64 яшлиқ мәһди өмәр ғайиб болған аилә әзалири һәққидә дуняға нида қилмақта

Ихтиярий мухбиримиз арслан
2020-05-20
Елхәт
Пикир
Share
Принт
Истанбулда яшаватқан 64 яшлиқ мәһди өмәр әпәнди уруқ-туғқанлири тоғрилиқ гуваһлиқ бәрмәктә. 2020-Йили май.
Истанбулда яшаватқан 64 яшлиқ мәһди өмәр әпәнди уруқ-туғқанлири тоғрилиқ гуваһлиқ бәрмәктә. 2020-Йили май.
RFA/Arslan

Түркийәдә яшаватқан миңларчә уйғур 2017-йилидин буян вәтинидә қәп қалған аилиси вә уруқ-туғқанлиридин хәвәр алалмиғанлиқтин иҗтимаий таратқулар арқилиқ дуняға нида қилишқа мәҗбур болмақта. Улар «уруқ-туғқанлирим қәйәрдә?» дегәндәк түрлүк нида вә чоқанларни көтурүп, хитай даирилиригә соал қоймақта.

Истанбулда яшаватқан 64 яшлиқ мәһди өмәр әнә шундақ уйғурларниң бири. У 2016-йилидин буян өзиниң қәшқәр вилайити йеңисар наһийиси егизйәр йезисидики уруқ-туғқанлиридин хәвәр алалмиғанлиқи билдүрди. У хитай даирилиригә хитаб қилип: «мениң аиләмдикиләр, уруқ-туғқанлирим вә баллирим зади қәйәрдә?» дәп хитай даирилиригә соал қойди. У йәнә дуня җамаәтчиликини өзигә охшаш аилә паҗиәлиригә дуч келиватқан пүткүл уйғурларға көңүл бөлүшкә чақириқ қилди.

Мәһди өмәр әпәнди өзиниң 2016-йилидин буян 78 яшлиқ чоң акиси ғоҗи бавудун, 74 яштики кичики акиси аллабәрди, аяли туайимхан, қизлири атикәмхан, тохтигүл вә улуғхан, оғуллири исмаил вә садир шундақла икки күйоғли қатарлиқ пүткүл аилә әзалиридин һечқандақ хәвәр алалмиғанлиқини, уларниң йиғивелиш лагерларға соланғанлиқи яки йоқ қиливетилгәнликини билмәйдиғанлиқини, уларниң тәқдиридин қаттиқ әндишә қиливатқанлиқини билдүрди.

Мәһди өмәр әпәнди хитай даирилиригә хитаб қилип, уларниң инсанийәткә қарши пүткүл җинайәтлиридин һаман бир күни һесаб беридиғанлиқини тәкитлиди.

У мундақ деди: «1996-йили хитайниң бесими сәвәбидин юртумни ташлап башқа дөләткә чиқип кетишкә мәҗбур болдум. Дәсләптә қирғизистан вә қазақистанда тиҗарәт билән шуғулландим. Аиләм билән 2016-йилиғичә телефонда көрүшүп тураттим. 2016-Йили қизим билән телефонда сөзләштим, әмма қизим: ‹маңа буниңдин кейин телефон қилмаң' дәп өтүнди. Мәнму уларниң бесимға учриғанлиқини һес қилип, бир қанчә қетим телефон урған болсамму, әмма аилә әзалиримниң вә туғқанлиримниң телефонлири билән улишалмидим. Шуниңдин кейин алақә қилалмидим. Хитай һакимийити уруқ-туғқанлири чәтәлгә чиқип кәткән аилиләрниң ‹тәрбийәләш' елип кетилидиғанлиқини елан қилғандин кейин мән аилә әзалирим вә уруқ-туғқанлиримниң лагерда икәнликини тәхмин қилдим. Мән уларниң ақивитидин әндишә қиливатимән.»

У сөзиниң ахирида пүткүл дуня җамаитини уйғурларға көңүл бөлүшкә чақриқ қилип, мундақ деди: «һазир ялғуз мән әмәс, пүткүл шәрқий түркистан хәлқи наһайити паҗиәлик бир әһвалға дуч кәлди. Биз дуня тарихида болуп бақмиған қирғинчилиққа дуч кәлдуқ. Чәтәлгә чиқип кәткән уйғурлар уруқ-туғқанлири билән һәтта телефонда болсиму көрүшәлмәйватиду. Хитай нәччә милйон уйғур хәлқини түрмиләргә вә җаза лагерлириға ташлап қийнаватиду, биз һеч бир шәкилдә улар билән алақә қилалмаймиз. Мән пүткүл дуня хәлқини уйғурларға ярдәм қилишқа, хитайға бесим қилишқа чақириқ қилимән!»

Пикирләр (0)
Share
Толуқ бәт