Нуриман ханим: «зулумниң қаттиқлиқидин қисмәтлиримиз башқиларға ривайәттәк аңлинидикән»

Мухбиримиз гүлчеһрә
2019-08-22
Елхәт
Пикир
Share
Принт
«Доһа муһакимә мунбири» ишлигән «уйғур мусапирлар: мән аиләмни қайта көрәләмдим?» темисидики видийолуқ филимида доктор аспирант нуриман абдурешит ханим вә фирқәт җәвдәт әпәнди.
«Доһа муһакимә мунбири» ишлигән «уйғур мусапирлар: мән аиләмни қайта көрәләмдим?» темисидики видийолуқ филимида доктор аспирант нуриман абдурешит ханим вә фирқәт җәвдәт әпәнди.
dohadebates.com

Йеқинда «доһа муһакимә мунбири» ишлигән «уйғур мусапирлар: мән аиләмни қайта көрәләмдим?» темисидики видийолуқ зиярәт филимида аилисиниң из-дерикини қилип таратқуларда мәхсус гуваһлиқ бериватқан бирқанчә уйғурниң паалийәтлирини тонуштурулған.

Мәзкур филимда амеркадики нуриман абдурешит ханим вәтәндики ата-аниси вә қериндашлириниң әһвалидин хәвәрсиз икәнликини, фирқәт җәвдәтниң аписи вә башқа уруқ-туғқанлириниң лагерларға қамалғанлиқи вә хитай даирилириниң униң амеркада елип бериватқан лагер мәсилисини аңлитиш паалийәтлирини тохтитиш үчүн тутқундики аниси вә туғқанлири арқилиқ бесим йүргүзүп кәлгәнлики баян қилинған.

Мәзкур гуваһлиқ филими хитай аталмиш «қайта тәрбийә мәркизи» дәп ативалған лагерлар һәққидә мәхсус «ақ ташлиқ китаб» елан қилип өзиниң уйғурлар үстидин йүргүзүватқан зулумлирини ақлап көрситишкә мәҗбур болуватқан бир мәзгилдә тарқалди. Бу филим хитайниң уйғур дияридики сиясәтлирини ашкарилайдиған йәнә бир испат сүпитидә таратқуларда бәлгилик инкас пәйда қилмақта.

Бу мунасивәт билән радийомиз зияритини қобул қилған доктор аспирант нуриман абдурешит өзиниң аилиси билән алақиси үзүлгәндин кейинки изтираплирини вә уни әтраптикиләргә аңлитиш җәрянида һес қилғанлирини ортақлашти.

Нуриман ханим дадиси абдурешит тохтиниң пенсийәгә чиққан бир йеза кадири икәнликини, бу йил 54 яшта икәнликини, аписи таҗигүлниң техи әлликкиму кирмигән аилә аяли икәнликини, уларниң барлиқини балилирини яхши тәрбийәләшкә беғишлиғанлиқини билдүрди. У йәнә инилири әмәтҗан абдурешит билән мәмәтели абдурешитниң икки йилдин буян из-дерикиниң йоқ икәнликини, уларниң өлүк-тирикликини билмәйдиғанлиқини әскәртип өтти.

У өзиниң докторлуқ унваниға еришиш үчүн белини чиң бағлап, қийинчилиқларни йеңи оқуп кәлгәнликини, аилиси дуч кәлгән дәрд-әләмләр дәстидин өзиниң һазир кечилири ухлиялмас болуп қаттиқ роһи бесим ичидә қалғанлиқини баян қилди.

Нуриман өзигә охшаш аилисидин хәвәр алалмайватқан, дәрдини аңлитишқиму амалсиз қеливатқан уйғурларниң көп икәнликини, бүгүнки алақә-учур тәрәққий қилған бир дәврдә уйғурлар учраватқан бу хил азабниң нормал инсанларниң тәсәввуридин һалқип кәткәнликини, буни башқиларға ишәндүрүшниңму тәсликини баян қилди.

Нуриман мундақ дәйду: «мән һәр йәрдә шуни тәкрар дәймән, хитай лагердикиләрниң 90 пирсәнтини қоювәттуқ дәйду, ундақ болса, қени мениң аиләм, хитай уларни көрсәтсун, дегәнлириниң ялған әмәсликини испатлисун!»

Лагерларға қамалған аилә әзалири вә уруқ-туғқанлири һәққидә таратқуларға вә кишилик һоқуқ орунлириға гуваһлиқ бериш иши лагер мәсилисини йорутушта һәмдә хитайниң уйғур диярида йүргүзүватқан бастуруш сиясәтлирини ашкарилашта ачқучлуқ учур мәнбәси болуп кәлмәктә. Барғанчә көп уйғурларниң испатлиқ гуваһлиқиниң оттуриға чиқиши билән лагерларға қамалғанлар һәққидики санлиқ мәлумат амбири зорийип бармақта. Бу хил гуваһлиқлар хитай һөкүмитиниң икки йилдин уйғур диярида қурған лагерлириниң көлими вә тәсириниң нәқәдәр зор икәнликини испатлап турмақта.

Пикирләр (0)
Share
Толуқ бәт