4-Нөвәтлик «америка уйғур лоңқиси» путбол мусабиқиси башланди

Мухбиримиз әзиз
2018-07-04
Елхәт
Пикир
Share
Принт
«Америка уйғур лоңқиси» путбол мусабиқисиниң ечилиш мурасимидин көрүнүш. 2018-Йили 4-июл, америка.
«Америка уйғур лоңқиси» путбол мусабиқисиниң ечилиш мурасимидин көрүнүш. 2018-Йили 4-июл, америка.
RFA/Eziz

Пүтүн дунядики путбол һәвәскарлири «дуня лоңқиси» путбол мусабиқисиниң ахирқи топ мусабиқилирини иштияқ билән көрүватқанда шималий америкидики уйғур җамаитиниң әң чоң аммиви паалийәтлиридин болған «америка уйғур лоңқиси» ни талишиш мусабиқиси 4-июл башланди. Бу қетимқи мусабиқә орни үчүн америкиниң вирҗинийә штати талланди. Бу қетимқи мусабиқигә қатнишиш үчүн җәмий йәттә команда өзини тизимлатқан болуп, буларниң ичидә «тәклимакан» вә «уйғур бирлики» командиси вирҗинийә штатидики командилар һесаблиниду. Улардин башқа йәнә «лос-анжелес уйғур командиси», «сан-ферансиско уйғур командиси», «уйғур боғда командиси», «мариланд уйғур командиси» қатарлиқларму бу қетимқи мусабиқидә топ тепиду.

Бу қетимқи «америка уйғур лоңқиси» путбол мусабиқисиниң ечилиш мурасими 4-июл күни чүштә вирҗинийә штатидики фалсчурч шәһиридә өткүзүлди. Паалийәт соруни хели бурунла уйғур яшлири вә җамаити билән җанланған болуп, сорунниң кәйпиятидин қариғанда, путболға болған муһәббәт билән уйғурлуқ муһәббити чәмбәрчас юғурулуп кәткән иди. Паалийәт башлиниш алдида бу қетимқи путбол мусабиқисигә қатнишидиған топчилардин «уйғур бирлики» командисиниң әзаси ширәли бу мусабиқә һәққидә қисқичә чүшәнчә бәрди.

Мәзкур командиниң әтрәт башлиқи әрфат дилшатму бу һәқтә тохтилип, бу мусабиқиниң көлими техиму зорийишиға ишәнчи барлиқини билдүрди. Ширәли бу қетимлиқ мусабиқиниң кәлгүси һәққидә қандақ арзулири барлиқини сориғинимизда өзиниң шәхси арзусидин көрә путбол мусабиқисини васитә қилип туруп уйғурларни дуняға тонутуш арзусиниң бәкрәк күчлүк икәнликини билдүрди.

Бу қетимлиқ паалийәткә уйғур җамаитиму йирақ-йеқиндин келип қатнашқан иди. Шулар қатарида вашингтон шәһиридики уйғур паалийәтчи иляр шәмшидин бу һәқтә қандақ тәсиратта икәнликимизни сориғинимизда өзиниң мушу қетимлиқ мусабиқә арқилиқ яшлардики баш әгәмәслик роһини көргәнликини вә буниңдин толиму сөйүнгәнликини билдүрди.

Бу қетимлиқ паалийәт башланғанда пүтүн зал җушқун яшларға лиқ толған иди. яшларниң һурра шавқунидин кейин бу қетимлиқ паалийәт рәсмий башланди. Паалийәтни тәшкиллигән яшлар алди билән америка вә дуняниң һәрқайси җайлиридики уйғур җамаитиниң қизғин қоллап қуввәтлишигә болған тәшәккүрини билдүрди.

Шуниңдин кейин паалийәт гурупписи бу қетимлиқ ечилиш мурасиминиң алди билән «шәрқий түркистан марши» билән башлинидиғанлиқини елан қилғанда көпчилик орнидин туруп маршқа һөрмәт билдүрди.

Шуниңдин кейин ширәли сөз елип бүгүнки паалийәтни қизғин қоллап кәлгән америка җамаитигә йәнә бир қетим рәһмәт ейтиш билән биргә өткән йили вапат болған уйғур яшлиридин ерфан маликни шундақла униң путбол оюнлирида һәрқачан вартар болидиғанлиқини әсләп өтти һәмдә көпчиликни униң роһиға атап дуа қилишқа дәвәт қилди.

Паалийәт иштиракчилиридин еляр шәмшидин бу һәқтә бизгә қисқичә чүшәнчә берип, уйғур яшлириниң өзлириниң мәрһум сәпдашлирини унтумаслиқтәк роһиниң уйғурдики есил хисләтләрдин бири икәнликини намаян қилғанлиқ, деди.
Бу қетимқи мусабиқигә қатнишидиғанлар қатаридики оттура яшлиқлардин әхмәтҗан айрим зияритимизни қобул қилғанда өзлириниң мусабиқигә қатнишиши яшларға бесим қилиш әмәс, бәлки техиму көп уйғур яшлирини мушу паалийәт соруниға җәлп қилиш икәнликини билдүрди.

Узун йиллардин буян халисанә һалда америкидики путбол командилириниң мәшқавуллуқини өтәп келиватқан җүрәт заһирму бу қетимқи путбол мусабиқисиниң вуҗудқа чиқишида зор әҗир қилған кишиләрниң бири. У паалийәт арилиқида айрим зияритимизни қобул қилип бу паалийәтниң оңушлуқ ишқа ашқанлиқидин бәкму хушал икәнликини билдүрди. Җүрәт заһир йәнә уйғур җәмийити еғир зулумға вә бастурушқа дуч келиватқан һазирқидәк вәзийәттә уйғур яшлириниң мушундақ бир мусабиқә үчүн җәм болғанлиқини «мән үчүн бир инқилаб» дәп қарайдиғанлиқини билдүрди.

Ахирида америка уйғур бирләшмисиниң рәиси илшат һәсәндин немә үчүн мушундақ паалийәтләрни тәшкилләш зөрүр болғанлиқини сориғинимизда һазирқи вәзийәттә буниң бир җиддий тәләп болуватқанлиқини билдүрди.

У йәнә бу паалийәтни һәрқайси уйғур тәшкилатлири вә җамаитиниң маддий җәһәттин қоллап қуввәтлишидин уйғурлардики өмлүк вә уйғур давасини қоллаш роһини йәнә бир қетим көрүвалғили болидиғанлиқини билдүрди.

Паалийәтниң ахирида бу қетимлиқ мусабиқидә топ тепидиған командиларни гуруппиларға айриш үчүн чәк ташланди вә чәк бойичә гуруппиларға айрилған командилар бүгүн кәчтин башлап топ мусабиқисини башлашқа келишти.

Бу қетимлиқ путбол мусабиқиси тоғрилиқ биз давамлиқ хәвәрләр беримиз. Диққитиңлар давамлиқ биздә болсун!

Пикирләр (0)
Share
Толуқ бәт