Nuriman xanim: "Zulumning qattiqliqidin qismetlirimiz bashqilargha riwayettek anglinidiken"

Muxbirimiz gülchéhre
2019-08-22
Élxet
Pikir
Share
Print
"Doha muhakime munbiri" ishligen "Uyghur musapirlar: men a'ilemni qayta körelemdim?" témisidiki widiyoluq filimida doktor aspirant nuriman abduréshit xanim we firqet jewdet ependi.
"Doha muhakime munbiri" ishligen "Uyghur musapirlar: men a'ilemni qayta körelemdim?" témisidiki widiyoluq filimida doktor aspirant nuriman abduréshit xanim we firqet jewdet ependi.
dohadebates.com

Yéqinda "Doha muhakime munbiri" ishligen "Uyghur musapirlar: men a'ilemni qayta körelemdim?" témisidiki widiyoluq ziyaret filimida a'ilisining iz-dérikini qilip taratqularda mexsus guwahliq bériwatqan birqanche Uyghurning pa'aliyetlirini tonushturulghan.

Mezkur filimda amérkadiki nuriman abduréshit xanim wetendiki ata-anisi we qérindashlirining ehwalidin xewersiz ikenlikini, firqet jewdetning apisi we bashqa uruq-tughqanlirining lagérlargha qamalghanliqi we xitay da'irilirining uning amérkada élip bériwatqan lagér mesilisini anglitish pa'aliyetlirini toxtitish üchün tutqundiki anisi we tughqanliri arqiliq bésim yürgüzüp kelgenliki bayan qilin'ghan.

Mezkur guwahliq filimi xitay atalmish "Qayta terbiye merkizi" dep atiwalghan lagérlar heqqide mexsus "Aq tashliq kitab" élan qilip özining Uyghurlar üstidin yürgüzüwatqan zulumlirini aqlap körsitishke mejbur boluwatqan bir mezgilde tarqaldi. Bu filim xitayning Uyghur diyaridiki siyasetlirini ashkarilaydighan yene bir ispat süpitide taratqularda belgilik inkas peyda qilmaqta.

Bu munasiwet bilen radiyomiz ziyaritini qobul qilghan doktor aspirant nuriman abduréshit özining a'ilisi bilen alaqisi üzülgendin kéyinki iztiraplirini we uni etraptikilerge anglitish jeryanida hés qilghanlirini ortaqlashti.

Nuriman xanim dadisi abduréshit toxtining pénsiyege chiqqan bir yéza kadiri ikenlikini, bu yil 54 yashta ikenlikini, apisi tajigülning téxi ellikkimu kirmigen a'ile ayali ikenlikini, ularning barliqini balilirini yaxshi terbiyeleshke béghishlighanliqini bildürdi. U yene iniliri emetjan abduréshit bilen memet'éli abduréshitning ikki yildin buyan iz-dérikining yoq ikenlikini, ularning ölük-tiriklikini bilmeydighanliqini eskertip ötti.

U özining doktorluq unwanigha érishish üchün bélini ching baghlap, qiyinchiliqlarni yéngi oqup kelgenlikini, a'ilisi duch kelgen derd-elemler destidin özining hazir kéchiliri uxliyalmas bolup qattiq rohi bésim ichide qalghanliqini bayan qildi.

Nuriman özige oxshash a'ilisidin xewer alalmaywatqan, derdini anglitishqimu amalsiz qéliwatqan Uyghurlarning köp ikenlikini, bügünki alaqe-uchur tereqqiy qilghan bir dewrde Uyghurlar uchrawatqan bu xil azabning normal insanlarning tesewwuridin halqip ketkenlikini, buni bashqilargha ishendürüshningmu teslikini bayan qildi.

Nuriman mundaq deydu: "Men her yerde shuni tekrar deymen, xitay lagérdikilerning 90 pirsentini qoyuwettuq deydu, undaq bolsa, qéni méning a'ilem, xitay ularni körsetsun, dégenlirining yalghan emeslikini ispatlisun!"

Lagérlargha qamalghan a'ile ezaliri we uruq-tughqanliri heqqide taratqulargha we kishilik hoquq orunlirigha guwahliq bérish ishi lagér mesilisini yorutushta hemde xitayning Uyghur diyarida yürgüzüwatqan basturush siyasetlirini ashkarilashta achquchluq uchur menbesi bolup kelmekte. Barghanche köp Uyghurlarning ispatliq guwahliqining otturigha chiqishi bilen lagérlargha qamalghanlar heqqidiki sanliq melumat ambiri zoriyip barmaqta. Bu xil guwahliqlar xitay hökümitining ikki yildin Uyghur diyarida qurghan lagérlirining kölimi we tesirining neqeder zor ikenlikini ispatlap turmaqta.

Toluq bet