчиларға тутидиған муамилисидики негизлик пәрқләрни шәрһләп мундақ деди: «хоңкоңдин тйәнәнмен мәйданиғичә, хитайда тинч йосундики намайишчилар һәқиқәт үчүн оттуриға чиққанлиқи үчүнла қораллиқ хәлқ әскәрлириниң таяқ-тоқмақлириға бесилиду. Бу шәрәпсизликләр һәққидә қәләм тәврәткән мухбирлар түрмиләргә узун йиллап ташлиниду. Америкада болса, федератсийә вә йәрлик сақчилар йолдин чиққан офитсерларни қануний җавабкарлиққа тартиду, булаңчилиқ вә зораванлиқларға тақабил туруш билән бирликтә тинч йосундики намайишларни қарши алиду. Әркин ахбаратимиз бу вәқәләрни толуқи билән хәвәр қилип пүтүн дуняға суниду.»

Америка ташқи ишлар министири помпейо шәнбә күни елан қилған язма баянатида хитайниң йеқинқи һәрикәтлири арқилиқ «һәқиқәтни мәнситмәслик, қанунни мәсхирә қилиш» қилмишлирини давамлаштуруватқанлиқини билдүрди.

У йәнә мундақ деди: «х к п ниң җорҗ флойдниң өлүмидин кейин америкада оттуриға чиққан һәрикәтләрни, өзиниң негизлик кишилик һоқуқ вә әркинликләрни рәт қилиш қилмишлири билән бирләштүрүвелиши уларни әсли маһийити бойичә сахтикар дәп тонушимизға йетип ашиду.»

Бәзи хәвәрләрдә, хитай ахбаратлириниң америкадики намайишларниң пәқәт қалаймиқанчилиқ түсини алған тәрәплиринила күчәп тәшвиқ қилғанлиқи, намайишниң тинчлиқ шәклидики асаслиқ қисимға өз ахбаратлиридин пәқәт орун бәрмигәнлики көрситилгән иди.

Пикирләр (0)
Share
Толуқ бәт