"Uyghur edliye arxipi ambiri" : 72 yashliq shemshiqemer ana lagérda

Muxbirimiz méhriban
2019-09-03
Élxet
Pikir
Share
Print
"Uyghur edliye arxipi ambiri" 72 yashliq shemshiqemer anining ghuljidiki melum bir lagérda tutup turuluwatqanliqi heqqide tarqatqan guwahliq filimi. 2019-Yili 30-awghust.
"Uyghur edliye arxipi ambiri" 72 yashliq shemshiqemer anining ghuljidiki melum bir lagérda tutup turuluwatqanliqi heqqide tarqatqan guwahliq filimi. 2019-Yili 30-awghust.
Social Media

30-Awghust küni norwégiyediki "Uyghur edliye arxipi ambiri" 72 yashliq shemshiqemer anining ghuljidiki melum bir lagérda tutup turuluwatqanliqi heqqide guwahliq filimi tarqatti.

Filimda gérmaniyediki adile ghéni qatarliq üch acha-singil guwahliq bérip, ghulja shehirining qaradöng mehellisige jaylashqan bahar kochisi 28-qoruda olturushluq 72 yashliq momisi shemshiqemer xanimning 2018-yili 1-ayda lagérgha élip kétilgenliki we hazirgha qeder iz-dérikining bolmighanliqi körsitilgen. Ular öz guwahliqida xitay hökümitidin 70 yashtin halqighan momisini néme üchün lagérgha qamighanliqi heqqide chüshenche bérishini telep qilghan.

Norwégiye Uyghur komitétining re'isi bextiyar ömer ependining bildürüshiche, "Uyghur edliye arxipi ambiri" namliq mezkur organ 2017-yildin buyan norwégiye Uyghur komitéti teripidin ishlinip kéliwatqan "Namsiz Uyghur mehbuslirini tizimlash" xizmitini üzlüksiz dawamlashturup kéliwatqan iken. Uning tekitlishiche, mezkur organ 2019-yili 8-aygha qeder 5000 din artuq Uyghur tutqun heqqidiki uchurlarni toplap bolghan. Bu organ yene bu yil 8-ayning otturiliri amérikadiki démokratiyeni ilgiri sürüsh fondining iqtisadiy yardimige érishken iken. Shundin kéyin chet'ellerdiki yene bir türküm Uyghurlar bu organ'gha lagérdiki uruq-tughqanliri heqqide uchur teqdim qilghan. 72 Yashliq shemshiqemer anining lagérgha qamalghanliqi heqqidiki guwahliq filimi del ashu xil uchurlar asasida ishlen'gen ölchemlik qisqa guwahliq filimliridin biri iken.

Radiyomiz bextiyar ependi teminligen uchurlargha asasen xitay da'iriliri teripidin tutqun qilinip ghuljidiki melum bir lagérgha qamalghan shemshiqemer abliz xanim heqqide uchur igileshke tutush qildi. Shemshiqemer anining hazir gérmaniyede yashawatqan newre qizi adile ghéni bilen qizi patime xanimlar radiyomiz ziyaritini qobul qilip, özliri bilidighan ehwallarni anglatti.

Ularning bildürüshiche, bu yil 72 yashqa kirgen shemshiqemer ana a'ile ayali bolup, uning chet'ellerdiki perzentliri bilen bolghan eng axirqi téléfon alaqisi 2017-yil 4-aydin kéyin pütünley üzülüp qalghan. Kéyin ular qirghizistan we qazaqistandiki tonushliridin sürüshtürüsh arqiliq shemshiqemer anining 2017-yilning axiri we 2018-yilning bashlirida lagérgha élip kétilgenlikidin xewer tapqan.

Shemshiqemer anining qizi patime hajining bildürüshiche, öz öyide tikküchilik bilen shughullinidighan momisi shemshiqemer ana mijezi mulayim, sirttiki ijtima'iy pa'aliyetliri az bolghan bir a'ile ayali iken. Ularning ilgiri sürüshiche, shemshiqemer ana chet'eldiki perzentliri bilen 2017-yili 4-ayghiche normal téléfon alaqisi qilip turghan iken. Ular özlirining shemshiqemer ana bilen qilghan ilgiriki bu téléfon alaqisining belkim uning lagérgha qamilishigha seweb bolghan bolushi mumkinlikini perez qildi.

Ularning bildürüshiche ghuljaning qaridöng mehellisige qarashliq bahar kochisi 28-qoruda olturushluq shemshiqemer abliz xanim bu mehellige kélin bolup kirgen 50 yildin buyan qaridöng mehellisining töwinidiki töpichi mehellisi we patmichuq mehellisidiki Uyghurlar arisida tikküchilik hüniri bilen tonulghan iken.

Biz shemshiqemer abliz xanimning nöwettiki ehwalini yenimu ilgirilep éniqlash üchün ghulja nahiye qaridöng mehelle asasiy qatlam ahaliler komitéti we ghulja shehirining 2-rayon dep atilidighan jayidiki birqanche saqchixanigha téléfon qilduq. Emma qaridöng mehelle komitéti we saqchixanigha urghan téléfonlirimiz ulanmidi. Shemshiqemer xanim olturushluq bahar kochisi töpichi mehellisi ahaliler komitétigha urghan téléfonimiz ulan'ghan bolsimu, emma jawabsiz qaldi.

Yuqiriqi awaz ulinishidin tepsilatini anglighaysiler.

Toluq bet