Йәркәндики бир лагерниң мәхсус тәкшүргүчиләр үчүн тәйярланғанлиқи ашкариланди

Мухбиримиз шөһрәт һошур
2019-08-09
Елхәт
Пикир
Share
Принт

Түркийәдики йәркәнлик муһаҗирлардин бири гугил хәритиси бойичә тордин көзитиш елип берип, өз юрти йәркәндә аталмиш «тәрбийәләш мәркәзлири», қамақханилар вә дарилетамлар болуп җәмий 16 орунда лагер барлиқини байқиған вә бу һәқтә иҗтимаий таратқуларда қисқа бир мәлумат елан қилған иди. Мухбиримизниң бу учур үстидә елип барған ениқлашлири давамида йәкәндики 7 лагерниң җайлашқан орунлири айдиңлашти вә лагерлардин бириниң мәхсус тәкшүргүчиләр үчүн айрилғанлиқи мәлум болди.

Түркийәдики бир йәркәнлик муһаҗир гугил хәритиси бойичә тордин көзитиш елип берип, йәркәндики лагерларниң сани, орни вә көлими һәққидә мәлумат ениқлиған. Аталмиш «тәрбийәләш мәркизи» дин башқа, түрмә, қамақхана, дарилетам, қош тил мәктипи вә йәслиләрниму лагерлар қатарида һесаблиған бу муһаҗир йәркәндә 16 орунда лагер барлиқини илгири сүргән. У йәнә бу 16 лагерниң хәритидики рәсимлирини елан қилған. У һәр бир рәсимгә изаһат бәргәндә шу лагер җайлашқан орун вә униң әтрапи һәққидиму тәпсилий мәлумат бәргән.

Бу һәқтә йәркәнгә қарита елип барған телефон зиярәтлиримиз давамида йәркәндә сиясий-қанун саһәсидә хизмәт қиливатқан бир хадим өзи хизмәт җәрянида көргән вә аңлиғанлириға асасән йәркәндә аз дегәндә 7 орунда лагер барлиқини дәлиллиди. Униң дейишичә, йәркәндә әң дәсләпки лагер наһийәлик партийә мәктипидә қурулған икән. Униңдин кейин наһийәдики әслидики кәспий техника мәктипиму лагерға өзгәртилгән. Йәркәнлик муһаҗирниң тәкшүрүш хуласисидә йәркәнниң арасланбағ, чаһарбағ, томөстәң, йеңиөстәң, оданлиқ қатарлиқ көпинчә йеза базарлирида аз дегәндә бирдин лагер барлиқи илгири сүрүлгән. Йәркәндики мәзкур сиясий-қанун хадимиму йеза-базарларниң аз дегәндә бәшидә йиғивелиш лагери барлиқини ашкарилиди. Йәркәнлик муһаҗирниң доклатида йәркәндики әң чоң лагерниң наһийә ичидин 10 километир узақлиқтики қарақум санаәт районида икәнлики, бу лагерниң янму-ян селинған 4 қамақханиниму өз ичигә алидиғанлиқи, бу лагерда 1700 камер, 12 көзитиш мунари барлиқи вә тәхминән 50 миңчә кишиниң соланғанлиқи қәйт қилинған.

Илгири зияритимизни қобул қилған явропадики йәркәнлик муһаҗир, сабиқ карханичи нурмәмәт абдулла өзиниң 2009‏-йили күздә дәл мушу қарақумдики җаза лагерида 6 ай ятқанлиқини тилға алған иди. У йәркәндә аталмиш «тәрбийәләш мәркәзлири» ниң шу чағлардин башлапла синақ тәриқисидә йолға қоюлғанлиқини илгири сүргән иди.

Йәркәндики сиясий қанун хадими хизмәт җәрянида көргән вә аңлиғанлириға асасән арсланбағдики лагерниң әң чоң лагер икәнликини тилға алди. Әмма у бу лагердики кишиләрниң сани һәққидә тәхминән болсиму мәлумат берәлмиди.

Илгири қәшқәрдики лагерлар һәққидә мәлумат бәргән түркийәдики бир муһаҗир қәшқәр дөләтбағдики 4-оттура мәктәпкә қурулған лагерниң мәхсус чәтәлдин кәлгән тәкшүргүчиләр үчүн айрилғанлиқи вә ясалғанлиқи, бу лагерға мәхсус аталмиш «хаталиқ өткүзгән дөләт хизмәтчилири» ниң соланғанлиқини мәлум қилған. У йәнә мундақ тәкшүргүчиләргә айрилған лагерниң һәр бир наһийә-шәһәрдә аз дегәндә бирдин мәвҗут икәнликини илгири сүргән иди.

Йәркәндики сиясий-қанун хадимиму йәркәндики бу 7 лагеридин бириниң мәхсус чәтәлдин кәлгән тәкшүргүчиләр үчүн тәйярланғанлиқини дәлиллиди. У йәркәндә әслидики кәспий техника мәктипиниң йеқинда көргәзмилик үчүн қайтидин ясалғанлиқини баян қилди.

Б б с ниң лагерлар һәққидики хәвиридә қәшқәр 4-оттура мәктәп лагерида ишсиз дәп тонуштурулған тутқунлар ичидә вилайәтлик мәдәнийәт ядикарлиқлири идарисиниң хадими әкбәр әбәйдулланиңму барлиқи дәлилләнгән иди.

Пикирләр (0)
Share
Толуқ бәт