Қирғизистан уйғурлири йеңи йилни сахавәтлик ишлар билән қутлиди

Ихтиярий мухбиримиз ферузә
2018-12-31
Елхәт
Пикир
Share
Принт
Тоқмақ шәһиридики анилар мейип балиларға йеңи йиллиқ паалийәт өткүзүп бәрди.
Тоқмақ шәһиридики анилар мейип балиларға йеңи йиллиқ паалийәт өткүзүп бәрди.
RFA/Feruze

Қирғизистан уйғурлириниң аммиви тәшкилати болған «иттипақ» җәмийитигә қарашлиқ аяллар комитети билән яшлар бөлүми 2019-йили кириш һарписида бир қатар сахавәтлик ишларни елип барди.

Һәр йилиниң 31-декабир ахшими қирғизистанлиқлар йеңи йил байримини қутлаш мурасимини өткүзиду. Йеңи йилни күтүвелиш мурасимини өткүзүш әнәниси сабиқ советлар иттипақи дәвридин тартип таки һазирғичә қирғизистан вә башқа оттура асия җумһурийәтлиридә давамлишип кәлмәктә. Қирғизистан мустәқил болғандин кейин бәзи диний гуруппилар йеңи йил байримини өткүзүшни рәт қилған болсиму, әмма қирғизистандики мутләқ көп қисим аһалиләр йәнила йеңи йилни қутлаш мурасимиға алаһидә көңүл бөлүп кәлмәктә.

Адәттә йеңи йилни күтүвелиш мурасими йәсли вә мәктәпләрдә мәхсус паалийәтләр билән өткүзүлиду. Йәни гөдәкләр үчүн түрлүк оюн вә номурлар тәйярлинип, уларға һекайә сөзләш, шеир оқуш вә башқа оюн түридики паалийәтләр өткүзүп берилиду. Һалбуки, саламәтлики начар яки мейип балилар мәктәпләрдики бу хил паалийәтләргә қатнишалмайду. Бу әһвални көздә тутқан тоқмақ шәһиридики «иттипақ» җәмийитиниң аяллар комитети турсунай абитованиң башлиқида мәхсус мейип балилар үчүн оюн-программиларни тәйярлап, уларға түрлүк оюнчуқлар вә шерин совғатларни тарқатти.

Радийомиз зияритини қобул қилған турсунай абитова ханим тоқмақ шәһиридики «иттипақ» җәмийитиниң аяллар комитети мейип балилар үчүн өткүзгән йеңи йиллиқ сахавәтлик ишлар һәққидә тохталди. У йәнә өзлириниң 5 йилдин буян мейип балиларға оқуш җәһәттә ярдәм көрситип келиватқанлиқини билдүрди. 

Турсунай хеним йәнә өзлириниң мейип балилар үчүн мәхсус бир мәктәп ечиш арзусиниң барлиқини тәкитләп өтти. 

Йеңи йилни қутлаш мурасими 28-декабир күни тоқмақ шәһиридики мәктәп-гимназийәсидә уюштурулди. Мәктәп оқуғучилири «қар бовай» вә «қар қиз» болуп ясинип, түрлүк оюн-тамашиларни елип беришти. Аяллар кеңишиниң әзаси зәйнурә тохтийева радийомиз зияритини қобул қилип, мейип балиларға ярдәм көрситишни өзлириниң бир бурчи дәп билидиғанлиқини, мейип яки қаранчуқсиз балилар бир күлүп хушал болувалса, өзлириниңму хушал болидиғанлиқини билдүрди.

Йеңи йил һарписидики сахавәтлик ишларни «иттипақ» җәмийитиниң яшлар бөлүмиму елип барди. Улар ришат аюпофниң башлиқида моһтаҗ вә көп пәрзәнтлик аилиләргә йеңи йиллиқ шерин совғатлар тәйярлап, уларға тарқитип беришти. 

Игилинишичә, бишкәк шәһири вә униң әтрапидики йезиларда иқтисадий әһвали қийин вә моһтаҗ аилиләр хели көп икән. «Иттипақ» җәмийитиниң яшлар комитети «аламедин» вә «қашқа су» йезилардики моһтаҗ аилиләргә ярдәм бәргәнлики мәлум. Радийомиз зияритини қобул қилған яшлар бөлүминиң әзаси күрәш өзлири ярдәм көрсәткән икки аилиниң көп пәрзәнтлик аилиләр икәнликини илгири сүрди. 

Қирғизистан оттура асия дөләтлири ичидә қазақистандин қалсила уйғур җамаити әң көп яшайдиған дөләт һесаблиниду. Қирғизистан уйғурлири қирғизистан мустәқил болғандин кейин башқа хәлқләргә охшашла җамаәтлик ишларда зич уюшуп, һәр йилидики байрам вә һейт айәмләрдә сахавәтлик ишларни елип бармақта. Болупму һәр йили рамзан ейида, роза һейт вә қурбан һейт байрамлирида, балилар байримида, тәбиий апәт йүз бәргәндә вә яки вә қериндашлири еғир қийинчилиқларға учриғанда һәр даим ярдәм қолини сунуп кәлмәктә.

Толуқ бәт